1 Kumpite 15 - Zo Bible

Abijam in Judah Uh: Milim Biehna le Gal Kisimna

¹ Tu-in Nebat’ tapa Kumpi Jeroboam’ kum sawm le gietna kumin Abijam in Judah gam uh ding kipan hi.

² Ama in kum thum sung Jerusalem uh hi. Ama’ nu min Maacah ahi a, Abishalom’ tanu ahi hi.

³ A pa in ama mai-a a na bawl mawna zosie ama in zong a bawl hi. A pa David’ lungtang puoh bangin Topa a Pasien tungah a lungtang a thuman zo sih hi.

⁴ Ahi vangin Topa a Pasien in David ziehin Jerusalem-ah ama meivah khat pie a, ama’ nua-ah tapa khat koi-in Jerusalem a sukip hi;

⁵ bangzieh ahei cile Hit mi Uriah tungtang khat ci simlo Topa muna-ah David a dihin gamta a, a hin sung tungtawnin a thupieh khat popo panin ama piel lo hi.

⁶ A hin sung tungtawnin Rehoboam le Jeroboam kikalah gal kidona a om zing hi.

⁷ Abijam gamtatna a omlai teng le a sep zosie, Judah Kumpite’ Khang Sutna Laibu sungah kigiel hi lo amah? Abijam le Jeroboam kikalah gal kidona a om hi.

⁸ A pu a pate tawh Abijam lumton a, David khuopi sungah ama kivui hi. Tua ciengin a tapa Asa in ama’ za luo hi.

Asa in Kumpi Sem

⁹ Israel kumpi Jeroboam’ kum sawmni na kumin Asa in Judah gamah maan ding kipan hi;

¹⁰ ama kum sawmli le khat sung Jerusalem ah maang hi. A pi’ min Maacah ahi a, Abishalom’ tanu ahi hi.

¹¹ A pupi David gamtat bangin Topa muna-ah Asa a dihin a gamta hi.

¹² Ama in gam sung panin pasal pahtat zosie sumangin a pu a pate bawlsa milim zosie paimang sieng hi.

¹³ Tua nu in Asherah adingin a huothuoi milim khat a bawl ziehin kumpinu hina panin a pi Maacah zong a hemkhie hi; Asa in tua nu’ milim tuntanin Kidron Lui-ah a haltum hi.

¹⁴ Ahi vangin munsangte a kihemkhie sih hi. Hizongle ama a hin sung tungtawnin Topa tungah Asa’ lungtang a thuman hi.

¹⁵ Ama in Topa’ inn sungah a pa kiciemna letsongte le ama’ kiciemna letsongte - ngun, kham, le um le beelte a peipi hi.

Aram tawh Kipawlin Israel Do

¹⁶ Amate khan hun sung tungtawnin Asa le Israel kumpi Baasha kikalah gal kisimna a om hi.

¹⁷ Judah sim dingin Israel kumpi Baasha kuonto a, Judah Kumpi Asa kung panin koima a sungtum le a pusuoh a om thei lo nadingin Ramah khuo a lam hi.

¹⁸ Tua ciengin Asa in Topa’ inn sunga goute le kumpipa’ inn sunga kinuasie goute la-in a nasemte khut sungah a pie hi. Kumpi Asa in Damascus-a teng, Aram kumpipa, Hezion’ tapa Tabrimmon, a tapa Ben-hadad kungah tuate puoh a,

¹⁹ “Ka pa le na pa ma bangin keima le nangma kikalah kipawlna khat omsah vai: Nangma kungah ngun le kham letsong kang puoh hi; kei kung panin ama a nuakin thei nadingin pei inlen Israel kumpi Baasha tawh na kipawlna va sutat ta’n,” a ci hi.

²⁰ Benhadad in kumpi Asa’ thugen mang a, Israel khuopite sim dingin a galkap uliente sawlin, Ijon, Dan, Abel-bethmaacah, le Chinneroth zosie, Naphtali gam zosie tawh a zo sieng hi.

²¹ Baasha in tua thu a zah ciengin Ramah lam dinkhawl a, Tirzah ah a teng hi.

²² Tua ciengin kumpi Asa in Judah gam sung zosie-ah koima a pelem om loin tangtawhna khat a bawl hi: Amate in Baasha in khuo lamna-a a zah Ramah-a sing le suongte a nawn sieng uhi; tuate tawh Kumpi Asa in Benjamin-te’ khuo Giba le Mizpah a lam hi.

²³ Tu-in Asa’ gamtatna a omlai teng, a thahatna zosie, a sep zosie, le a lam khuopite, Judah Kumpite’ Khang Sutna Laibu sungah kigiel hi lo amah? Ahi vangin ama a vuoi ciengin a kengah natna a nei hi.

²⁴ Tua ciengin a pu a pate tawh Asa lumton a, a pupi David khuopi sungah a pu a pate tawh ama kivui hi; a tapa Jehoshaphat in ama’ za luo hi.

Israel-ah Nadab in Kumpi Sem

²⁵ Judah kumpi Asa’ kum nina kumin Jeroboam’ tapa Nadab in Israel tunga maan ding kipan a, Israel ah kum ni sung maang hi.

²⁶ Topa’ muna-ah ama siet gamtat a, a pu a pate’ lampi ma zui-in Israel mawna a bawlsah hi.

²⁷ Issachar innkuon Ahijah’ tapa Baasha in ama sawmsim hi; tuale Baasha in Philistia-te’ khuo Gibbethon ah ama a satlia hi; azieh pen Nadab le Israel zosie in Gibbethon khuopi a busim laitah uh ahi hi.

²⁸ Tuaci’n Judah kumpi Asa’ kum thumna kumin Baasha in Nadab that a, ama in Nadab’ za luo hi.

²⁹ Ama kumpi ahi zaw behin Jeroboam’ innkuon zosie that hi; Topa in Shilon-te a nasempa Ahijah’ tungtawna a gensa dung zui-in a unpi-in a suhsiet dongin ama in Jeroboam’ innkuon ah mi khat zong hen lo hi.

³⁰ Tua khu ama’ mawna le Israel a mawsahna ahi Jeroboam’ mawnate zieh le Israel Pasien Topa a thangpaisahna zieh ahi hi.

³¹ Tu-in Nadab’ gamtatna a omlai teng, le a sep zosie, a unpi-in Israel Kumpite’ Khang Sutna Laibu sungah kigiel hi lo amah?

³² A hin sung tungtawnun Asa le Israel kumpi Baasha kikalah gal kidona a om hi.

Kumpigui A Nina: Israel’ Tungah Baasha in Kumpi Sem

³³ Judah kumpipa Asa’ kum thumna kumin Ahijah’ tapa Baasha in Tirzah-a Israel zosie sunga maan ding a kipan hi.

³⁴ Topa muna-ah ama siet gamtat a, Jeroboam’ zui lampi le Israel a khielsah ama mawna ma a zui hi.