1 Kumpite 22 - Zo Bible

Aram Langah Judah tawh Kipawla Galsimna

¹ Aram le Israel-te kum thum sung gal kido loin a om uhi.

² Ahi vangin kum thum a cin kumin Israel kumpipa kungah Judah kumpi Jehoshaphat hawsuh hi.

³ Israel kumpipa in a nasemte kungah, “Ramoth-gilead khu ei-a’ ahi a, hizongle Aram kumpipa’ khut sung panin lahkia ding bangma i sawm lo lam na thei vuoi mah?” a ci hi.

⁴ Ama in Jehoshaphat kungah, “Ramoth-gilead ah gal do dingin i kuonton diei mah?” a ci hi. Jehoshaphat in Israel kumpipa dawng a, “Kei le nang a kibang i hi hi; ka mite nangma’ mi ahi a, ka sakolte nangma’ sakol ahi hi,” a ci hi.

⁵ Hinanle Jehoshaphat in Israel kumpipa kungah, “Topa thu dong masa phot in,” a ci hi.

⁶ Tua ciengin Israel kumpipa in kamsang zali bang khawmin amate kungah, “Ramoth-gilead sim dingin ka kuon diei, ahi sihle ka khawl zaw diei?” a ci hi. Amate in, “Kuonto in; azieh pen Topa in kumpipa’ khut sungah ang pie ding hi,” a ci uhi.

⁷ Hinanle Jehoshaphat in, “Tam sungah thu i dawh thei ding Topa’ kamsang adang koima khat beh om lo amah?” a ci hi.

⁸ Israel kumpipa in Jehoshaphat kungah, “Topa thu i dawh thei nading, Imlah’ tapa Micaiah a kici mi khat omlai hi; hizongle ama in ka thu a hoi lamin ei gen ngai sih a, gimna ding vive a gen den ziehin ama ka muda hi,” a ci hi. Jehoshaphat in, “Kumpipa in tua bangin thugen sin,” a ci hi.

⁹ Tua ciengin Israel kumpipa in ulien khat hlanin, “Imlah’ tapa Micaiah mallangin va hlan ta’n,” a ci hi.

¹⁰ Tua laitahin Samaria tunkot lutna ancilna phuola kumpi topha tungah Israel kumpipa le Judah Kumpipa Jehoshaphat to-in a kumpi puon utawh kizemin a om uhi; tuale kamsang zosie in ama gel mai-ah kam a sang uhi.

¹¹ Chenaanah’ tapa Zedekiah in ama adingin sia sakite bawlin, “Topa in tam bangin gen hi: amate pen tamte tawh amanthai dongin na sun ding hi,” a ci hi.

¹² Kamsang zosie in tua bang ma-in kam a sang vua, “Ramoth-gilead ah kuonto inlen guolzo in; Topa in kumpipa’ khut sungah ang pie ding hi,” a ci uhi.

Micaiah in Gallel ding Magen

¹³ Micaiah hlan dinga a kuon kamtaipa in ama kungah, “En in, kithukhatin kamsang teng’ thugen pen kumpipa adingin a hoi lam vive ahi hi. Nang in zong amate bangin a hoi lamin genpieh ta’n,” a ci hi.

¹⁴ Hizongnanle Micaiah in, “Topa a hing ahi ma bangin, Topa in ka kunga ang gen popo ka gen ding hi,” a ci hi.

¹⁵ Kumpipa kung a tun ciengin kumpipa in ama kungah, “Micaiah, Ramoth-gilead ah galsim dingin i kuon diei, ahi sihle i khawl tadi diei ?” a ci hi. Ama in zong dawng a, “Kuonto inlen va guolzo ta’n; Topa in kumpipa’ khut sungah ang pie ding hi,” a ci hi.

¹⁶ Hizongle kumpipa in ama kungah, “Topa’ minin keima kungah thu dang kici bangma gen loin thuman beh nang gen nadingin bangza vei hing kiciemsah ding ka hei?” a ci hi.

