1 Kumpite 11 - Zo Bible

Solomon’ Khielnate

¹ Kumpi Solomon in Pharaoh’ tanu banah gamdang numei tampi deigaw hi: Moab-te, Ammon-te, Edom-te, Sidon-te, le Hit numeite ahi hi.

² Topa in Israel-te kungah, “Amate tawh na kinung sih ding vua, amate zong note tawh a kinung sih ding hi; bangzieh ahei cile amate in a pasien uh’ nua na zui nadingun na lungsim uh ang hawisah tahtah ding hi,” ci-a na gensa minamte sung pan hi a, Solomon in tam mite ngai-in a pom hi.

³ Ama’ zite lahah kumpi tanu zi za sagi, le mei zathum nei hi; tuale a zite in ama’ lungsim a heipieh uhi.

⁴ Bangzieh ahei cile Solomon a vuoi ciengin a zite in pasien dangte lamah ama’ lungsim heipieh uhi; a pa David’ lungsim bangin ama’ lungsim Topa a Pasien tungah dih zo nawn lo hi.

⁵ Bangzieh ahei cile Solomon in Sidon-te’ nusien Asterte, le a kidahhuoi Ammon-te’ bieh Milcom nua a zui hi.

⁶ Tuaci’n Topa muna-ah Solomon siet gamtat a, a pa David bangin Topa zui tahtah lo hi.

⁷ Tua ciengin Solomon in Jerusalem nisuona lam muol tungah Moab-te-a’ ahi a kidahhuoi Chemosh le a Ammon-te-a’ ahi a kidahhuoi Molech dingin mun sang khat a bawl hi.

⁸ Ama in gimnamtui halin amau’ pasien-te tungah biehpiehna a pie a gamdang zi zosie dingin tua bang ma-in a bawl hi.

⁹ Tua ciengin ama kunga ni veitah kilahsa Topa, Israel Pasien panin a lungsim a heimang ziehin Solomon tungah Topa a lungthah hi.

¹⁰ Tua pasien dangte’ nua a zui lo nadingin ama tungah thu a piehsa ahi hi; hinanle ama in Topa’ thupieh bangin zui lo hi.

¹¹ Tua ahi ziehin Topa in Solomon kungah, “Tam pen nangma’ lungsim puoh ahi a, nangma kang thupieh ka thuciemna le ka thukhamte na zui lo ziehin nangma tung panin na kumpi gam balkehin na nasempa tungah ka pie tahtah ta ding hi.

¹² Ahi vangin na pa David ziehin nangma’ hin sungin ka bawl sih ding hi; na tapa’ khut sung panin ka balkeh ding hi.

¹³ Hizongnanle keima in tua kumpi gam buppi ka balkeh sih ding hi; ka nasempa David zieh le ka teelsa Jerusalem ziehin na tapa tungah minam khat ka pie ding hi,” a ci hi.

Solomon’ Galte

¹⁴ Tua ciengin Solomon a langpang dingin Topa in Edom-te Hadad a khangsah hi; ama pen Edom kumpi innsung mi khat ahi hi.

¹⁵ Bangzieh ahei cile Edom gamah David a op lai-in misi vui dingin galkapmang Joab kuonto-in Edom gam sunga pasal zosie that hi.

¹⁶ (Azieh pen Joab in Edom gama pasal zosie a na thagam masangin khum munah ama le Israel-te zosie hlaguh sung om uhi);

¹⁷ ahi vangin Egypt ah a pa’ nasem Edom-te pawlkhat tawh Hadad a taimang hi. Tua hunin Hadad naupangno khat ahi na bo hi.

¹⁸ Midian panin a ding vua, Paran ah a tung uhi; Paran panin mi a zawpi vua, ama tungah inn le lo, neh le tah le tenna ding leitang a pie Egypt kumpipa Pharaoh kung Egypt gamah a tung uhi.

¹⁹ Pharaoh’ muna-ah Hadad in maipha lienpi mu a, a zi dingin a nuphalnu, Kumpinu Tahpene’ sanggamnu a pie hi.

²⁰ Tahpenes’ sanggamnu in ama tawh tapa Genubath nei a, Tahpenes in Pharaoh’ inn ah tua naupang kem hi; Pharaoh’ inn sunga Pharaoh’ tapate lahah Genubath om hi.

²¹ A pu a pate tawh David lumton a, galkapmang Joab si ta ci thu Hadad in Egypt panin a zah ciengin Hadad in Pharaoh kungah, “Ka gam ka pei thei nadingin ei dingkhie sah in,” a ci hi.

²² Ahi vangin Pharaoh in ama kungah, “Keima tawh na opna-ah bang kisapna nei-a na gam pei ding na hici sawm ahei?” a ci hi. Ama in, “Hi lo hi, ei peisah ta teitei in,” a ci hi.

