1 Kumpite 2 - Zo Bible

Solomon Tunga David’ Thuhilna

¹ David a si ding hun a nai ciengin ama in tam bangin a tapa Solomon thu a vailhah hi:

² “Kei ka hi leh leitung mi zosiete’ peina lampi-ah a pei ding ka hi ta hi. Thakhauh inlen hangsan in.

³ Moses’ thukham sunga kigiel bangin Topa na Pasien’ thuhilnate kemcingin a lampite tawn inlen, a thukhamte, a thupiehte, a biehna ngainate, le a teci pannate zui siem in. Tua bangin bawl po lacin na sepna zosie le na kiheina zosie-ah na dau ang pei ding hi.

⁴ Tua ciengin keima tawh kisai-in ama in: ‘Na tapate in a lungsim zosie ule a hinna zosie utawh keima mai-ah thuman tahin gamtat ding a lim ngaisut nah po uleh Israel kumpi topha tunga to ding mi na kitasam ngai sih ding uhi,’ ci-in a thugenna Topa in a kipsah ding hi.

⁵ “Tua tham loin Zeruiah’ tapa Joab in keima ei bawlna, gal sunga a si mite’ phula kinei-in gal ven hun sunga a mawh tha Israel galkapmang ni, Ner’ tapa Abner le Jether’ tapa Amasa tunga a bawlnate ziehin, a kawnga kigah a kawngga le a kephanga a kedap tungah gal sunga sisan luong teng a tusah hi, ci zong na thei hi.

⁶ Tua ziehin na pilna tawh kizui-in sem inlen, a samkang tawh hlamuongin Leinei gamah ama peisuhsah sin.

⁷ Hizongle Gilead mi Barzillai’ tapate tungah thuman tahin gamta inlen, na sabuoi-a annete tawh ankuong imtonsah in; azieh pen na sanggampa Absalom kung panin ka tai lai-in tua bang thumanna tawh kei ei na bawl uhi.

⁸ Keima in Mahanaim ka zot ni-in a gimnei awsie tawh keima ei gausam, Bahurim pana ang pei Benjamin-te Gera’ tapa Shimei zong na kungah a om hi; ahi vangin kei ei dawn dingin Jordan ah ama ang pei lai-in ama tungah Topa’ min tawh ka kiciem a, ‘Namsau tawh nang kang that sih ding hi,’ ka ci hi.

⁹ Tua ahi ziehin ama maw nei lo bangin ngaisun tuon sin, azieh pen nang mi pil khat na hi hi; nang in ama na law dan ding na thei lel ding hi. A lu tunga a samkang khu sisan tawh Leinei gamah na peisuhsah hamtang ding hi,” a ci hi.

David’ Sina

¹⁰ Tua ciengin a pu a pate tawh David lumton a, David khuopi sungah ama kivui hi.

¹¹ Israel tungah David kum sawmli sung maang hi; Hebron ah ama kum sagi sung maang a, Jerusalem ah kum sawmthum le kum thum sung maang hi.

¹² Tuaci’n a pa David’ topha tungah Solomon a to hi; tuale ama’ kumpi gam kiptahin kiphut hi.

A Kumpigam Solomon in Phutdet

¹³ Tua ciengin Solomon’ nu Bathsheba kungah Haggith’ tapa Adonijah a va haw ta hi. Tua nu in, “Thunuom tawh ang haw na hiei mah?” a na ci hi. Ama in, “Thunuom tawh ang haw hi ma ing,” a ci hi.

¹⁴ Tua ciengin, “Nang kungah kamkhat kang gen thei diei mah?” a ci hi. Tua nu in, “Gen in,” a ci hi.

¹⁵ Ama in, “Tami kumpi gam kei-a’ ahi lamtah na thei hi. Israel zosie in kei a maang dingin ei lamen uhi; ahi vangin tam kumpi gam kihei-in ka sanggampa-a’ a suoh ta hi, bangzieh ahei cile tam thu pen Topa kung pan ahi hi.

