1 Samuel 23 - Zo Bible

David in Keilah Khuopi Hunkhie

¹ Tu-in amate in David kungah, “Philistia-te in Keilah simin ancilna munte a bulu uhi,” ci-in a gen uhi.

² David in Topa dong a, “Pei-in Philistia-te ka bulu diei mah?” a ci hi. Topa in David kungah, “Pei in Philistia-te bulu inlen, Keilah hunkhie in,” a ci hi.

³ Ahi vangin David’ mite in ama kungah, “En in, Judah gam tami sunga ki-om bawn i zau lai uhi; Philistia-te sim dingin Keilah ah va kuon ta leih bangza-in i zauzaw kan lai ding vuoi?” a ci uhi.

⁴ Tua ciengin David in Topa dong phakia hi. Topa in ama dawng a, “Ingheh, Keilah ah peisuh in; bang ding ahei cile na khut sungah Philistia-te kang pie ding hi,” a ci hi.

⁵ Tuaci’n Keilah ah David le a mite a pei vua, Philistia-te tawh kido-in a ganhonte uh a lahpieh vua, amate zong tampitah a that uhi. Tua bangin David in Keilah mite a hunkhie hi.

⁶ Keilah-a David kungah Ahimelech’ tapa Abiathar a tai ciengin a khut sungah siempipuon khat tawh peisuh hi.

⁷ Keilah ah David tung zo hi, ci thu Saul kungah kigen hi. Tuale Saul in, “Pasien in ka khut sungah ama ei pie zo ta hi; bangzieh ahei cile kulkotpite le siazawl kotgolh a nei khuopi sung khatah lutin ama le ama a kikhalu hi,” a ci hi.

⁸ Saul in galsim ding, Keilah-a kuonsuh ding, David le a mite imtawm dingin mi zosie a thuta hi.

⁹ Saul in ama tungah sietna bawl ding a sawm lamtah David in a thei ciengin ama in siempu Abiathar kungah, “Na siempipuon tanah hing peipi in,” a ci hi.

¹⁰ David in, “Israel Pasien, Topa aw, keima ziehin khuopi a susie dingin Keilah ah Saul ang kuon hi, ci thu na nasempa in za zo hi.

¹¹ Tuale tu-in na nasempa’ zah bangin Saul ang kuonsuh ding amah? Israel’ Pasien, Topa aw, na nasempa ei gen in, kang thum hi,” a ci hi. Topa in ama kungah, “Ama ang kuonsuh ding ma ahi hi,” a ci hi.

¹² Tua ciengin David in, “Keilah mite in Saul’ khut sungah kei le ka mite ei ap ding uh amah?” a ci hi. Topa in, “Ang ap ding uhi,” a ci hi.

¹³ Tua bepin David le a mite zaguh tang khat dingdawhin Keilah a nuasie uhi; a pei theina popo vuah a pei uhi. Keilah panin David a suotahna thu Saul kungah a kigen ciengin ama in a vai a khawl phot hi.

¹⁴ Ziph Senel muoltung gam sung, senel gam sung mun muonhuoi-ah David a om hi. Nisielin Saul in ama sui a, ahi vangin Topa! in ama’ khut sungah David pie lo hi.

Senel Gamah David in Saul Pelh

¹⁵ Saul in tha dinga a sui kawi a thei ciengin Ziph Senel gam Horesh ah David a om hi.

¹⁶ Horesh khuo-a om David kunga haw dingin Saul’ tapa Jonathan a kuon hi; ama in Topa tungtawnin khum munah a khutte a hatsah hi.

¹⁷ Ama in David kungah, “Zau malmal sin; azieh pen ka pa Saul’ khut in nang ang mu sih ding hi; nang pen Israel tungah kumpi na hi ding a, kei nang zom ka hi ding hi; ka pa Saul in zong tam thu thei hi,” a ci hi.

¹⁸ Tua ciengin Topa mai-ah a ni gelin thuciemna a bawl uhi; Horesh ah David om lai a, Jonathan a inn ah a pei hi.

¹⁹ Tua ciengin Gibeah-a Saul kungah Ziph-te peito-in ama kungah, “Jeshimon leitaw lam Hachilah muoltunga om Horesh mun muonhuoite sung kote lahah David kiphuol hi.

²⁰ Kumpipa aw, tu-in nang peisuh nuom hunin hing peisuh in; kote bawl ding ahile na khut sungah ama kang pieh ding uh ahi hi,” a ci uhi.

²¹ Saul in, “Kei tungah lainatna nang nei ziehun Topa in thupha hing buoh ta uheh!

²² Va pei inlen va kiciensah lai ta’n; ama hei sung mun liena om hi a, tuale khum sungah koi in ama mu ahei, ci va thei ta’n; bangzieh ahei cile ama pen a pilkhel mama ahi hi, ci-in ka kungah ei kigen hi.

²³ A kimvel en kawikawi-in a kibuhna muntah hing thei unlen, thu kicien tawh ka kungah hing peikia un. Tua ciengin noma tawh kang pei ding hi; gam sungah ama a op leh Judah a tul tampite lah panin ka longdawh teitei ding hi,” a ci hi.

²⁴ Tuaci’n amate a ding vua, Ziph-a pei dingin Saul masangah a na mapei uhi. Jeshimon leitaw lam Arabah gam sung Maon senel gamah David le a mite a om uhi.

²⁵ Saul le a mite pei-in ama a sui uhi. A kisui lam David kunga a kigen ciengin ama suongpi-ah peisuhin Maon senel gamah a om hi. Saul in tua thu a zah bepin Maon senel gam dongah David a del hi.

²⁶ Muol pang khatah Saul pei a, David le a mite muol pang lang khatah a pei uhi. Saul le a mite in David le a mite man dingin a nai semsem ciengun, Saul kung panin a suotah thei nadingin David a nawtai mama hi.

²⁷ Tua ciengin Saul kungah kamtai khat tungin ama in, “Kinaw inlen hing pei in. Bangzieh ahei cile Philistia-te in gam sung ei sim uhi,” a ci hi.

²⁸ Tuaci’n ama in David a nuadel khawl a, Philistia-te sim dingin a kuon hi; tua ahi ziehin khum mun pen Suotahna Suongpi kici hi

²⁹ Tua ciengin khum mun panin David peito-in En-gedi mun muonhuoite sungah a teng hi.