1 Samuel 16 - Zo Bible

Kumpi-in David Sathau Kinu

¹ Topa in Samuel kungah, “Saul ziehin bang tanvei da ding na hei? Israel tungah kumpi dingin ama ka nuol zo ta hi. Na sathau bung sungah sathau a dimin thal inlen dingdawh in; keima in Bethlehem-a Jessi kungah kang sawl ding hi, azieh pen a tate lah panin keima dingin kumpi khat ka koi zo ta hi,” a ci hi.

² Samuel in, “Bangci pei thei ding ka hei? Saul in za leh ama in kei ei that ding hi,” a ci hi. Topa in, “Bawnglaa khat kai inlen ama kungah, ‘Topa tungah biehpiehna pie dinga ang pei ka hi hi,’ ci-in.

³ Biehpiehna-ah Jessi hlan inlen na bawl ding teng kang hil ding hi; tuale nangma in a min kang gen pa sathau nei nupieh ding hi,” a ci hi.

⁴ Topa’ thupieh bangin Samuel gamta a, Bethlehem ah a ma a pei hi. Ama dawn dingin khuopi upate citun kawmin a pei vua, ama kungah, “Thuhoi-a hing kalsuon na hiei mah?” a ci uhi.

⁵ Ama in, “Thuhoi ahi hi; Topa kungah biehpiehna pie dinga ang pei ka hi hi; noma ciet kisiensuo unlen biehpiehna-ah kei tawh hing pei un,” a ci hi. Tuale ama in Jessi le a tapate siensuo-in biehpiehna-ah amate a hlan hi.

⁶ Amate a tun ciengun ama in Eliab en a, “Tu-in ahile Topa mai-ah Topa’ sathau nu pa om tahtah hi,” ci-in a ngaisun hi.

⁷ Hinanle Topa in Samuel kungah, “A melpuoh ahi sihle a duong sanna lam en sin, azieh pen keima in ama ka nuol zo hi; bangzieh ahei cile Topa in mihingte’ mu bangin a mu sih hi; amate in a putham melpuoh dan en a, hinanle Topa in lungtang a en hi,” a ci hi.

⁸ Tua ciengin Jessi in Abinadab hlanin Samuel mai-ah a peisah hi. Ama in, “Topa in tampa zong teel lo hi,” a ci hi.

⁹ Tua zaw ciengin Jessi in Shammah peisah leuleu hi. Tuale ama in, “Topa in tampa zong teel lo hi,” ci leuleu hi.

¹⁰ Jessi in Samuel mai-ah a tapa sagite a peisah a, tuale Samuel in Jessi kungah, “Topa in tam mite khat zong teel lo hi,” a ci hi.

¹¹ Samuel in Jessi kungah, “Na tapa zosie tana om sieng ma uh ahiei mah?” a ci hi. Tuale ama in, “A nautum pen om lai hi, ahi vangin ama tuucinga om ahi bo hi,” a ci hi. Tuale Samuel in Jessi kungah, “Mi sawl unlen ama hing zawpi ta un; azieh pen ama tam sunga ang tun masangsie i kipan thei sih ding uhi,” a ci hi.

¹² Ama in mi sawlin ama a tumpi hi. Ama cisan suo-in dam mel puo a, a mit ha dan kilawm a, a mel zong hoi hi. Topa in, “Ding inlen ama sathau nu in; tampa ahi hi,” a ci hi.

¹³ Tua ciengin Samuel in sathau bung la-in a sanggamte mitmu-in ama sathau a nu hi; tuale khum ni-a kipanin David tungah Topa’ hlagau khautahin a tung hi. Tua ciengin David dingdawh a, Ramah ah a pei hi.

David in Saul adingin Lyre Lasahna Tum

¹⁴ Tu-in Saul kung panin Topa’ hlagau a peidawh a, Topa kung panin hla gilo khat in ama a bawlsie hi.

¹⁵ Saul’ nasemte in ama kungah, “Tu-in en in, Pasien kung panin hla gilo khat in nang ang bawlsie hi.

¹⁶ I pu un tu-in ang kem na nasemte tungah lyre a tumsiem mi pawlkhat a sui nadingun thu pie in; na kungah Pasien’ kung pana ang pei hla gilo ang tun ciengin ama in tuami ang tum ding a, na ci ang dam ding hi,” a ci uhi.

¹⁷ Tuaci’n Saul in a nasemte kungah, “A tum siem mi khat ei suipieh unlen, ka kungah hing zawpi un,” a ci hi.

¹⁸ Tangvalte khat in dawng a, “Bethlehem-a Jessi’ tapa, tumging tum siem, galhang, galdo siem, thugen lama a pilvang, mi melpieng khat ka mu hi; tuale Topa in ama a ompi hi,” a ci hi.

¹⁹ Tuaci’n Saul in Jessi kungah kamtaite sawlin ama kungah, “Tuucinga om na tapa David ka kungah hing sawl in,” a ci hi.

²⁰ Jessi in laa khat kai-in anlum, lenggazu savun thawl khat, keelno khat puosahin Saul kungah a tapa David a peisah hi.

²¹ Saul kungah David tung a, tuaci’n ama na semin a pang hi. Saul in ama it mama a, a galvan puopa a suoh hi.

²² Jessi kungah Saul in mi sawlin, “Ka na semin David hing omsah ta’n, azieh pen ama in ka maipha a mu hi,” a cisah hi.

²³ Saul tungah Pasien kung pana hla gilo a tuh popo ciengin David in a lyre la-in a khut tawh tum a, tuaci’n Saul thathokia-in nuomtuom a, ama kung panin hla gilo a peikhie hi.