1 Samuel 8 - Zo Bible

Israel in Kumpi Khat Ngen

¹ Samuel a vuoi bepin ama in Israel tungah a tapate thukhenin koi hi.

² A tapa tapen Joel ahi a, a nina pen Abijah ahi hi; ama gel pen Beer-sheba a thukhente ahi uhi.

³ Hinanle a tapate in ama’ tawn dante zui loin, sum lamah a kihei vua, guhgol la-in, thutang a lehei uhi.

⁴ Tua ciengin Israel upa zosie kikhawmin Ramah-a Samuel kungah a pei vua,

⁵ tuale ama kungah, “Nang na vuoikawn ta a, na tapate in lah na tawndante a zui sih uhi; tua ciengin mi namdangte ma bangin kote ei uh ding kumpi khat ei guon in,” a ci uhi.

⁶ Ahi vangin amate in, “Kote ei uh ding kumpi khat ei pie in,” a ci ciengun tam thu in Samuel lungkimsah lo hi. Samuel in Topa kungah thu ngen a,

⁷ Topa in Samuel kungah, “Mite in na kunga ang gen uh thu zosie mang in; azieh pen nang ang nuol ahi sih a, amate tunga kumpi sem dingin kei ei nuol uh ahi zaw hi.

⁸ Egypt pan amate ka peipi ni-a kipan tuni dongin kei ei nuasie-in pasien dangte’ na a sem vua, kei tunga ei bawl bangun nang tunga zong ang bawl uh ahi hi.

⁹ Tua ahi ciengin tu-in a thugen uh ngai in; amate lipkhaptahin na hilkhol beh ding hi. Amate tunga a uh ding kumpipa’ sepzie ding teng lah in,” a ci hi.

¹⁰ Tuaci’n Samuel in ama kunga kumpi a ngen mite kungah Topa’ thugen zosie a gen hi.

¹¹ Ama in, “Note tunga ang uh ding kumpipa’ gamtatzie ding teng tam bang ahi hi: Ama in na tapate uh la-in leengte-ah nasemin a sakol nasem ding, a leengte mai-ah a tai dingin se ding hi;

¹² tuale ama adingin a tulkhat uhte, le a sawmnga uhte, pawl khatte a lo kai-in a an at ding, le a gal vanzah le a leeng vanzahte bawl dingin se ding hi.

¹³ Ama in panamtui bawl ding, an huon ding, le moh em dingin na tanute uh a la ding hi.

¹⁴ Ama in na lo te uh, na lengga lote uh, na olive lote uh lah panin a hoipen teng la-in a nasemte a pie ding hi.

¹⁵ Ama in na an le na lenggate uh’ sesawm-suo-sekhat la-in a uliente le a nasemte a pie ding hi.

¹⁶ Ama in na nasem pasalte, na nasem numeite, na bawnghonte, na laate lah panun a hoi pente la-in ama’ na sem dingin koi ding hi.

¹⁷ Ama in na tuuhonte uh sawm-a- khat la ding a, ama’ sila na hi ding uhi.

¹⁸ Khum ni-in noma dinga na teelsa uh na kumpipa uh ziehin na kap ding uhi; hizongle khum ni ciengin Topa in ang dawng sih ding hi,” a ci hi.

Israel’ Kumpi Nget Kipie

¹⁹ Ahi vangin mite in Samuel’ thugen a mang sih uhi; amate in, “Hi lo e! Ka tung vua ei uh ding kumpi khat nei ding pen ka khensatsa uh ahi bo hi,

²⁰ tuaci’n kote zong minam dangte ma bangin ka kumpipa un ka tung vuah thu ang vaihawm ding a, ka mai vuah hing pei-in ka galte uh ei do pieh ding hi,” a ci uhi.

²¹ Mite’ thugen zosie Samuel in a zah zaw ciengin ama in Topa’ bilkawm-ah tua teng a gensawnkia hi.

²² Topa in Samuel kungah, “A thugen uh mang inlen amate tungah kumpi khat koi in,” a ci hi. Tua ciengin Samuel in Israel mite kungah, “Mi zosie na inn ciet vuah pei ta un,” a ci hi.