¹⁷ Tua ciengin Micaiah in, “Israel zosie tuucing a nei lo tuute bangin muoltung tengah a kithethang ka mu hi. Topa in, ‘Tam mite in pu a nei sih uhi; lungnuom tahin a inn ciet vuah pei uheh,’ ci hi,” a ci hi.

¹⁸ Israel kumpipa in Jehoshaphat kungah, “Ama in kei tungtang thu a hoi lamin khat mama zong ang gen sih ding a, gimna ding beh ang gen ding hi, ci thu na kungah kang gen tamal sih amah?” a ci hi.

¹⁹ Tua ciengin Micaiah in, “Tua ahi ziehin Topa’ thugen ngai in: Keima in a kumpi topha tungah Topa to-in, a ziet a vei-a a ding vantung mihonpi ka mu hi.

²⁰ Topa in, “Ramoth-gilead ah ama kato-in a si thei nadingin koi pen in Ahab va zawl ta ding ahei?’ a ci hi. Tua ciengin khat in thu khat genin adang khat in thudang khat gen a,

²¹ tuale Topa mai-ah hlagau khat pei-in ding a, ‘Keima’n va zawl ta vang,’ a ci hi.

²² Topa in, ‘Bang na ci zawl diei?’ ci-in ama dong hi. Ama in dawng a, “Keima pei-in a kamsangte zosie’ kam sungah zuouthei hlagau khat ka va hi ta ding hi,’ a ci hi. Tua ciengin Topa in, ‘Ama a va zawl ding na hi a, nangma in na zo ding hi; pei inlen va tuaci bawl ta’n,’ a ci hi.

²³ Tuaci’n nangma in en in, Topa in tami na kamsangte zosie’ kam sungah zuouthei hlagau khat koi zo ta hi; Topa in nangma dingin gimna na tuo ding a khensatsa ahi hi,” a ci hi.

²⁴ Tua ciengin Chenaanah’ tapa Zede-kiah in Micaiah zuonto-in phebeh a, “ Topa’ hlagau in nangma kunga thu ang gen dingin bang lampi tawh kei ei kalsan thei ahei?” a ci hi.

²⁵ Micaiah in dawngkia-in, “A kiphuol dingin innkhan sungtawngah na pei ni ciengin thei na vecin,” a ci hi.

²⁶ Tua ciengin Israel kumpipa in, “Micaiah man unlen khuopi uhpa Amon le kumpipa’ tapa Joash kungah puohkia ta un.

²⁷ Ama in, ‘Kumpipa in tam bangin gen hi: Thongah tam mipa khum unlen, lungnuom taha kang tunkia masangin an le tui na gieutausah un,” ci hi,’ va ci ta un,” a ci hi.

²⁸ Micaiah in, “Lungnuoma nang kilekia poma leh Topa in kei tungtawnin thu a gen lo hi taven,” a ci hi. Tuale ama in, “No teng zosie in na unpi-un za un!” a ci hi.

Ahab’ Gallelna le A Sina

²⁹ Tuaci’n Ramoth-gilead ah Israel kumpipa le Judah kumpi Jehoshaphat a kuonto uhi.

³⁰ Israel kumpipa in Jehoshaphat kungah, “Kei le kei mel kiselin gal sungah va kuon ta vang. Ahi vangin nang in na kumpi puonte sil in,” a ci hi. Tuaci’n Israel kumpipa in a mel selin gal sungah a kuon hi.

³¹ Tu-in Aram kumpipa in a leeng makai mi sawmthum le nite thupie a, “Milien hile, mineu hile koima tawh kido sih unlen, Israel kumpipa beh tawh kido un,” a ci hi.

³² Leeng makaite in Jehoshaphat a mu ciengun amate in, “Khum pa Israel kumpipa hi ngelngel ei,” a ci uhi. Tuaci’n ama tawh kido dingin a kihei pai uhi; tuale Jehoshaphat a kikozah pai hi.

³³ Leeng makaite in tuapa Israel kumpipa ahi lo lamtah a thei ciengun ama a nuadel na panun a kilekia uhi.

