1 Kumpite 9 - Zo Bible

Solomon Kungah Pasien Kilahkia

¹ Solomon in Topa biehinn le kumpi inn lam zo ta a, a lam nop zosie a lam zaw ciengin,

² Gibeon-a ama kunga a kilahsa bangin Solomon tungah Topa a niveina kilah hi.

³ Topa in ama kungah, “Nangma in keima kunga na thungetna le na thumnate ka za zo hi; keima in tam na lamsa biehinn ka siensuo zo a, khum sungah keima’ min a tawntungin ka koi zo ta hi; khum mun ka mit suon den ding a, ka lungsim ka tengsah den ding hi.

⁴ Nangma na hi leh, ka mai-ah na pa David gamtat bangin lungsim citah le thutang tawh na gamtat a, kang thupieh zosie semin ka thukhamte le ka ngaina kipte na zui nah leh,

⁵ keima in na pa David kungah, ‘Israel kumpi topha tunga to ding mi na kitasam ngai sih ding hi,’ ci-a ka na ciemsa bangin Israel-te tungah na kumpi topha ka kipsah peisuoh ding hi.

⁶ Nangma na hi a, na tate ahi zongin, keima nei zuina uh panin pielmangin, na mai vua ka koi ka thupiehnate le ka thukhamte na zui sih vua, pasien dangte’ na a sem ding le a bie dingin na pei uleh,

⁷ keima in ka piehsa gam panin Israel ka notmang ding hi; tuale keima’ muna panin ka min dinga ka siensuosa tuami biehinn ka paimang ding a, mi zosie lahah Israel pen paunah le zakona-in kinei ding hi.

⁸ Tami biehinn buathah lom suohin a gei-a suoh kha zosie in datmaw-in a ehneh ho ding uhi; tuale amate in, ‘Bang dinga Topa in tami gam le tami biehinn tam banga a bawl tah lawm adiei?’ a ci ding uhi.

⁹ Tua ciengin amate in, “Egypt gam panin a pu a pate a peipi Topa a Pasien uh taisanin pasien dangte a pom vua, amate in tuate bie-in a na a seppieh zieh uh ahi hi; tua ahi ziehin amate tungah Topa in tam gimna a tunsah ahi hi,’ ci ding uhi,” a ci hi.

¹⁰ Solomon in inn nite, Topa’ biehinn le kumpi inn a lam zaw kum sawmni a cin kumin,

¹¹ Tyre Kumpipa Hiram in Solomon’ dei zaza taamtah sing, taa sing le khamte a sih zaw ciengin, Kumpi Solomon in Galilee gam sunga khuopi sawmni Hiram a pie hi.

¹² Hinanle Solomon’ pieh khuopite en dingin Tyre panin Hiram a zin ciengin tua teng in ama lungkimsah zo lo hi.

¹³ Tua ziehin ama in, “Ka sanggam aw, kei nei pieh tam khuopite bangci khuopi dan bep ahei?” a ci hi. Tuaci’n tuni dongin tuate Cabul gam kici hi.

¹⁴ Hizongle kumpipa tunga Hiram in a pieh kham talent zakhat le talent sawmni pha hi.

Solomon’ Nasep Adangte

¹⁵ Tam pen Topa’ biehinn, ama’ inn, Millo le Jerusalem kulpi, le Hazor, Megiddo, le Gezer-te lam nadinga Solomon in aana tawh a sepsah thalut teng tuotna ahi hi.

¹⁶ (Egypt kumpi Pharoah peito-in ama in Gezer la-in mei tawh haltum a, khuopi sunga teng Canaan-te thatin Solomon’ zi ahi ama’ moken dinga tua khuopi a pieh ahi hi;

¹⁷ tuaci’n Solomon in Gezer lamphakia hi). Bethhoron neinung pen

¹⁸ Baalath, le khum gamsung senel gamah Tamar,

¹⁹ le Solomon’ vankholna khuopite zosie, le leengte ading khuopite, sakol galkapte ading khuopite, le Jerusalem sung, Lebanon sung, le ama’ uhna gam sung zosie-ah zong Solomon in a lam nop popo a lam hi.

²⁰ Israel mi ahi lo Amor-te, Hit-te, Perez-te, Hiv-te, le Jebus-te sung panin a omlai mi zosie,

²¹ Israel-te in a tha sieng zo lo, tua gam sungah amau’ nua-a omlai a suonlehlahte, Solomon in thona aana sem dingin a lah ziehin tuni dongin tua bang ma-in a om uhi.

²² Hinanle Solomon in Israel-te salin a bawl sih hi; amate pen galkapte, ama’ uliente, ama’ galkapmangte, ama’ galkap bute, sakol leengte le sakol galkap uhte ahi uhi.

²³ Tam teng Solomon’ inn lam nasep a uh ulienpite ahi uhi: nasep a uh ulienpite mi zanga le sawmnga ahi hi.

²⁴ Ahi vangin David khuopi panin Solomon in ama dinga a lam a inn ah Pharaoh’ tanu a peito hi; tua ciengin ama in Millo a lam hi.

²⁵ Topa dinga Solomon in a lam maitam tungah meihal biehnate le thunuom biehpiehnate kum khatin thumvei pie a, ama in Topa mai-ah gimnamtui a hal hi. Tuaci’n ama in biehinn lam a man sieng hi.

Solomon Sumsui Nasepte

²⁶ Kumpi Solomon in Edom gam sung San Tuipi dunga om Eloth kici mun nai-a Ezion-geber ah tembaw honkhat a bawl hi.

²⁷ Hiram in tembaw honte tawh a nasemte, tuipi tung nasep a kiva tembaw nasemte, le Solomon’ nasemte tawh a sawl hi.

²⁸ Ophir ah amate pei-in tuatah panin kham talent zali le sawmni a puo vua, kumpi Solomon kungah tuate a peipi uhi.