1 Kumpite 16 - Zo Bible

¹ Baasha langpangin Hanani’ tapa Jehu tungah Topa’ thu tung a,

² “Keima in leivui panin nang kang domsang a, ka mi Israel tungah makai-a kang koi hi napi, nang in Jeroboam’ lampi ma zui-in ka mi Israel na mawsah a, a mawna utawh ka thangpai nadingin kei nei kuontaw hi.

³ Tua ahi ziehin keima in Baasha le a innkuon ka phietmang ding a, Nebat’ tapa Jeroboam’ innkuon bangin nangma’ innkuon ka bawl ding hi.

⁴ Baasha-a’ ahi khuopi sunga a si popo uite in ne ding hi; tuale ama-a’ ahi gamlaha a si popo vana leng vate in ne ding hi,” a ci hi.

⁵ Tu-in Baasha’ gamtatna a omlai teng, a septe, le a thahatna, Israel Kumpite’ Khang Sutna Laibu sungah kigiel hi lo amah?

⁶ A pu a pate tawh Baasha lumton a, Tirzah ah ama kivui hi; tuale a tapa Elah in ama’ za luo hi.

⁷ Tua tham loin Jeroboam innkuon tawh kibangin Topa muna-ah a sie lama a gamtatna zosie zieh le ama’ khuta a nasepna tawh ama thangpai sahin Jeroboam le a innkuonte a suhsiet ziehin, Hanani’ tapa kamsangpa Jehu tungtawnin Baasha le a innkuonte langkhatah Topa’ thu a tung hi.

Elah in Israel Uh

⁸ Judah Kumpi Asa’ kum sawmni le guhna kumin Baasha’ tapa Elah in Tirzah ah Israel tunga maan ding kipan a, ama kum ni sung maang hi.

⁹ Hinanle sakol leeng alang a uhpa a nasem Zimri in ama a sawmsim hi. Tirzah-a kumpi innsung a uhpa Arza’ inn ah zukhamin Tirzah ah ama a op laitah,

¹⁰ Judah Kumpi Asa’ kum sawmni le sagina kumin Zimri pei-in satpuo a, ama thatin ama’ za luo hi.

¹¹ Ama in uh ding a kipat a kumpi topha tunga a to zaw behin Baasha’ innkuonte a unpi-in that hi; ama in a tanaute pasal khat beh ahi a, a guolte ahi zongin khat zong hingkhawi lo hi.

¹² Kamsangpa Jehu tungtawnin Baasha langah Topa’ kammal omsa dung zui-in Zimri in Baasha’ innkuonte zosie tua bangin a susie hi.

¹³ Azieh pen Baasha le a tapa Elah’ bawlsa mawnate ziehin Israel khielsahin, a milimte utawh Israel Pasien Topa a lungthahsah zieh uh ahi hi.

¹⁴ Tu-in Elah’ gamtatna a omlai teng, le a sep zosie,Israel Kumpite’ Khang Sutna Laibu sungah kigel hi lo amah?

Kumpigui Thumna: Zimri in Israel Uh

¹⁵ Judah Kumpi Asa’ kum sawmni le sagina kumin Zimri in Tirzah ah ni sagi sung uh hi. Tua ciengin Philistia-te-a’ ahi Gibbethon sim dingin galkapte in giephuol a sat vua,

¹⁶ tuale giephuol a sat galkapte in, “Zimri in sawmsimin kumpipa that zo hi,” ci thu a za uhi; tua ziehin Israel zosie in khum ni-in giephuol-ah galkapmang Omri Israel kumpi ahisah uhi.

¹⁷ Tuaci’n Gibbethon panin Omri le a ompi Israel zosie kuonto-in Tirzah a kui-im uhi.

¹⁸ Zimri in tua khuopi a kilah zo lam a mu ciengin kumpi’ inndan kulpi sungah lutin kumpipa’ inn tawh mei-in kihaltha-in a si hi.

¹⁹ Tua banga a kibawlna pen a bawlsa ama’ mawnnate, Topa muna-ah a siet gamtatna, Jeroboam’ pienzie a zuina, a bawlsa a mawna, le Israel in mawna a bawlsahna zieh ahi hi.

²⁰ Tu-in Zimri’ gamtatna a omlai teng, le a mi sawmdapnate, Israel Kumpite’ Khang Sutna Laibu sungah kigiel hi lo amah?

Kumpigui Lina: Omri in Israel Uh

²¹ Tua ciengin Israel mite pawl ni-in a kikhen uhi; mipi alang in kumpi sem dingin Ginath’ tapa Tibni zui-a, alang in Omri a zui hi.

²² Hinanle Omri’ nuazuite in Ginath’ tapa Tibni nuazuite a zo zaw uhi; tuale Tibni si-in Omri kumpi a suoh hi.

²³ Judah Kumpi Asa’ kum sawmthum le khatna kumin Israel-te tunga maan ding kipan hi; ama kum sawm le ni sung maang a, Tirzah ah kum guh sung maang hi.

Samaria Khuopi Tha

²⁴ Ama in Shemer kung panin ngun talent ni tawh Samaria muol a lei hi; ama in kul tawh tua muol im a, tua muol a nei pa Shemar’ min tapin a lamsa khuopi min Samaria phuoh hi.

²⁵ Topa muna-ah Omri a sie-in gamta hi; ama mai-a mi zosie sangin a sie zaw-in ama a gamta hi.

²⁶ Azieh pen Nebat’ tapa Jeroboam’ tot lampi zosie, le Israel a khielsah a mawnate, a milimte utawh Israel Pasien, Topa a thangpaisahna uh a zui hi.

²⁷ Tu-in Omri’ nasep a omlai teng, le a thahatna lahna, Israel Kumpite’ Khang Sutna Laibu sungah kigiel hi lo amah?

²⁸ A pu a pate tawh Omri lumton hi; tuale Samaria ah ama kivui hi; a tapa Ahab in ama’ za luo hi.

Ahab in Israel Uh

²⁹ Judah Kumpi Asa’ kum sawmthum le gietna kumin Omri’ tapa Ahab in Israel tungah maan ding kipan a, Samaria ah kum sawmli sung Israel tungah maang hi.

³⁰ Omri’ tapa Ahab in ama’ mai-a mi zosie sangin Topa muna-ah a sie zaw-in a gamta hi.

Jezebel tawh Ahab Kinungin Baal Bie

³¹ Ama adingin Nebat’ tapa Jeroboam’ mawnate zui ding pen a bai tawh a kibah ma bangin, ama in Sidon-te’ Kumpi Ethbaal’ tanu Jezebel zi-in la a, ama pei-in Baal’ na semin bie hi.

³² Ama in Samaria-a a lam Baal inn sungah Baal adingin maitam khat phut hi.

³³ Ahab in zong khuom siengtho khat bawl a, Ahab in ama’ masanga Israel kumpi zosie sangin Israel Pasien, Topa thangpai nading tam a bawlzaw hi.

³⁴ Ama hun lai-in Bethel-te Hiel in Jericho a sat hi. tuale Topa in Nun’ tapa Joshua tungah a gensa dung zui-in, a tacil Abiram tanlaw liengin ama in khuombul na phut a, a tapa tumpen Segub tanlaw-in a khuo kotpite na phut hi.