²³ Solomon langpang dingin Pasien in adang khat ahi a pupa Zobah kumpi Hadedezer kung pana a tai Eliada’ tapa Rezon a khangsah hi.

²⁴ David in mi a tha zaw ciengin Rezon in a kimvelah mi kaikhawmin ama misuom pawl’ makai a suoh hi; amate Damascus ah pei-in khum munah a teng vua, tuale Damascus ah ama kumpi a semsah uhi.

²⁵ Solomon’ hun sung tawn tungin Israel langpangin ama om a, Hadad ma bangin lungkhamna a piengsah hi; ama in Israel simmaw a, Aram gamsungah a maang hi.

Jeroboam’ Ledona

²⁶ Solomon’ nasem, Zeredah-a Ephraim-te, Nebat’ tapa, a nu’ min Zeruah kici meigong Jeroboam in kumpipa ledo hi. Ama in

²⁷ kumpipa a ledona thu pen tam zieh ahi hi: Solomon in Millo lam a, a pa David’ khuopi kulpi sunga a vangte a hubih hi.

²⁸ Jeroboam a kici pa pen nasep siem khat hi a, tua tangvalpa pen mi kukal khat hi, ci thu Solomon in a mu ciengin Joseph inn sungah thona-aana tawh nasemte uh dingin a koi hi.

²⁹ Tua hun laitahin Jerusalem pan Jeroboam a pei ciengin, Shiloh-a kamsangpa Ahijah in lampi-ah ama na dawn hi. Ahijah in puontha khat na sil hi. Ama gel beh gamlahah a om uhi.

³⁰ Ahijah in a puon tha-ah manin phal sawm le phal ni a suo hi.

³¹ Ama in Jeroboam kungah a gen hi: Nangma dingin phal sawm la in; bang ding ahei cile Israel Pasien Topa in tam bangin ci hi, ‘En in, keima in Solomon’ khut sung panin a kumpi gam ka balkeh ta ding a, nangma tungah minam sawm kang pie ding hi.

³² Ka nasempa David zieh le Israel minamte sung pana ka teelsa khuopi Jerusalem ziehin ama adingin minam khat a om ding hi.

³³ Azieh pen ama in keima ei nuasie zo a, ama in Sidon-te’ nusien Astarte, Moab-te’ pasien Chemosh, le Ammon-te’ pasien Milcom bie-in ka lampi a zui sih a, ka muna-ah ama a manin gamta loin, a pa David bangin ka thukhamte le ka ngaina kipte a zui sih hi.

³⁴ Hinanle ama kung panin a kumpi gam buppi ka lahpieh sih ding hi; ka thupiehnate le ka thukhamte a zui pa, keima’ teel ka nasempa David vangin ama’ hin sung tungtawnin uhpa-in ama ka bawl ding hi.

³⁵ Ahi vangin ama’ tapa tung panin kumpi gam ka la ding a, nangma tungah minam sawm kang pie ding hi.

³⁶ Hinanle ka nasempa David in ka min koi nadinga ka teelsa khuopi Jerusalem-a keima’ mai-ah ama in meivah khat a nei den thei nadingin a tapa tungah minam khat ka pie ding hi.

³⁷ Tuaci’n keima in nangma hing la-in, na dei zaza tungah na uh ding a, Israel-te tungah kumpi na hi ding hi.

³⁸ Ka nasempa David bangin ka thukhamte le ka thupiehnate zui-in kang thupieh zosie mangin ka tawndante na zui a, keima’ muna-ah dihtaha na gamtat leh nangma tawh kang omton ding a, David dingin ka lampieh bangin nang dingin zong inndet khat ka lam ding a, keima in nangma tungah Israel kang pie ding hi.

³⁹ Tam thu ziehin David’ suonlehlahte dan ka pie ding a, hinanle a tawntung hi lo ding hi,’ ci hi,” a ci hi.

⁴⁰ Tua ziehin Solomon in Jeroboam tha dingin a sui hi; ahi vangin Egypt ah Jeroboam tai-in Egypt kumpi Shishak bel a, Solomon a si dongin Egypt ah a om den hi.

Solomon’ Sina

⁴¹ Tu-in Solomon’ nasep a omlaite, le a silbawl zosie le a pil a siemna zosie, Solomon’ Nasepna Laibu sungah kigiel sieng zo ta hi lo amah?

⁴² Solomon in Jerusalem-a Israel mi zosie tungah a uh hun kum sawmli sung ahi hi.

⁴³ A pu a pate tawh Solomon lumton a, tuaci’n a pa David khuopi sungah ama kivui hi; tuale a tapa Rehoboam in ama’ za luo hi.