³⁴ Ahi vangin mi khat in a thal kuoi-in a mawh kap a, tuale thei khah lopi-in Israel kumpipa’ galhiem awmdal kikalah lutin ama a kha hi; tuaci’n ama in leenghawl pa kungah, “Kei liem zo ta ka hi ziehin kilekia inlen, gal sung panin ei puomang ta’n,” a ci hi.

³⁵ Khum ni-in gal kidona nasie mama a, kumpipa in Aram-te maingatin nitah a si dongin a leeng tungah a kingam hi; a liemma panin leeng dop lamah a sisan a luongsuh hi.

³⁶ Nitum kuon ciengin galkapte lahah tangtawhna khat om a, “Koipo ama’ khuopi ciet-ah, a koimapo ama gam ciet ah!” kici hi.

³⁷ Tuaci’n kumpipa si a, Samaria ah kipeipi hi; amate in Samaria ah kumpipa a vui uhi.

³⁸ Samaria buol gei-ah a leeng a sawp vua, Topa gensa kammal dung zui-in uite in a sisan liehtumin tua sungah numei pahtatte a kisil uhi.

³⁹ Tu-in Ahab’ gamtatna a omlai teng, a septe zosie, a saiha inn lamte, le ama’ na sat khuopi zosie, Israel Kumpite’ Khang Sutna Laibu sungah kigiel hi lo amah?

⁴⁰ Tuaci’n a pu a pate tawh Ahab lumton hi; tuale a tapa Ahaziah in ama’ za luo hi.

Judah ah Jehoshaphat Maang

⁴¹ Israel Kumpi Ahab a kum lina kumin Asa’ tapa Jehoshaphat in Judah uh ding a kipan hi.

⁴² Gam uh ding a kipatin Jehoshaphat kum sawmthum le nga pha a, kum sawmni le nga sung Jerusalem uh hi. A nu’ min pen Azubah ahi a, Shilhi’ tanu ahi hi.

⁴³ Ama in a pa Asa’ lampi zosie zui hi; tua lampi panin ama piel loin, Topa muna-ah a manin gamta hi; hinanle munsangte a kilamang sih a, munsangte tungah mite in siemthoi-in gimnamtuite a hal lai uhi.

⁴⁴ Jehoshaphat in Israel kumpipa tawh zong kilemna a bawl hi.

⁴⁵ Tu-in Jehoshaphat’ gamtatna a omlai teng, ama in a lah a thahatna, le a galdo dan, Judah Kumpite’ Khang Sutna Laibu sungah kigiel hi lo amah?

⁴⁶ Ama in a pa Asa’ hun lai-in gam sunga pasal pahtat omlai teng a that sieng hi.

⁴⁷ Edom ah kumpi om a, a khut nei-a pa khat in kumpi sem hi.

⁴⁸ Jehoshaphat in Ophir kham sui-in a pei nadingin Tarshish tembawte a bawl hi; ahi vangin Ezion-geber ah tembawte a kisiet ziehin amate a pei thei sih uhi.

⁴⁹ Tua ciengin Ahab’ tapa Ahaziah in Jehoshaphat kungah, “Tembawte tungah keima’ nasemte le nangma’ nasemte peitonsah in,” a ci hi, hinanle Jehoshaphat a nuom sih hi.

⁵⁰ A pu a pate tawh Jehoshaphat lumton hi; a tapa Jehoram in ama’ za luo hi.

Israel tungah Ahaziah Maang

⁵¹ Judah kumpi Jehoshaphat a maan kum sawm le sagina kumin Ahab’ tapa Ahaziah in Samaria panin Israel tungah maan ding kipan a, kum ni sung Israel tungah a maang hi.

⁵² Topa muna-ah ama siet gamtat a, a nu le a pa’ lampi le Israel a mawsah Nebat’ tapa Jeroboam’ lampi a zui hi.

⁵³ Ama in Baal’ na semin a bie hi; ama in a pa gamtat ma bangin Israel Pasien, Topa a lungthahsah hi.