2 Corinth-te 1 - Zo Bible

Hopina

¹ Pasien deina zieha Jesu Khris’ sawltahpi Paul le i sanggam pa Timothy in, Corinth khuo Pasien’ hlattuom tung le Achaia gam sung tenga om misiengtho zosie tungah:

² I Pa Pasien le Topa Jesu Khris tung panin hepina le lungnopna thupha na tung vuah hing tung taheh.

Gentheina a Thuoh Zaw Cienga Paul’ Lungdam Kona

³ Hepinate’ Pa le henepna zosie’ Pasien ahi i Topa Jesu Khris’ Pa Pasien in thupha nga taheh.

⁴ Pasien in komama ei henep ziehin kote in zong gentheina khatpo a thuohte ka henep thei nadingun, ka gim thuohna zosie uh panin ama in ei henem hi.

⁵ Bangzieh ahei cile Khris sungah gimna tampi ka thuoh ma bangun ama in Khris tungtawn ma-in a kicing henepna ei pie hi.

⁶ Kote in gimna ka thuoh uleh zong note’ henepna le kihutdam nading ahi hi; kote ei kihenep leh tuami pen kote thuoh bangbang note in na thuoh zawh nading vua thuohzawh hatna ang guon henepna ahi hi.

⁷ Note dinga ka kinepna uh a kip hi; azieh pen note in kote thuoh teng nei thuohpi ziehun kote nga ding henepna zong nei ngapi ding uhi, ci-in ka thei uhi.

⁸ Sanggamte aw, Asia gam sunga ka thuoh uh gimnate thei lo-a na op ding uh ka dei sih hi; bangzieh ahei cile kote in thuoh zawh lo ding za-in gimna ka thuoh vua, hin tu zo lo ding za-in ka lung uh a kie gawp hi.

⁹ Hi tahpi hi, kote ka hi ule si nading thukhenna thuohin ka kingaisun vua, ahi vangin kote thuoh gimna pen ko le ko kimuong loin misite a thosah Pasien ka muon thei nading uh ahi hi.

¹⁰ Ama in tua zataha a zauhuoi si theina panin ei hunkhie zo a, zong ei honkhie lai ding hi, ci-in ama tungah kinepna ka nei uhi.

¹¹ Mi tampite’ thungetna tungtawnin kote ei kipie thupha ziehin mi tampi in kote’ adingin lungdamna ei kopieh thei nadingun, note in zong na thungetna utawh ei na panpi un.

Paul’ Haw Ding a Hun Kisotto

¹² Kote’ kitheina teci panna tahtah tami ahi hi: Kote ka hi ule leitung pilna tawh hi loin Pasien’ hepina vang tawh siengtah le Pasien’ dei lungsim tahpi tawh leitungah ka gamta vua, note tungah a hoizaw kanin kang gamta uhi.

¹³ Bangzieh ahei cile na sim thei ding ule na theithei dingte uh ci simlo bangma kang giel sih uhi; a tawp donga a tel sieng dingin kang lamen uhi.

¹⁴ Topa Jesu’ ni ang tun ciengin kote pen note’ kisahtheina ka hi ma bangun, note nangawn zong kote’ kisahtheina na hi lam uh note in ka thu uh phabep khat na thei zo ta uhi.

¹⁵ Keima in tami thu ka theicien ziehin note in nivei patatna na nga thei nadingun na kung vuah kang haw masa nuom hi.

¹⁶ Macedonia gam ka pei kawmin note kungah hing lambangin, Macedonia panin zong kang hawkia ding a, Judea gam ka peina lamah ei hla locin ka nuom hi.

¹⁷ Tam bang ka bawl nuom ciengin lungsim a khel themthom ka hi amah? Gelnate ka nei ciengin mi maimaite dan bangin, “Ing heh,” ci vanuh a, “Hi sih,” a cikia nianua pawl ka hi amah?

¹⁸ Pasien pen a muonhuoi tahpi ma bangin na kung vua kang thugente zong, “Ing heh,” zong ahi sih a, “Hi sih,” zong ahi tuon sih hi.

¹⁹ Azieh pen Silvanus, Timothy le keima in note lahah kang hil uh Pasien’ Tapa Jesu Khris pen, “Ing heh,” ci-in, “Hi sih,” a cikia nianua pa hi lo hi; ama sungah, “Hi hi,” a ci vive ahi zaw hi.

²⁰ Azieh pen ama sungah Pasien’ kamciemte zosie, “Hi hi,” vive ahi a, tam thu ziehin Pasien’ min a than thei nadingin kote in ama tungtawnin, “Amen,” ka ci ciet uhi.

²¹ Hinanle Khris sungah note tawh kote ei kipsah pa le sathau ei nu pa pen Pasien ahi hi.

²² Ama in eite tungah ama’ ciemtena seal hing tum a, i lungsim sungah ama’ Hlagau ahi malep ei guon zo hi.

²³ Ahi vangin Corinth khuo-a kang hawkia lona pen note kang hepina ahi zawh lam ka teci dingin Pasien ka ko hi.

²⁴ Na upna uh tungah thu nei nopna zieha tam bang a gen ka hi sih uhi; kote ka hi ule na lungdam nading vua note tawh nasemte ka hizaw uhi, azieh pen upna sungah note na ding kip uhi.