1 Kumpite 13 - Zo BibleJudah Pana Pasien’ Mipa 1 Gimnamtui hal dingin maitam gei-ah Jeroboam a din laitahin, Topa’ thu tawh Judah panin Bethel ah Pasien’ mipa khat a tung hi. 2 Pasien’ mipa in Topa’ thu tawh maitam lang khatah kikozah a, “Maitam, maitam aw, Topa in tam bangin gen hi: ‘David’ innkuon panin Josiah min nei tapa khat ang suoh ding hi; tuale ama in gimnamtui a hal, munsang tunga om siempute nangma tungah siem thoina-in ang pie ding a, mihing’ gute nangma tungah kihal ding hi,’ ci hi,” a ci hi. 3 Khum ni ma-in ama in lim khat pie a, “Tami khu Topa in a gensa lim ahi hi: ‘Maitam kiphelkhe ding a, a tunga om vutvamte kithezah ding hi,’ ci hi,” a ci hi. 4 Kumpipa in Bethel ah maitam a langpan Pasien’ mipa thugen a zah ciengin maitam panin Jeroboam in a khut a zah kawmin, “Ama man un,” ci hi. Ahi vangin ama lama a zah a khut gawta-in a nuadaw thei ta sih hi. 5 Topa’ thu tawh Pasien’ mipa in lim khat a piehna tawh kizui-in maitam zong kiphelkhe-in maitam panin vutvamte kithezah hi. 6 Kumpipa in Pasien’ mipa kungah, “Ka khut a ngai a bah thei nadingin tu-in kei dingin thu ei ngetpieh inlen, Topa na Pasien’ maipha ka nga thei nadingin zong ei thumpieh in,” a ci hi. Tuaci’n Pasien’ mipa in Topa tungah a thumpieh hi; tuale kumpipa’ khut damin a ngai bangkia hi. 7 Tua ciengin kumpipa in Pasien’ mipa kungah, “Innah ei zui inlen an neton vai, keima in letsong khat hing pie vang,” a ci hi. 8 Hizongle Pasien’ mipa in kumpipa kungah, “Na kumpi gam phal khat ei hawm nan lacin na inn ah kang haw sih ding hi; khum munah an zong ne loin tui zong ka dawn sih ding hi. 9 Bangzieh ahei cile Topa in tam bangin kei thu ei pie hi: An ne loin tuisih zong na dawn sih ding a, na peina lampi zui-in na kilekia sih ding hi,’ ei ci hi,” a ci hi. 10 Tuaci’n ama lampi dangah pei a, Bethel ah ang peina lampi zui-in a kilekia ta sih hi. 11 Bethel ah khum hun lai-in kam sang puvuoi khat a teng hi. A tapate khat pei-in khum ni-a Pasien’ mipa in Bethel ah a sepsa thu teng ama kungah a gen hi; ama in kumpipa kunga a gen thute zong a pa uh kungah a gen uhi. 12 A pa un amate kungah, “Ama hei lamah a pei ta e?” a ci hi. A tapate in Judah gam pana Pasien’ mipa peina lampi a lah uhi. 13 Tua ciengin ama in a tapate kungah, “Kei ading laa khat a topha ei vawpieh un,” a ci hi. Tuaci’n amate in laa khat a topha a vaw vua, laa tungah ama a tuong hi. 14 Ama in Pasien’ mipa nuadel a, gangpi sing nei khatah a to laitah a mu hi. Ama in khumpa kungah, “Judah gam pana ang pei Pasien’ mipa kici nang na hiei mah?” a ci hi. Ama in, “Ka hi hi,” ci-in a dawng hi. 15 Tua ciengin ama in tua pa kungah, “Ka inn ah ei zui inlen an hing ne ta’n,” a ci hi. 16 Hizongle ama in, “Nang tawh kang kilekia thei sih ding a, na inn sungah zong kang lut thei sih ding hi; tam munah zong nang tawh an ka ne sih ding a, tui zong ka dawn sih ding hi. 17 Bangzieh ahei cile keima kungah Topa in tam bangin gen hi: ‘Khum munah an zong ne loin tui zong na dawn sih ding a, na peina lampi lamah nang kilekia sih ding hi,’ ei ci hi,” a ci hi. 18 Tua ciengin adang khat in ama kungah, “Kei zong nang banga kamsang khat ka hi a, Topa’ thu tawh vantungmi khat in ka kungah thu ang gen a, “An ne ding le tui dawn dingin na inn ah ama hing zawpikia in,’ ei ci hi,” a ci hi. Ahi vangin ama in khumpa a sol ahi bo hi. 19 Tua ciengin ama tawh Pasien’ mipa kilekia-in a inn ah an ne-in tui a dawn hi. 20 Sabuoi-ah ama gel a to laitahin ama a zawpikia kamsangpa kungah Topa’ thu a tung hi; 21 tuale Judah gam pana a pei Pasien’ mipa kungah ama kiko-in, “Topa in tam bangin gen hi: Nang in Topa’ thugen mang loin Topa na Pasien in na kunga ang gensa thupiehna na zui sih a, 22 ahi vangin ama in na kungah, ‘An ne sinlen tui dawn sin,’ ang cina munah kilekia-in an ne-in tui dawn na hi ziehin na pu na pate’ hanah na luonghawm kivui lo ding hi,” a ci hi. 23 Pasien’ mipa in an ne-in tui a dawn zaw ciengin amate in a zawpikia uh ahi kamsangpa’ laa phaw a vawpieh uhi. 24 Tua ciengin a pei laitahin humpi khat in ama na dawntuo-in ama a petlia hi. A luonghawm lampi-ah kipai a, ama’ gei-ah a laa a ding hi; humpi zong a luonghawm gei-ah a ding hi. 25 Mite in a nawhkha vua, lampi-ah a luong kipai-in a luong gei-ah humpi a ding a mu uhi. Amate zong pei-in kamsang puvuoi pa tenna khuopi sungah tua thu a gen uhi. 26 Lamkim pana ama a zawpi kamsangpa in khumi thu a zah cieng in, “Tua pa pen Topa’ thugen a mang lo Pasien’ mipa ahi hi. Tua ahi ziehin Topa in ama kunga a gensa tawh kizui-in Topa in humpi tungah ama pie a, tua in ama ehmalin a tha ahi hi,” a ci hi. 27 Tua ciengin ama in a tapate kungah, “Kei ading laa phaw ei vawpieh un,” a ci hi. Tuaci’n amate in khat a vawpieh vua, 28 ama a va pei ciengin lampi-a a luonghawm kipai le laa le a luonghawm gei-ah humpi a ding a mu hi. Humpi in a luonghawm ne loin a laa zong bangma law lo hi. 29 Kamsangpa in Pasien’ mipa’ luonghawm domto-in a laa tungah khang a, kaa ding le vui dingin khuopi sungah a peipi hi. 30 Ama in ama’ hanah tua luonghawm a vui hi; tuale amate in ama uopin a kaa vua, “Kadei, ka sanggampa!” a ci uhi. 31 Ama in tua pa a vui zaw ciengin a tapate kungah, “Kei ka si ciengin tua Pasien’ mipa kivuina hanah ei vui un; ama’ gute gei-ah ka gute koi un,” a ci hi. 32 Bangzieh ahei cile ama in Bethel-a maitamte le Samaria khuopite sunga a om munsang tunga kithoina mun zosie’ langkhatah Topa’ thu tawh a thugente tung valon ding hi,” a ci hi. 33 Tam thute a pien zaw nangawnin zong a gitlona panin Jeroboam kihei nuom tuon lo a, tua lemahin mi zosie lah panin munsangte tunga siempu sem ding mi a sekia hi; ama in siempu a suoh nuom popo munsangte-a siempu dingin a siensuo hi. 34 Tam thu pen lei maitang panin Jeroboam innkuon tungah vatmai ding le suhmang ding a tun mawna a suoh hi. |
Zo Bible © Bible Society of Myanmar, 2018.
Bible Society of Myanmar