1 Samuel 24 - Zo Bible

David in Saul’ Nuntahna Hinkhawi

¹ Saul in Philistia-te a nuadelna panin a kilekia ciengin ama kungah, “En-gedi senel gamah David om hi,” ci-in kigen hi.

² Tua ciengin Saul in Israel zosie sung panin a kituomteel pasal tul thum zawpi-in Gamkel Suongpi lamah David le a mite sui dingin a kuon hi.

³ Lam gei-a tuubuhte gei-ah ama pei a, khum tahah leihawm khat a om hi; tuale awnghaw dingin Saul tua sungah a lut hi. Tua leihawm sungtawng penah David le a mite na to uhi.

⁴ David’ mite in ama kungah, “Topa in, ‘Na khut sungah na galpa kang pie ding a, pha na sah bangin ama tungah na bawl ding hi,’ ei ci ni khu tuni ahi ta hi,” a ci uhi. Tua ciengin David pei-in Saul’ puontuol tep a dap tanpieh hi.

⁵ Tua zaw ciengin a puontuol tep a tansan ziehin David a lung a nuom sih hi.

⁶ Ama in a mite kungah, “Topa’ sathau nu pa ahi ka Topa tungah tam banga ka khut hlan khah ding pen Topa in ei kham hi; bang ding ahei cile ama pen Topa’ sathau nu pa ahi hi,” a ci hi.

⁷ Tuaci’n David in a mite nahpi tahin phawhsie a, Saul a do ding uh a phal sih hi. Tua ciengin Saul tho-in leihawm nuasie a, a pei nading lampi-ah a pei hi.

⁸ Tua zaw ciengin David zong tho-in leihawm pan pusuohin Saul a nua hlat a, “Ka pu kumpipa!” a ci hi. Saul kinua hei-in a et ciengin David in a mai tuol ngatin khupbawhin zatahna a pie hi.

⁹ David in Saul kungah, “Bang ding a, ‘David in na siet nading sui hi,’ a ci mite’ thugen ngai na hi ahei?

¹⁰ Tuni mama-in Topa in nang leihawm sung, ka khut sungah ei pieh lam na mit-in na mu zo ta hi; tuale mi pawlkhat in nang a that dingin ei tawh vua, ahi vangin ken nang kang hinkhawi hi. Keima in, ‘Ka pu tungah ka khut ka hlang sih ding hi; bangzieh ahei cile ama pen Topa’ sathau nu pa ahi hi,’ ka ci hi.

¹¹ Ka pa aw, ka khut sunga na puontuol tep khu en vawi; azieh pen kei khutah khielna ahi a, kumpi langpanna ahi zongin a op lona, na puontuol tep tansanin nangma kang tha lona thu tawh a kicienin na thei ding hi,” a ci hi. Nang in kei tha dingin nei sui vangin nang tungah kei ka khiel sih hi.

¹² Topa in nang le kei kikalah thu khen taheh! Topa in na tungah ka phu la taheh; ahi vangin keima in nang tungah ka khut ka hlang sih ding hi.

¹³ Khanglui paunah khatah, ‘Mi gilote panin gitlona hing pieng,’ a ci bang ahi hi; ahi vangin nang tungah ka khut ka hlang sih ding hi.

¹⁴ Israel kumpipi koi do dinga hing kuon na hei? A koi pen nuadel na hei? Ui si khat amah? Uihih khat ahiei?

¹⁵ Tua ahi ziehin thukhenpa khu Topa hi hinlen, ama in nang le kei kikalah thu khen taheh. Ama in tam thu van hinlen ka vai ei panpi-in nang langkhatah ka dihna hing talang taheh,” a ci hi.

¹⁶ David in Saul kungah tam thu teng a gen zaw ciengin Saul in, “Tami nang awsuo amah, ka tapa David?” a ci hi. Saul awngin a kap hi.

¹⁷ Ama in David kungah, “Kei sangin nang na thumanzaw hi; azieh pen keima in nang tungah a sie ka bawl laitahin nang in kei tungah a pha tawh nei thuh hi.

¹⁸ Topa in na khut sungah ei koih laitahin nang in kei ei that loin nei limbawlna tuni-in nei tel gen zo ta hi.

¹⁹ Bang zieh ahei cile koi in a galpa mu-in bihtahin peisah ding ahei? Tuaci’n tuni-in kei tungah nei bawlna ziehin Topa in sil hoi tawh thaman hing pie taheh.

²⁰ Tu-in nang kumpi a suoh valon ding na hi, ci ka thei hi. Na khut sungah Israel kumpi gam kip ding hi.

²¹ Tua ziehin keima nua-a ka suon ka hlahte thatgam loin ka pa’ innkuon panin ka min na suhmang lo nadingin Topa’ min tawh ka kungah hing kiciem in,” a ci hi.

²² Tuaci’n Saul tungah David a kiciem hi. Tua ciengin Saul a inn ah a pei hi; ahi vangin mun muonhuoi-ah David le a mite a peito uhi.