1 Kumpite 4 - Zo Bible

Solomon’ Vaihawm Uliente

¹ Kumpi Solomon in Israel zosie tungah kumpi sem a,

² tuale tam teng pen ama’ vaihawm ulienpite ahi hi: Zadok’ tapa Azariah pen siempu ahi hi;

³ Shisha’ tapa Elihoreph le Ahijah-te pen thuvanpite ahi uhi; Ahilud’ tapa Jehoshaphat pen thuciemte ahi hi;

⁴ Jehoiada’ tapa Benaiah pen galkapmangpa ahi hi. Zadok le Abiathar-te pen siempute ahi uhi;

⁵ Nathan’ tapa Azariah pen uliente tunga nasep uh ahi hi; Nathan’ tapa Zabud pen siempu le kumpipa’ lawm ahi hi;

⁶ Ahishar pen kumpi inn uhpa ahi hi; Abda’ tapa Adoniram pen thona-aana nasemte uhpa ahi hi.

⁷ Israel mi zosie tungah Solomon in ulien sawm le ni nei a, tua teng in kumpipa le a innkuonte adingin anneh tuidawn a sih uhi; mi khat in kum khatin anneh tuidawn hla khat ta a sih ciet ding uh ahi hi.

⁸ Amau’ min pen: Ephraim muoltung gam sungah Ben-hur;

⁹ Makaz, Shaalbim, Beth-shemesh, le Elon-bethanan sungah Bendeker;

¹⁰ Arubboth ah Ben-hesed; (Socoh le Hepher gam zosie ama-a’ ahi hi);

¹¹ Naphath-dor gam zosie-ah Ben-abinadab; (ama in Solomon’ tanu Taphath zi-in nei hi);

¹² Taanach, Megiddo, le Jezreel’ nei lam Zarethan panga om Beth-shean gam zosie, le Beth-shean panin Abel-meholah dong, Jokmeam galkhat pang langkhat dongah Ahilud’ tapa Baana;

¹³ Rammoth-gilead sungah (ama in Gilead sunga om Manasseh’ tapa Jair’ khuoneute le Bashan sunga om Argob gam sung, kulpite le sumngo zawlte a nei khuopi lien sawmguh nei hi) ah Bengeber;

¹⁴ Mahanaim-ah Iddo’ tapa Ahinadab; Mahanaim khuo sungah;

¹⁵ Naphtali ah Ahimaaz: (ama in Solomon’ tanu Basemath zi-in la hi); Iddo’ tapa Ahinadab:

¹⁶ Asher le Bealoth ah Hushai’ tapa Baana;

¹⁷ Issachar-ah Paruah’ tapa Jehoshaphat;

¹⁸ Benjamin-ah Ela’ tapa Shimei;

¹⁹ Amor-te’ kumpi Sihon le Bashan kumpi Og gam ahi Gilead gam sungah Uri’ tapa Geber ahi hi. Judah gam sungah ulien khat a om hi.

Solomon’ Uhna Thupina

²⁰ Judah le Israel pen tuipi gei senel za-in a tam uhi; amate in a du a dei teng uh ne-in dawnin a lungdam uhi.

²¹ Solomon in Euphrates pan Philistia-te gam, Egypt gamgi nangawn dongah kumpi gam zosie a uh hi; amate in Solomon’ hin sung tungtawnin sieh le kaihte puohin a na a sem uhi.

²² Solomon’ nisiel anneh dingin annel cor sawm thum le annel cor sawmguh,

²³ bawngtang thau sawm, le lodawng tawh a kivathau bawng sawmni, tuu zakhat, sakhitangte, sazuhte, sanangte, le a vasa thaute kisim nai lo hi.

²⁴ Azieh pen ama in Euphrates nitumna lam gam zosie tawh Tiphsah panin Gaza cieng dong, Euphrates nitumna lampang kumpi zosie uh hi; ama’ kimvela zosie kilemin a om hi.

²⁵ Solomon hin sungin Judah le Israel pen lungmuongin a om a, mi zosie in Dan panin Beer-sheba cieng dong nangawnin a lenggui le a theiphungte uh uopin lungmuongtahin a teng uhi.

²⁶ Solomon in a sakol leengte dingin buh a nei ciet sakol tul sawmli le sakol tunga tuong mi tul sawm le tulni zong nei hi.

²⁷ Uliente in amau’ sih hla-in kumpi Solomon le kumpi Solomon’ sabuoi tunga ankuong a impi mi zosie’ neh ding a pie ciet uhi; amate bangma a kitasam sih uhi.

²⁸ Amau’ nasep ciet tawh kizui-in a kisapna munah sakol leengte le sakol taihatte anva nadingin mangbuham le butu zong a puoh uhi.

Solomon’ Pilna Kithang

²⁹ Pasien in Solomon tungah pilna tampi, thukhen siemna le tuipi gei senel za-a tam theina pie a,

³⁰ tuaci’n Solomon’ pilna in nisuona lam mi zosie’ pilna le Egypt pilna zosie a khupsin sieng hi.

³¹ Midangte sangin ama a pilzaw a, Ezrah-te Ethan, le Mahol’ tapa Heman, Calcol, le Darda te sangin zong a pilzaw lai hi; a kimvela minam zosie lahah a minthanna a kizel sieng hi.

³² Ama in paunah tul thum phuo a, a laphuo teng dawng tul le dawng nga pha hi.

³³ Ama in Lebanon-a taamtah a patin kulh tunga po hyssop dongin singkung lopate’ thu a gen hi; ama in ganhingte, vate, a bawhvate, le ngate’ thu zong gen hi.

³⁴ Solomon’ pilna thu ngai dingin minam zosie a pei uhi; ama’ pilna thu a zasa leitung kumpite zosie zong a pei uhi.