1 THESSALONIKA 3 - Zo Bible

¹ Tua ahi ziehin ka thuoh zawh nawn vawt lo ciengun, Athen khuo-a om suoh dingin ka khensat ta uhi;

² tuale na upna uh ang thakhausah ding le ang hanthawn dingin Khris lungdamna thu tangkona ah Pasien’ na ka seppi uh i sanggam pa Timothy kang sawl vua,

³ tua pen bawlsietnate ziehin koima na linglawn lo nading uh deina ahi hi. Kote ka hi ule tam bang bawlsietna a thuoh dinga laitansa ka hi lam uh na theisa uh ahi hi.

⁴ A tahtahin, note tawh i opton lai-in bawlsietna ka thuoh ding uh kang magensa uh ahi ta bo hi; na thei ma bangun tua bangin ang pieng mintah hi.

⁵ Tami thu hang tawh ka thuoh zawh nawn lo ciengin na upna uh a kan dinga ama kang sawl ahi hi; mi ze-et pa in lam khatpo tawh note hing ze-et in ka sep gimnate uh a mawhna a suo khah ding ka lunghimaw hi.

Thalawphuoi Timothy’ Thupuoh

⁶ Ahi vangin tu-in no kung panin ko kungah Timothy ang tung pan lien ahi a, ama in ko tungah na upna ule nei itna uh lungdamna thu thate ei puoh hi. Note kang munop ma bangun note in limtahin kote ei phawhin nei munopna thu zong ama in ei gen zo ta hi.

⁷ Sanggamte aw, tami thu ziehin lunggimna le bawlsietna ka thuoh hun sungun note’ upna tungtawnin ka na kihenem uhi.

⁸ Bangzieh ahei cile Topa sungah na dinkip suoh nah po uleh tu-in a hing ka hi ta uhi.

⁹ Pasien mai-ah note ziehin ka lungdamna zosie uh thuhkia nadingin Pasien kungah bangci bangin a kicing lungdamna ko theikia ding ka hi uh ahei?

¹⁰ Note tawh kimaituo-in upna lamah na kisap popo uh na ngakia thei nadingun sun le zanin nahpi tahin thu ka ngen uhi.

¹¹ Tu-in eite’ Pa mama le i Pasien le i Topa Jesu in na kung vua kang haw thei nading uh ma ei pui taheh.

¹² Note kang it bangun note khatlekhat na ki-itna ule mi zosie na itna uh Topa in hing khangsah taheh.

¹³ Ama’ misiengtho zosiete tawh i Topa Jesu ang pei ciengin, ama in i Pasien le i Pa uh mai-ah paubanna na nei lo nadingun siengthona sungah na lungtangte uh hing thakhausah taheh.