¹⁶ Tuale tu-in nang tungah nget ding khat ka nei hi; ei hlaw malmal sin,” a ci hi. Tua nu in ama kungah, “Gen in,” a ci hi.

¹⁷ Ama in, “Hepina tawh ka zi dingin Kumpi Solomon kungah Shunem-te Abishag ei ngetpieh in. Ama in na thu ang niel sih ding hi,” a ci hi.

¹⁸ Bathsheba in, “Hoi mama hi; nangma tangin kumpipa kungah ka va gen ding hi,” a ci hi.

¹⁹ Tuaci’n Adonijah tangin ama tungah thu gen dingin Kumpi Solomon kungah Bathsheba a pei hi. Tua nu dawn dingin kumpipa ding a, tuale ama mai-ah a kun hi; tua ciengin a kumpi topha tungah ama to a, tuale kumpipa’ nu to nadingin kumpi topha khat lasahin ama’ zietlamah tua nu a to hi.

²⁰ Tua ciengin tua nu in, “Nang kungah thu neuno khat nget ding ka nei hi; ei hlaw sin,” a ci hi. Tuale kumpipa in tua nu kungah, “Na nget nop pen ngen in, ka nu aw; kang hlaw sih ding hi,” a ci hi.

²¹ Ama in, “Na sanggampa Adonijah zi dingin Shunem-te Abishag pie in,” a ci hi.

²² Solomon kumpipa in a nu dawng a, “Bang zieha Adonijah zi dinga Abishag nang nget ahiei? Ama adingin kumpi gam zong ngetpieh vet ve! Azieh pen ama ka upa ahi hi; ama ding beh ngen sinlen siempu Abiathar le Zeruiah’ tapa Joab ading zong ngetpieh vet ve!” a ci hi.

²³ Tua ciengin Topa’ minin Kumpi Solomon kiciem a, “Adonijah in tam thu gel zo ahi ziehin ama’ hinna in a sawn sih tah ma leh Pasien in keima ei dawm sih taheh!

²⁴ Tua ahi ziehin tu-in kei ei sudetin ka pa David’ kumpi topha tungah ei koi a, ama’ ciemsa bangin keima tung le ka suon ka hlahte tungah kumpi gam ei pie Topa a hing ahi ma bangin tuni-in Adonijah kithat ding hi,” a ci hi.

²⁵ Tuaci’n Kumpi Solomon in Jehoiada’ tapa Benaiah a sawl hi. Ama in tua pa satlia-in a si hi.

²⁶ Kumpipa in siempu Abiathar kungah, “Na gam ahi Anathoth ah kipei ta’n; azieh pen nang zong a si dinga kilawm na hi hi. Ahi vangin ka pa mai-ah Topa Pasien’ singkuong na puohpiehna le ka pa thuoh gentheina zosie na thuohpi ziehin tu tadi-in kang that sih ding hi,” a ci hi.

²⁷ Tuaci’n Solomon in Topa’ siempu ahina panin Abiathar khawlsah a, Topa in Shiloh-ah Eli innkuon tawh kisai a gen thute tua bangin tungsah hi.

²⁸ Joab in Absalom a panpi sih vangin Adonijah a panpi na thu Joab tungah thu tha a tun ciengin Topa’ puonbuh sungah Joab tai pai a, maitam kite a tupom hi.

²⁹ Kumpi Solomon kungah, “Topa’ puonbuh sungah Joab tai-in tu-in maitam pangah om hi,” ci-in a kigen ciengin Solomon in Jehoiada’ tapa Benaiah sawl a, “Va pei-in ama va satlia ta’n,” a ci hi.

³⁰ Tuaci’n Topa’ puonbuh sungah Benaiah pei-in ama kungah, “Kumpipa in thu ei pie a, ‘Hing pusuoh heh,’ ci hi,” a ci hi. Hizongle ama in, “Hi lo hi, tam sungah ka sizaw ding hi,” a ci hi. Tua ciengin Benaiah in kumpipa tungah thu tutkia a, “Joab in tam bangin thu gen a, tam bangin ei dawng hi,” a ci hi.

