1 Samuel 1 - Zo Bible

Samuel Suona le a Ki-apna

¹ Ephraim muoltung gama Rama-thaim ah Ephraim mi Zuph’ tapa Tohu, a tapa Elihu, a tapa Jeroham, a tapa Elkanah a kici mi khat a om hi.

² Ama in zi ni nei hi; khat’ min Hanah ahi a, a khat’ min Peninah ahi hi. Peninah in ta nei a, ahi vangin Hannah in nei lo hi.

³ A kumkumin ama’ khuo panin tam mipa Eli’ tapa nite Hophni le Phinehas in Topa’ siempu a sepna uh mun Shiloh ah Vanglien Topa bie ding le biehpiehna pie dingin kato zel hi.

⁴ Tua ni-in Elkanah in biehpiehna a lui ciengin a zi Peninnah le a tanute a tapate zosie tungah tanh a pie hi;

⁵ ahi vangin ama in Hannah tungah tanh ni a pie hi, azieh pen Topa in a naubu khahpieh zongle ama in Hannah it veve hi.

⁶ Topa in a naubu a khahpieh ziehin alang nu in a lungthah thei nadingin ama nahpitahin a phin zel hi.

⁷ Tuaci’n kum sielin tuaci den uhi; Topa’ inn ah a kato sielun ama in tua nu a phin zel hi. Tua ahi ziehin Hannah kapin an ne lo hi.

⁸ A pasal Elkanah in, “Hannah, bang zieha kap na hiei? Bang dinga an na neh lo ahiei? Bang dinga lungkham na hiei? Nang adingin tapa sawm sangin manphazaw hi lo ka mah?” a ci hi.

⁹ Shiloh ah a neh a dawn zaw ciengun Hannah ding dawhin Topa mai-ah ama le ama a kipulah hi. Tua laitahin Topa’ biehinn khuom pangah siempu Eli na to hi.

¹⁰ Ama nah lungkham mama a, Topa kungah thu ngenin nahpi tahin kap hi.

¹¹ Tua nu in tami kiciemna a bawl hi: “Vanglien Topa aw, na nasemnu’ lunggimna ei enin nei phawh a, keima ei mangngil loin na nasemnu tungah nausen pata khat nei pieh leh, a si dongin na mai-ah nazir mi-in kang ap ding hi. Ama in zu hile khamtheite hile dawn lo ding a, a lu tungah mulmetna tukha lo ding hi,” a ci hi.

¹² Topa mai-ah ama thu ngenin a op laitahin, Eli in tua nu’ kam na en hi.

¹³ Hannah in dai dide-in thu ngen hi; a nephu beh pia-in a aw kiza lo hi; tua ahi ziehin Eli in zukhamin a ngaisun hi.

¹⁴ Tuaci’n Eli in ama kungah, “Bang tanvei zukhamin mite’ nuisatin om ding na hei? Na zuneh khawl in,” a ci hi.

¹⁵ Hizongle Hannah in, “Hi lo hi, ka pu aw, mi lungkham le mi liengvai numei khat ka hi hi; lenggazu hile khamtheizu hile ka ciem vawt sih a, Topa mai-a ka lungsim teng a sunghla dawh ka hi bo hi,” a ci hi.

¹⁶ Kimanna a nei lo numei danin ei ngaisun sin, azieh pen ka lung a gim seng le ka cimaw nah seng zieha a ham ka hi bo hi,” a ci hi.

¹⁷ Tua ciengin Eli in, “Lungmuongin pei in; Israel-te’ Pasien in ama tunga na ngetsa thu ang pie hi,” ci-in a dawng hi.

¹⁸ Ama in, “Na mitmu-in na nasemnu maipha ei musah in,” a ci hi. Tua ciengin numei nu zong a opna munah pei-in a pasal tawh an ne tui dawnin a om a, a maisuo in da mai a puo nawn sih hi.

¹⁹ Zingmawngin amate thobai-in Topa mai-ah a bie uhi; tua ciengin Ramah-a a inn vuah amate a peikia uhi. Elkanah in a zi Hannah luppi a, Topa in ama a phawh hi.

²⁰ A hun a cin ciengin Hannah gai-in tapa khat nei hi. Ama in a min Samuel a phuoh hi, bangzieh ahei cile tua nu in, “Ama Topa tunga ka nget ahi hi,” a ci hi.

²¹ Elkanah le a innkuonpite zosie Topa tungah kumsim biehpiehna le a thuciemna pie dingin a kato uhi.

²² Ahi vangin Hannah a peito sih hi; bang ding ahei cile ama in a pasal kungah, “Naungeh in nawi a tan behin Topa opna-ah kilaa-in tua munah a op suoh zing thei nadingin ka zawpi ding hi; tawntunga nazir-in ama ka ap ding hi,” a ci hi.

²³ Ama’ pasal Elkanah in ama kungah, “Hoi na sah pen bangin bawl inlen, a nawi tan dong ngah in; Topa in a kammal hing kipsah taheh,” a ci hi. Tuaci’n numei nu omin nawi a tansah masangsie a tapa a khoi hi.

²⁴ Tua nu in nawi a tansah zaw ciengin, kum thum a pha bawngtang khat, annel ephah khat, le lenggazu savun thawl khat tawh ama a zawpito hi. Tua nu in Shiloh-a Topa’ inn ah ama peipi hi; tua naupang khangdawng lai hi.

²⁵ Tua ciengin amate in bawngtang go-in Eli kungah naupang a peipi uhi.

²⁶ Tua nu in, “Aw ka pupa! Nang a hingzing na hi ma bangin ka pupa aw, kei pen Topa tungah thungenin na opna tam sunga a ding numei ka hi hi.

²⁷ Tam naupang adingin thu ka nget ziehin Topa in ama tunga ka thungetna ei pie hi.

²⁸ Tua ahi ziehin ama pen Topa ka kawm zo hi. A hin laisie Topa tungah ama a kipie ahi ta hi,” a ci hi. Tua nu in khum munah Topa adingin ama a nuasie hi.