2 Corinth-te 11 - Zo Bible

Paul le Sawltahpi Manlo te

¹ Ka mot opna nengneng teng ei ngaisiem locin ka nuom hi. Ei ngaisiem bo un!

² Note adingin Pasien’ ei deisahna ka nei hi, bangzieh ahei cile keima in pasal khat tawh kinung ngahnu siengtho khat bangin Khris tunga pieh dingin note kang kamciem zo hi.

³ Ahi vangin gulpi in a ngienku tawh Eve a na sol bangin Khris tungah a dih le a siengtho na kipumpiehna panun na ngaisutnate uh na pielsah khah ding uh ka lung a himaw hi.

⁴ Azieh pen mi khatpo ang pei-in kang hilsa uh ahi lo adang Jesu’ thu ang hil a, ahi sihle note in na ngasa uh ahi lo adang hlagau khat nga-in, ahi sihle na sansa uh lungdamna thu ahi lo adang lungdamna thu khat ang hil ciengin na sang paipai uhi.

⁵ Kote ka hi ule tami a thupi mama sawltahpite sangin a neu zaw-in ka kingaisun tuon vawt sih uhi.

⁶ Thugen lamah ei kicil lo ka hi thei mai ding a, hinanle theina lamah ei kicil lo ka hi sam sih hi; note tungah tam bang ka hina sil bangkimah a kicien sinsenin ka langsah zo uhi.

⁷ Note ang kitawisang nadingin keima le keima kiniemsahin man ngen loin Pasien’ lungdamna thu ka gen ziehin mawna a bawl ka hi amah?

⁸ Na na sem dingin hlattuom pawlpi dangte tung panin huna sang ka hi ziehin amau’ sum a lahpieh ka suoh hi.

⁹ Note tawh omtonin kisapna ka nei ciengin Macedonia gam pana ang pei ka lawmte in ka sapnate ei sih ziehun koima vangih ka suon sih hi. Tuaci’n lam khatpopo-ah note’ vangih ka suo lo nadingin ka kideh a, ka kideh lai ding hi.

¹⁰ Keima sungah Khris’ thuman thutah a op ma bangin Achaia gam sung muncin tengah tami ka kisahtheipi pen gen loin ka dai op sih ding hi.

¹¹ Tua ahile bangzieh ahei? Ke’n note kang it lo zieh amah? Kang it lam uh Pasien in thei hi.

¹² Kote tawh a kikim dan a ciemtena a deite’ kisielna ka niel zawh nadingin ke’n zong ka sep pen ma ka semsuoh ding hi.

¹³ Bangzieh ahei cile tua bang mite pen sawltahpi man lote ahi a, amau le amau Khris’ sawltahpi a kipang mi sol nasemte ahi uhi.

¹⁴ Tua pen lamdang sah ding ahi sih hi! Azieh pen Satan nangawn khuovah vantungmi khat bangin a kipangtawm thei hi.

¹⁵ Tuaci’n dihna tate bangin ama’ nasemte a kipantawm uleh lamdang sah ding ahi sih hi. Amau’ gamtatna bangin a tawpna-ah a thuoh ding uhi.

Sawltahpi Ahina Tawh Paul’ Thuohnate

¹⁶ Koima in a maw-in ei ngaisun sih un, ci-in kang genkia hi; hinanle a maw a nei ngaisut uleh tawmkhat beh ka kisiel thei nadingin mimawte bangin ei ngaisunin ei sang veve un.

¹⁷ Kimuong a, tami ka kisielna tungtanga kang gen ding thute pen Topa’ thuneina tawh ang gen ka hi sih a, mimaw khat banga ang gen ka hizaw hi.

¹⁸ Mi tampite in leitung ziete a kisielpi ziehun kei zong ka kisiel ding hi.

¹⁹ Bangzieh ahei cile nomate na pil ziehun lungdamtahin mimawte na thuoh zo veve uhi.

²⁰ Azieh pen mi khat in salin hing bawlin, ahi sihle hing netumin, ahi sihle hing metbawlin, ahi sihle kiliensahin ang pheta beh ciengin zong note in na thuoh zo uhi.

²¹ Tua banga bawl ding lamah kote ka thanem nah mama uhi, ci-in maizum pipi-in kang gen hi! Ahi vangin mimaw khat bangin thu hing gen leng: Mi khatpo in a kisielpi ngam pen kei zong ka kisielpi ngam hi.

²² Amate Hebrew-te ahi uh amah? Kei zong ka hi hi. Amate Israel-te ahi uh amah? Kei zong ka hi hi. Amate Abraham’ suonlehlahte ahi uh amah? Kei zong tua bang ma ka hi hi.

²³ Amate Khris’ nasemte ahi uh amah? Mimaw khat bangin ham tadi leih, amate sangin ka hoizaw buong sam hi: Amate sangin na ka nahsep zaw a, thong zong ka tamkieh zaw hi. Simzawh lo satna ka thuoh a, tamveipitah sikhielin ka ommun zaw hi.

²⁴ Judah-te’ satna sawmli-ah khat a kiemin ngavei tah ka thuoh hi.

²⁵ Ciengpum tawh thumvei ei kisat a, khatvei suong tawh ei kisep hi. Tembaw kisietna thumvei ka tuoh ngai hi; sun khat le zan khat tuipi tungah ka om ngai hi;

²⁶ khuol ka zin munnate-ah keima in guntui khang panin zauhuoina, misuomte tung panin zauhuoina, ka mipite tung panin zauhuoina, Gentile-te tung panin zauhuoina, khuopi sunga zauhuoina, gamlaha zauhuoina, tuipi tunga zauhuoinate a kipanin sanggam man lote tung panin zauhuoinate ka tuoh a,

²⁷ nasep gimin hamsatna sungah omin, zan lai-in tamveipi tah kimu maw liengin ka om hi. Tuale gilkielna le dangtana a kipanin neh ding nei loin tamveipi ka om a, puon sil ding nei loin damsi-in ka om ngitnget hi.

²⁸ Thudangte banah hlattuom pawlpi zosiete ading lunghimaw-in ka lunggimpi lai hi.

²⁹ Ka thanempi lo koi om ahei? Ka lungkhampi lo-a mawna sunga kipuasah koi om ahei?

³⁰ Kisiel lo phamaw ding ahile ka thanemna ei kilangsah nate ma ka kisielpi ding hi.

³¹ Pasien le Topa Jesu’ Pa (ama in thupha nga tawntung taheh!) in ka zuou lo lamtah thei hi.

³² Keima ei mat thei nadingin Damascus khuo Kumpi Aretas’ khut nei-a om gam-uhpa in Damascus khuopi a cingsah hi.

³³ Hizongle seu khat sungah ei kikoi-in kul kotneu vang panin ei kikhiesuh a, ama’ khut sung panin ka suohta hi.