³¹ Kumpipa in dawngkia a, “Ama gensa bangin ama va satlia inlen hing vui ta’n; a thu om lopi-in Joab in sisan a luonsah mawna pen keima le ka pa’ innkuon tung panin tua bangin la dawh ta’n.

³² Topa in ama’ sisan luonsahna pen ama’ lu tung ma-ah a tusahkia ding hi. Azieh pen ka pa David’ thei lo kalin ama in ama sanga a thumanzaw le a hoizaw mi ni, Israel galkapmang Ner’ tapa Abner le Judah galkapmang Jether’ tapa Amasa a busim a, namsau tawh that hi.

³³ Tuaci’n Joab’ luzang le a suon a hlahte’ lu zangah a tawntungin ama gel’ sisan ang tungkia ding hi; ahi vangin David tung, a suon a hlahte tung, ama’ innkuon tung, le ama’ kumpi topha tungah Topa kung panin nopna om zing ding hi,” a ci hi.

³⁴ Tua ciengin Jehoiada’ tapa Benaiah kuonto a, ama satin that hi; tuale gamlaha a inn ah ama kivui hi.

³⁵ Kumpipa in Joab tangin galkapmang dingin Jehoiada’ tapa Benaiah koi a, Abiathar tangin siempu Zadok koi hi.

³⁶ Tua ciengin kumpipa in mi sawlin Shimei hlansahin ama kungah, “Nangma dingin Jerusalem ah inn khat lamin tuanah teng inlen, tua panin heima sung kal nawn sin.

³⁷ Bangzieh ahei cile na pei-a Kidron Lui na galkai ni ni-in a si valon ding na hi lam kithei pai in; nangma’ sisan nangma’ lu tungah a tu ding hi,” a ci hi.

³⁸ Shimei in kumpipa kungah, “Thukhenna a dih hi; ka pu kumpipa gensa bangin na nasempa gamta ding hi,” a ci hi. Tuaci’n Jerusalem ah ni tampi sung Shimei a teng hi.

³⁹ Ahi vangin kum thum zaw ciengin Gath Kumpipa Maacah’ tapa Achish kungah Shimei’ nasemte ni a tai uhi. Shimei kungah, “Gath ah na nasemte om hi,” ci-in a kigen ciengin

⁴⁰ Shimei ding pai a, laa phaw pha-in a silate sui dingin Gath-a Achish kungah a pei hi; Shimei pei-in Gath panin a silate a peipikia hi.

⁴¹ Jerusalem panin Gath ah Shimei pei-in a kilekia lam Solomon kungah a kigen ciengin

⁴² kumpipa in mi sawlin Shimei hlansahin ama kungah, “Topa tawh kang kiciemsah a, ‘Nang pusuohin mun khat popo-ah na pei ni ni-in a si ding na hi lam thei valon in,’ ci-in lipkhap tahin hing gen hi lo ka mah? Nangma in keima kungah, ‘Tua thukhenna dih hi; ka sang hi,’ nei ci hi.

⁴³ Tua bang hi napi bang dingin Topa tungah na kiciemna palsatin kang thupiehte zui lo na hei?” a ci hi.

⁴⁴ Kumpipa in Shimei kungah, “Ka pa tunga sietna na bawl zosie na lungsim sungah a unpi-in na thei hi; tuaci’n Topa in na gamtat sietna teng nangma lu tungah ang tusahkia ding hi.

⁴⁵ Ahi vangin Kumpi Solomon in thupha nga ding a, Topa mai-ah David’ kumpi topha kisudet tawntung ding hi,” a ci hi.

⁴⁶ Tua ciengin kumpipa in Jehoiada’ tapa Benaiah thu a pie hi; tuale ama pei-in Shimei sat hi, tuale ama a si hi. Tuaci’n Solomon’ khut sungah kumpi gam kikipsah hi.