1 Samuel 3 - Zo Bible

Samuel Kihlatna le Kamsang Nasep

¹ Tu-in Eli’ khut nei-ah naupang Samuel in Topa’ na a sem hi. Tua hun lai-in Topa’ thu cieu mama hi; mangmuna zong om zep lo hi.

² Tua hunin a mit mang dinga a kipan zo Eli in khuo mu thei loin a lupna-ah lum hi;

³ Pasien’ meivah mit nai lo a, Pasien’ singkuong opna Topa’ biehinn sungah Samuel lum hi.

⁴ Tua ciengin Topa in, “ Samuel! Samuel!” ci-in hlan a, tuale ama in, “Tanah om ing!” ci-in

⁵ Eli kungah tai a, tuale ama in, “Nei hlat ziehin tanah ka om hi,” a ci hi. Ahi vangin ama in, “Kang hlan kha sih hi, ka tapa; lumkia ta’n,” a ci hi. Tuaci’n ama pei-in a lum hi.

⁶ Topa in, “Samuel!” ci-in hlankia hi. Samuel tho-in Eli kungah pei a, ama in, “Nei hlat ziehin tanah ka om hi,” a ci hi. Ahi vangin ama in, “Kang hlan sih hi, ka ta aw; lumkia in,” a ci hi.

⁷ Tua hun lai tahin Samuel in Topa thei nai lo a, Topa in ama hopi ngai nai lo hi.

⁸ Topa in Samuel a thumveina hlankia hi. Tuale ama tho-in Eli kungah pei a, “Nei hlat ziehin kei tanah ka om hi,” a ci hi. Tua ciengin Topa in naupangpa hlan hi, ci Eli in a thei ta hi.

⁹ Tua ahi ziehin Eli in Samuel kungah, “Pei inlen valum ta’n; ama in ang hlat leh, ‘Topa aw, ei gen in, na nasempa in a ngai hi,’ na ci ding hi,” a ci hi. Tuaci’n Samuel pei-in a opna ah a lum hi.

¹⁰ Topa pei-in tua tahah ding a, a masa lai-a bangin “Samuel! Samuel!” ci-in a hlan hi. Samuel in, “Gen in, na nasempa in a ngai hi,” a ci hi.

¹¹ Tua ciengin Topa in Samuel kungah, “En in, Israel gamah bang khat ka bawl ding a, tua thu a za mi vannuoi ciza lia ding uhi.

¹² Tuami ni-in ama’ innkuon tungtang ka gensa zosie a patna pan a tawp tanpha-in Eli tungah ka tungsah ding hi.

¹³ A tapate in Pasien’ mindaisah a, a tate’ khielna thei napi ama in a khaam lo ziehin kumtawnin ama’ innsung gimna ka pieh ding thu ama kungah ka gen hi.

¹⁴ Tua ziehin Eli innkuon’ khielna biehpiehna tawh ahi a, silpieh tawh ahi zongin khang tawntungin mai nawn lo ding hi, ci-in Eli’ innkuon tungah ka kiciem hi,” a ci hi.

¹⁵ Zingmawng dong tua tahah Samuel lum hi; tua ciengin ama in Topa’ inn kotkhahte a hong hi. Samuel in Eli kungah a mangmuna a gen ngam sih hi.

¹⁶ Hizongle Eli in Samuel hlanin ama kungah, “Samuel, ka tapa aw,” a ci hi. Ama in, “Tanah om ing” a ci hi.

¹⁷ Eli in, “Ama in na kunga ang gen bang ahiei? Kei kungah ei im malmal sin. Na kunga ang gen zosie ka kungah ip nang nei leh Pasien in nang hing dop bawl sih taheh,” a ci hi.

¹⁸ Tuaci’n Samuel in bangma ip nei loin a unpi-in a gen sieng hi. Tua ciengin Eli in, “Ama Topa hizuh a; ama in hoi a sah bangin kibawl taheh,” a ci hi.

¹⁹ Samuel khanglien a, Topa in ama ompi-in a thugente khat zong tuolah kiesah lo hi.

²⁰ Israel zosie in Samuel pen a muontah Topa’ kamsang khat a hina thu Israel-te zosie in Dan panin Beer-sheba dongin a thei uhi.

²¹ Shiloh ah Topa’ kilah peisuoh hi, bangzieh ahei cile Topa’ kammal tungtawnin Shiloh ah Samuel kungah Topa amama kilah hi.