1 Samuel 18 - Zo Bible

David tawh Jonathan’ Thuciemna

¹ David in Saul a hopi zaw-in Jonathan’ lungsim le David’ lungsim kikhiton a, Jonathan in ama’ pumpi za-in ama a it hi.

² Saul in khum ni panin ama kungah David omsah a, a pa’ inn ah a peisah nawn sih hi.

³ Tua ciengin Jonathan in a pumpi za-in David a it ziehin ama tawh thuciemna khat a bawl hi.

⁴ Jonathan in a sil lai a puontuolpi sutin a galvante, a namsau, a thalpi, le a kawngga nasan David a pie hi.

⁵ Saul’ sawlna khat popo-ah David pei-in a matun ahi ziehin Saul in a galkapte a uh dingin ama a koi hi. Mi zosie, Saul’ nasemte nangawn zong a lungkim uhi.

⁶ Philistia-pa a thana panin David pei-in, amate in inn lam a zot ciengun, Kumpi Saul dawn dingin tawm neute le tumgingte tawi-in Israel khuopi zosie sung panin a lam kawmun lasa-in numeite a pusuoh uhi.

⁷ A guolnop kawmun numeite khatlekhat in la a sa vua, “Saul in a tulin that, David in a tul sawmin that,” a ci uhi.

⁸ Tam lasahna ziehin Saul lungthah mama a, tua in ama lungkimsah vet lo hi. Ama in, “ David a tul sawma thatin a gen vua, kei a tul beh thatin ei gen uhi. Kumpi’ min ka puoh simlo bang nei nawn ka hei?” a ci hi.

⁹ Tuaci’n khum ni-a kipanin Saul in David a encih den hi.

David Tha Nading Saul Hanciem

¹⁰ A zing ciengin Pasien kung panin hlagau gilo khat in Saul bawh a, tuale nisima a bawl ngai bangin David in lyre lasahna a tum laitahin a inn sungah Saul a hang gawp hi. Saul in a khut sungah a teipi a tawi hi;

¹¹ tuale Saul in a teipi a khaw hi, azieh pen ama in, “Kawm tawh David kiltha vang,” ci-in a ngaisun hi. Hizongle a ni vei-in David kihem man hi.

¹² Topa in ama ompi-in ahi vangin Saul kung panin a kihep dawh ziehin Saul in David a giing hi.

¹³ Tuaci’n Saul in ama kung panin David hemkhie-in ama mihing tulkhat uhin koi hi; tuale David kuonin galkapte a makai hi.

¹⁴ A sepna bangkimah David a lawcing hi; azieh pen Topa in ama a ompi hi.

¹⁵ Ama in lawcinna lienpi a nei lam Saul in a mu ciengin lamdangsa-in a om hi.

¹⁶ Ahi vangin Israel le Judah zosie in David a it uhi; azieh pen sungtum pusuohin amate a makai pa khu ama ahi hi.

David in Michal Tenpi

¹⁷ Tua ciengin Saul in David kungah, “Tanah ka tanu a tapen Merab a om hi; na zi dingin ama kang pie ding hi; kei adingin hangsan lel inlen Topa’ gal do in,” a ci hi. Azieh pen Saul in, “Ama tungah ka khut ka hlang sih ding hi; Philistia-te in kisep ta uheh,” ci-in ngaisun hi.

¹⁸ David in Saul kungah, “Kumpipa’ mahpa hi thei nadingin kei koi ka hi a, Israel sungah ka tanaute, le ka pa’ innkuonte koi ahi uh ahei?” a ci hi.

¹⁹ Ahi vangin David tungah Saul’ tanu Merab a kipieh ding hun tah ciengin Meholah-te Adriel tungah a zi dingin tua nu kipiezaw ta hi.

²⁰ Tu-in Saul’ tanu Michal in David a ngai hi. Saul kungah tua thu a kigen ciengin ama lungdamsah hi.

²¹ Saul in, “Ama adingin thaang ahi thei nading le ama tungah Philistia-te’ khut a tuh thei nadingin ama tungah tua nu piesah vang,” ci-in ngaisun hi. Tua ziehin Saul in David kungah a ni veina genin, “Tu-in nang ka mahpa ding na hi ta hi,” a ci hi.

²² Saul in a nasemte thu pie a, “David dap hopi unlen ama kungah, ‘En in, na tungah kumpipa lungkim a, a nasem zosie in nang ang it uhi. Tua ahi ciengin tu-in kumpipa’ mahpa suoh in,’ ci-un,” a ci hi.

²³ Tuaci’n Saul’ nasemte in David kungah tam thu teng a gendap uhi. Tuale David in, “Kei mizawng mingau le a vangta khat ka hi lam mu napi-in kumpipa’ mahpa hi thei nading khu thuneu na sa uh amah?” a ci hi.

²⁴ Saul’ nasemte in ama kungah, “David in a hici gen ma hi bo,” a ci uhi.

²⁵ Tua ciengin Saul in, “David kungah tam bangin na gen ding uhi, ‘Kumpipa in a galte tungah phu a lah thei nadingin Philistia-te’ vuntep zakhat ci simlo bangma moman a dei sih hi,’ na ci ding uhi,” a ci hi. Tu-in Saul in Philistia-te’ khut lumin David a sisah sawm hi.

²⁶ A nasemte in David tungah tam bang thute a gen ciengun kumpipa’ mahpa a hi ding pen David lungkim mama hi. A kini ciem uh a tawp masangin,

²⁷ David tho-in a mite tawh kuon a, Philistia-te mi zakhat a that uhi. Kumpipa’ mahpa suo thei nadingin kumpipa tungah a kima kipie ding amau’ vuntepte David in a va puoh ta hi. Tuale Saul in a zi dingin a tanu Michal ama a pie hi.

²⁸ Ahi vangin Topa in David a ompi lam le Saul’ tanu Michal in ama a ngai lam a thei ciengin

²⁹ Saul in David a giingzaw kan lai hi. Tuaci’n Saul khu khum huna kipanin David’ gal ahi ta hi.

³⁰ Tua ciengin gal do dingin Philistia galkapmangte a kuonkhiet simin Saul’ nasem zosie sangin David in guol a zozaw hi. Tua ahi ziehin David a minthang semsem hi.