1 Samuel 19 - Zo Bible

Jonathan in David Thumpieh

¹ Saul in a tapa Jonathan le a nasem zosie kungah David tha ding thu a gen hi. Ahi vangin Saul’ tapa Jonathan in David a pahta mama hi.

² Jonathan in David kungah, “Ka pa in nang ang tha sawm hi; tua ziehin zingcieng zingmawngin kikemcing in; a sipna mun khatah va kiphuol ta’n.

³ Keima hing pei-in nangma’ opna gamlahah ka pa gei-ah kang ding ding a, ka pa tawh nang vai ka va kiho ta ding hi; bang khatpo ka zah leh na kungah kang gen ding hi,” a ci hi.

⁴ Jonathan in a pa Saul kungah David genpha a, a kungah, “Na nasempa David tungah kumpipa maw kha malmal sin; azieh pen nang tungah ama ang maw ngai sih a, a sil bawlte nang adingin a hoi vive ahi hi;

⁵ Philistine-pa tawh a kido lai-in ama’ khut sungah a nuntahna a kham ziehin Topa in Israel-te zosie adingin guolzawna lienpi piengsah hi. Nangma in tam thu na mitin na mu a, na lungdam hi; tua ahi ziehin thu om lopi-in bang dingin David thana tawh maw nei lo mipa tungah maw ding na hei?” a ci hi.

⁶ Saul in Jonathan thugen a mang hi; Saul kiciem a, “Ama kithat poma lo ding hi,” a ci hi.

⁷ Tuaci’n Jonathan in ama kungah David hlanin tam thu zosie a gen hi. Tua ciengin Jonathan in Saul kungah David zawpi a, a nidanga ma bangin a sepna ngai-ah a semkia hi.

Saul Kung Pan David A Suotah Nading Michal in Hu

⁸ Gal kidona khatvei omkia a, Philistia-te do dingin David a kuon hi. David in amate nahpi tahin do a, a mai-ah amate a taimang uhi.

⁹ Tua ciengin a khut sungah teipi tawi-in a inn sungah Saul a to laitah, David in tumging a tum laitahin Topa kung panin hlagau gilo khat Saul tungah a tu hi.

¹⁰ Saul in a teipi-in David kawm tawh kiltha ding a sawm a, ahi vangin ama in Saul pelh a, tuaci’n kawmah a teipi kiphut hi. Khum ni zanin David taimangin a suohta hi.

¹¹ Saul in David’ inn a encih dingin kamtaite sawl a, zingmawng ciengin ama tha a sawm hi. David’ zi Michal in ama kungah, “Tu zanin na hinna na hutdam sih leh zing ciengin ang kithat ding hi,” a ci hi.

¹² Tuaci’n Michal in tawlet panin David khiesuh hi; tuale ama tai-in a suohta hi.

¹³ Michal in milim khat la-in a lupna tungah koi hi; tua nu in a lutang sonah kelmul tangkham khat khamsahin puon tawh khu hi.

¹⁴ Saul in David man dingin kamtaite a sawl ciengin ama in, “Ama a ci na hi,” a ci hi.

¹⁵ Tua ciengin Saul in David en dingin kamtaite a sawl hi. Ama in, “Ama ka tha thei nadingin a lupna pumin hing peipi to ta un,” a ci hi.

¹⁶ Kamtaite a tun ciengun a lutunga kelmul tuomna tawh a kikhu milim khat lupna tungah na om hi.

¹⁷ Saul in Michal kungah, “Bang dinga tam banga nei sol a, ama a suotah nadinga ka galpa na taisah ahei?” a ci hi. Michal in Saul dawng a, “Ama in ka kungah, ‘Ei peisah in; bang dinga nang kang tha ding ahei?’ ei ci hi,” a ci hi.

Ramah ah Samuel tawh David Kipawl

¹⁸ Tu-in David taimangin suohta hi; Ramah-a Samuel kungah ama pei-in, Saul in a tunga a bawlsiet dan zosie a gen hi. Ama le Samuel pei-in Naioth khuo-ah a teng uhi.

¹⁹ Saul kungah, “Ramah-a Naioth khua-ah David om hi,” kici hi.

²⁰ Tua ciengin Saul in David man dingin kamtaite a sawl hi. Samuel in makai-in kamsang honte lamin awngin a op uh amate in a mu ciengun Saul’ kamtaite tungah Pasien’ hlagau tungin amate zong lamin awngin kam a sang uhi.

²¹ Saul kungah tam thu a kigen ciengin ama in adang kamtaite sawlkia a, amate zong lamin awngin a om uhi. Saul in a thum veina kamtaite sawlkia a, amate zong lamin awngin a om veve uhi.

²² Tua bepin amama Ramah ah pei a, Secu-a om tuikul lienpi-ah a tung hi; ama in, “Samuel le David hei-a om gel ahei?” ci-in a dong hi. Tuale mi khat in, “Ama gel Ramah-a Naioth khua-ah a om uhi,” a ci hi.

²³ Ama zong Ramah-a Naioth manaw-in a pei hi; tuale a tungah Pasien’ hlagau a tung hi. Ramah-a Naioth mun a tun masang a pei kawmin lamin awngin ama in kam a sang hi.

²⁴ Ama in a puon suodawhin Samuel mai-ah lamin awngin a om hi. Khum ni sun tungtawn le zan tungtawnin a guohtangin ama a om hi. Tua ahi ziehin, “Kamsangte lahah Saul zong a kihal ta amah?” kici hi.