1 Kumpite 14 - Zo Bible

Jeroboam’ Innkuon Tunga Thukhenna

¹ Khum hun laitahin Jeroboam’ tapa Abijah a cina hi.

² Jero-boam in a zi kungah, “Pei inlen, Jeroboam’ zi na hi lam ang kithei lo nadingin na mel kisel inlen, Shiloh ah va haw ta’n; azieh pen tam mite tungah kumpi ka hi nadingin keima kunga thu ang gen kamsangpa Ahijah khum sungah a om hi.

³ Anlum sawm, moh halkhat le khuoizu thawl khat kengin khum pa kungah va haw ta’n; ama in naupang tunga a pieng ding thu na kungah ang gen ding hi,” a ci hi.

⁴ Tua bang ma-in Jeroboam’ zi a gamta hi; ama kithawi-in Shiloh lam zuon a, Ahijah’ inn a tung hi. Tua hunin a kum tam ziehin Ahijah a mit mangin khuo mu thei lo hi.

⁵ Ahi vangin Topa in Ahijah kungah, “A tapa tungtang nang thu ang dong dingin Jeroboam’ zi ang pei hi; azieh pen a tapa a cina hi. Nangma in tua nu kungah tua bang tua bangin na gen ding hi,” a ci hi. Tua nu a tun ciengin numei dang khat a kipang hi.

⁶ Ahi vangin Ahijah in tua nu kotbieng a gei laitah a keng gin a zah ciengin ama in, “Hing lut in, Jeroboam zi aw; bang dinga midang khat kipang na hei? Nang adingin thu hamsa khat ei kiguon hi.

⁷ Pei inlen Jeroboam kungah gen in, ‘Israel Pasien, Topa in tam bangin gen hi: Mite lah panin nangma hing domsangin ka mi Israel tungah makai-in kang bawl a,

⁸ tuale David’ innkuonte panin kumpi gam balkehin nangma tungah kang pie hi; hinanle ka thupiehnate kemcingin a lungsim zosie tawh keima ei zui-in, ka muna-ah thuman beh tawh a gamta ka nasempa David tawh na kibang sih a,

⁹ na mai-a om mi zosie sangin a sie zaw-in na gamta zo a, vahmangin nang adingin pasien dangte le a kisung milimte na bawl ziehin kei nei lungthahsah a, na nua lam sena-in keima nei nei hi;

¹⁰ tua ahi ziehin mi khat in a tumvam dongin bawng-eh a halvam bangin keima in Jeroboam’ innkuon tungah sietna tungsahin, Jeroboam innkuon panin Israel gama om sal hile, a suohta mi hile, pasal zosie sumangin ka that ding hi.

¹¹ Jeroboam’ mi, khuopi sunga a si popo a sa uite in ne ding hi; tuale gamlaha a si popo vana a leng vate in ne ding hi; azieh pen Topa in gen zo hi,” a ci hi.

¹² Tua ahi ziehin ding inlen na inn lamah pei in. Na keng tawh khuopi sung na tot ciengin tua naupang pa a si ding hi.

¹³ Israel zosie in ama kaa-in a vui ding uhi; bangzieh ahei cile Jeroboam innkuon sung panin Israel Pasien Topa a lungkimsahna thu ama tungah themkhat a kimu ziehin Jeroboam innkuon sung panin ama beh hanah kivui ding hi.

¹⁴ Tua tham loin tu nangawnin zong Topa in Israel tungah ama adingin kumpi khat a khangsah ding hi.

¹⁵ “Tui sunga pumpeng a kithin bangin Topa in Israel a vat ding hi; ama in a pu a pate tunga a pieh tam gamhoi panin Israel phungkal ding a, Euphrates galkhatah a thezah ding hi. Bang ding ahei cile amate in a khuom siengthote uh bawlin Topa lungthahsah uhi.

¹⁶ Jeroboam’ mawnate le Israel-te a bawlsah mawnate ziehin ama in Israel nuasie ding hi,” a ci hi.

¹⁷ Tua ciengin Jeroboam’ zi tho-in pei a, Tirzah ah a tung hi. Tua nu a inn sangkil a tun laitahin tua naupang a si hi.

¹⁸ A nasem kamsangpa Ahijah tungtawnin Topa’ thugenna tawh kizui-in Israel zosie in ama kaa-in a vui uhi.

Jeroboam’ Sina

¹⁹ Tu-in Jeroboam’ gamtatna omlai teng, a galdona le a gam uhnate, Israel Kumpite’ Khanggui Sutna Laibu sungah kigiel hi.

²⁰ Jeroboam’ maan hun sung kum sawmni le ni ahi hi; tua ciengin a pu a pate tawh ama lumton a, a tapa Nadad in ama’ za luo hi.

Rehoboam in Judah Uh

²¹ Tu-in Solomon’ tapa Rehoboam in Judah uh hi. Gam a uh patin Rehoboam kum sawmli le khat pha a, ama’ min koi nadinga Topa in Israel minam zosie sung pana a teel khuopi Jerusalem-ah kum sawm le sagi sung uh hi. A nu’ min Naamah ahi a, Ammon-te ahi hi.

²² Topa’ muna-ah Judah in sietna bawl hi; a pu a pate bawl zosie sangin a tam zaw-in amau’ mawnate tawh ama hazatna dingin a bawl uhi.

²³ Azieh pen amate in amate dingin munsangte, biehna songte, khuom siengthote, muolsang zosie le singna dawng zosie tengah khuom siengthote a phut uhi;

²⁴ tua gam sungah pasal pahtatte zong a om hi. Topa in Israel-te mai-a a delmangsa ahi a kidahhuoi minamte gamtatnate bangin amate a gamta uhi.

²⁵ Kumpi Rehoboam’ a kum ngana kumin Jerusalem sim dingin Egypt kumpi Shishak a kuonto hi;

²⁶ ama in Topa’ biehinn sunga goute le kumpipa’ inn sunga goute a unpi-in a tomgam a, Solomon’ bawlsa kham lumte zong a la hi;

²⁷ tuaci’n Kumpi Rehoboam in tua teng tangin sumngo awmphawte bawlin kumpi inn kotcing ahi inncing uliente khut sungah tuate ap hi.

²⁸ Topa’ biehinn sungah kumpipa a pei sielin inncingte in tuate puo-in inncinna khan sungah a koikia uhi.

²⁹ Tu-in Rehoboam’ gamtatna a omlai teng, a sep zosie, Judah Kumpite’ Khang Sutna Laibu sungah kigiel hi lo amah?

³⁰ Rehoboam le Jeroboam kikalah gal kidona om ngitnget hi.

³¹ A pu a pate tawh Rehoboam lumtonin David khuopi ah a pu a pate tawh kivuiton hi. A nu’ min Naamah ahi a, Ammon-te ahi hi. A tapa Abijam in ama’ za luo hi.