2 Corinth-te 13 - Zo Bible

Adang Thuhilnate

¹ Na kung vua kang haw nading a thumveina ahi ta hi. “Mawmatna khatpopo teci ni ahi sihle thum’ theipina tawh a kip hi ding hi,” kici hi.

² Mawna a bawl mite le midang zosie tungah thuhilna kang nei zo hi, a niveina kang haw lai-in zong kang hilsa ma bangin tu ka op lo sungin kang hil a, kang hawkia leh koima kang za nawn sih ding hi,

³ azieh pen note in kei tungah Khris in thu a gen lam a kicien lahtelna na dei sese uhi.

⁴ Bangzieh ahei cile thanemna ziehin singlamte tungah a na kithalia mawh vangin Pasien’ vanglietna tawh ama a hingkia hi. Azieh pen ama sungah ka tha uh a nem a, hinanle note tawh kipawlna-ah Pasien’ vanglietna ziehin ama tawh ka hington ding uhi.

⁵ Upna sunga a nungta na hi ngel vuoi mah ci no le no kisittel un. No le no kize-et un. Na kisittelna vuah a lawsam na hi sih nah uleh na sung vuah Khris a op lam thei lo na hi uh amah?

⁶ Note in a lawsam ka hi lo lam uh ei thei na va uteh ci-in ka lamen hi.

⁷ A lawcing ka hina uh a kilah ding deina hi loin, note a mana na gamtat nading uh deina tawh thu ngen ka hizaw uhi.

⁸ Bangzieh ahei cile kote in thuman thutah langdo-in bangma ka sem thei sih vua, thuman thutah ading behin ka semzaw uhi.

⁹ Azieh pen kote thanemin note na thahat ciengun ka kipah uhi. Kote’ thungetna pen note’ kicingtah thei nading ahi hi.

¹⁰ Keima kang tun ciengin note siet nading hi loin na kilamkip nadingun, na tung vuah Topa in keima ei pieh thuneina kang khauzah seng lo nadingin note tawh i kigamlat sung vua tami lai kang giel ahi hi.

A Tawpna Hopina le Thupha Piehna

¹¹ A tawpna-ah sanggamte aw, mangpha na man ta un. Na opdante uh puopha-in kang ngetnate na ngai unlen, khatlekhat kithutuohin kilemin na om un; tua hile itna le kilemna Pasien in note ang ompi ding hi.

¹² A siengtho kinapna tawh khatlekhat na kinoset un.

¹³ Misiengtho zosie in note ang noset uhi.

¹⁴ Topa Jesu Khris’ ei hepina, Pasien’ ei itna le Hlagau Siengtho tawh kipawl theina in note zosie tawh hing om taheh.