1 Khangthute 5 - Zo Bible

Reuben’ Suonlehlahte

¹ Israel’ tacil pen Reuben’ tapate ahi a, (Ama tacil ahi a, ahi vangin a pa’ lupna a buasah ziehin Israel’ tapa Joseph tungah ama’ innluoza kipie hi. Tuaci’n khangsimna ah innluoza tawh kizui-in ama kikhum lo hi;

² a sanggamte lahah Judah mi thupi suoh a, ama sung panin uhpa khat a pien vangin innluoza pen Joseph-a’ ahi hi.)

³ Israel’ tacil Reuben’ tapate: Hanoch, Pallu, Hezron, le Carmi.

⁴ Joel’ tapate: A tapa Shemaiah, a tapa Gog, a tapa Shimei,

⁵ a tapa Micah, a tapa Reaiah, a tapa Baal,

⁶ le a tapa Beerah, Assyria kumpi Tilgath-pilneser in sala a peipi pa ahi hi; ama pen Reuben minamte lahah uhpi khat ahi hi.

⁷ Tuale khanggui zui-in amau’ khangsutna a kisim ciengin a innkuonkhuon vua a tanaute: Uhpi Jeiel le Zechariah,

⁸ Aroer-a teng Joel’ tapa Shema, a tapa Azaz, a tapa Bela. Nebo le Baalmeon cieng dongah amahaw a teng uhi.

⁹ Ama nisuona lamah Euphrates talam pang senel gam kipatna mun dong ciengah zong a teng hi. Azieh pen Gilead gam sungah a gantate uh a pung mama hi.

¹⁰ Saul hun lai-in amate in Hagri-te simin a zo uhi; tuale Gilead nisuona gam teng zosie-ah a puonbuhte sung vuah amate a teng uhi.

Gad’ Suonlehlahte

¹¹ Bashan gam sung Salecah donga a gei vua a teng Gad’ tapate:

¹² Bashan gamah uhpi Joel, a zom Shapham, Janai le Shaphat.

¹³ Tuale amau’ be dung zui-a a tanaute uh: Michael, Meshullum, Sheba, Jorai, Jacan, Zia, le Eber, sagi pha uhi.

¹⁴ Tam teng pen Buz’ tapa Jahdo, a tapa Jeshishai, a tapa Michael, a tapa Gilead, a tapa Jaroah, a tapa Huri’ tapa Abihail’ tapate ahi uhi;

¹⁵ Guni’ tapa, Abdiel’ tapa Ahi pen amau’ be sungah uhpi ahi hi;

¹⁶ amate Gilead gamsung, Bashan gamsung le a khuopite sung, le Sharon gam lo nona mun zosie le tua gam a kiten theina cieng dongah a teng uhi.

¹⁷ Judah kumpi Jotham hun sung, le Israel kumpi Jeroboam hun sung khangsimna-ah tam teng zosie kiciemte hi.

¹⁸ Reuben-te, Gad-te, le Manasseh minam alang in galhang mihat, lum le namsau a kuo, thalkap siem, galdo siem, mi tul sawmli le tulli le zasagi le sawmguh gal sim dingin a baisa-in nei hi.

¹⁹ Amate Hagri-te, Jetur-te, Naphish-te, le Nodab-te tawh kido uhi;

²⁰ amate do nadingin panpina a nga ciengun Hagri-te le a kung vua om teng zosie, amau’ khut sungah kipie hi; azieh pen gal kidona sungah a Pasien kungah amate a kiko vua, ama a muon ziehin ama in amau’ ngetna a pie hi.

²¹ Amate in a gantate matpieh uhi: A kalaoh uh tul sawmnga, tuu tul zani le tul sawmnga, laa tul ni, le mi tul zakhat hingmat uhi.

²² Gal kidona pen Pasien-a’ ahi ziehin mi tampi tah kithatin a pua uhi. A sal suo dongun Hagri-te’ gam sungah a teng uhi.

Manasseh Minam Alangte

²³ Gam sungah Manasseh minam alang a teng uhi; Bashan panin Baal-hermon, Senir, le Hermon Muol tungah amate tengin tampi a pha uhi.

²⁴ Tam teng pen amau’ be lutangte ahi uhi: Epher, Ishi, Eliel, Azriel, Jeremiah, Hodaviah, le Jahdiel, a thahat galhangte, mi minthangte, amau’ be lutangte ahi uhi.

²⁵ Ahi vangin amate in a pu a pate uh Pasien’ thu palsatin Pasien in a mai vua a suhsiet minamte’ pasiente lahah a kizua uhi.

²⁶ Tuaci’n Israel Pasien in Assyria kumpi Pul’ lungsim le Assyria kumpi Tilgath-pilneser’ lungsim tawhnawi a, Reuben-te, Gad-te, le Manasseh minam alangte Halah, Habor, Hara le Gozan gunah a peipi a, tuni dongin a teng uhi.