1 Samuel 29 - Zo Bible

Philistia-te in David Nuol

¹ Tu-in Philistia-te in a galkap zosie uh Aphek ah a khawmtuo vua, Israel-te in Jezreel-a tuikhuh gei-ah giephuol a sat uhi.

² Philistia uliente a tul tul, a za za-in a kizawt laitahun David le a mite zong Achish tawh a nua lamah a pei uhi.

³ Philistia galkapmangte in, “Tami Hebrew-te tam muna bang bawl ahi uh ahei?” a ci uhi. Achish in Philistia galkapmangte kungah, “Tampa, ni tampi le kum tampi keima tawh a omton Israel kumpi Saul’ nasempa David hi lo amah? Ka kunga ang tai-a kipan tuni cieng dongin ama tungah khielna ka mu sih hi,” a ci hi.

⁴ Hinanle ama tungah Philistia galkapmangte a lungthah uhi; tuale Philistia galkapmangte in, “Na koina munah a kilekia thei nadingin tua mipa peisahkia in; gal kidona sungah eite tawh ama a kuonton sih ding hi, tua ahi sihle gal kidona sungah i langin ang pangkha ding hi. Azieh pen tam mipa in a pupa tawh kilemna bangci bawl thei ding ahei? Tam sunga om mite’ lutangte tawh a bawl ding hi lo amah?

⁵ Tampa khu, ‘Saul in a tulin that, David in a tul sawmin that,’ ci-a amate khatlekhat a lam kawmun la a tap pa uh David hi lo amah?” a ci uhi.

⁶ Tua ciengin Achish in David hlanin ama kungah, “Topa a hing ahi ma bangin nang na thuman a, gal sungah kei tawh na kuonton na tunton ding man ka sa hi; azieh pen keima kunga nang tun ni-a kipan tuni dongin na tungah khielna bangma ka mu sih hi. Hinanle uliente in nang ang dei sih uhi.

⁷ Tuaci’n tu-in kilekia in; hlamuong tahin pei ta’n; Philistia uliente lung himaw nading bangma bawl da mai in,” a ci hi.

⁸ David in Achish kungah, “Bang ahiei ka bawl? Ka pu kumpipa’ galte do-in ka pei thei lo nadingin na nasem dinga kang lut ni-a kipan tuni dongin na nasempa tungah bang mu na hei?” a ci hi.

⁹ Achish in David dawngkia a, “Keima’ muna-ah nang pen Pasien’ vantungmi khat bangin kaw baanglo na hina thu ka thei hi; hinanle Philistia galkapmangte in, ‘Eihaw tawh gal kidona sungah ama ang kuonto sih ding hi,’ a ci uhi.

¹⁰ Tua ciengin tu-in nang zawpi na pupa’ nasemte tawh zingmawngin thobai unlen, note adinga ka koisa munah pei un,” a ci hi. Ka mai-ah hoitahin sem zo na hi ziehin, thu hoi lo kigente tawh kisai-in lung himawna-in nei sin. Zingmawng a kipan thobai unlen, khuova behin kihem pai ta un,” a ci hi.

¹¹ Tuaci’n Philistia gama kilekia dingin a mite tawh David zingmawng phalvahin dingkhie a, hinanle Jezreel-ah Philistia-te a peito uhi.