1 Khangthute 29 - Zo Bible

Biehinn Lamna ding Biehnate

¹ Kumpi David in a kikhawm mipite kungah, “Pasien in ama beh a teelsa ka tapa Solomon lah khangno lai-in bangma a thei nai sih a, nasep ding lah a lien mama hi; azieh pen biehinn lah mihing ading hi loin Topa ading ahi bo hi.

² Tuaci’n Pasien’ biehinn dingin keima in ka hi thei za cieng, phu dingin onyx suong, suongpa, suong pawl, suong kang, le suong manpha nam zosie, le suongzol tampite banah kham zahna dingah kham, ngun zahna dingah ngun, le sumngo zahna dingah sumngo, sia zahna dingah sia, sing zahna dingah sing ka khol zo hi.

³ Tham loin a siengtho biehinn adingin ka pieh teng zosie banah keima’ gou ahi ngun le kham zong om a, ka Pasien’ biehinn adingin ka kipumpieh ziehin keima in ka Pasien’ biehinn-a ka piehte:

⁴ Biehinn kawm zut nadingin Ophir gam kham talent tulthum, le a kisiengsahsa ngun talent tul sagi,

⁵ le mi khutsiemte in a bawl ding nasepna zosie adingin kham zahna dingah kham, ngun zahna dingah ngun ahi hi. Tuni-in Topa kungah no le no kisiensuo-in kiphal taha a kipumpieh koi teng a om vuoi?” a ci hi.

⁶ Tua ciengin pupa innkuon lutangte in amau’ nopthu-in piehkhietna a bawl vua, minam makaite, a tul le a za a uhte, le kumpipa’ nasepna a uh uliente in zong a bawl uhi.

⁷ Pasien’ biehinn nasepna dingin kham talent tulnga le kham darics tul sawm, ngun talent tul sawm, sumngo talent tul sawm le tul giet, le sia talent tul zakhat a pie uhi.

⁸ Suong manpha a nei poma in zong Topa’ biehinn sunga van manpha kikoina munah Gershon-te Jehiel’ kep dingin a pie uhi.

⁹ Tua ciengin tam mite in phalna tawh a pieh ziehun mite kipah mama hi. Bangzieh ahei cile lung khat suongin Topa kungah suohta tahin a pie uhi; Kumpi David zong nahpi tahin a lungdam hi.

David in Pasien Phat

¹⁰ Tua ciengin David in a kikhawm mipi zosie’ opna-ah Topa phat hi; David in, “Topa, ka pu ka pa uh Israel Pasien aw, nang in kum tawnin thupha nga ta in.

¹¹ Topa aw, lietna, vanglietna, minthanna, guolzawna, le thupina nangma-a’ ahi hi. Azieh pen vantung le leitunga om zosie nangma-a’ ahi hi; Topa aw, kumpi gam nangma-a’ ahi a, tuate zosie tungah nangma a lutangin ang kitawisang hi.

¹² Nangma kung panin haunate le pahtawinate ang pei a, nangma in na zosie na uh hi. Nangma’ khut sungah vanglietna le hatna a om hi; tuale nangma’ khut sungah mi zosie lietsah nading le thakhausah nading a om hi.

¹³ Kote’ Pasien aw, tu-in nangma kungah kipah thu kang tut vua, a minthang nangma’ min ka phat uhi.

¹⁴ “Ahi vangin tam bang nop thu-a biehna ka bawl thei nadingun kei koi ka hi a, ka mite koi ka hi uh ahei? Azieh pen na zosie nangma kung pana ang pei ahi a, nangma kungah nangma-a’ ma kang pieh uh ahi bo hi.

¹⁵ Azieh pen ka pu ka pate zosie uh ma bangin nangma mai-ah kote khuolmi le pemta ka hi lel uhi; leitungah ka hunte uh nihlim bang ahi a, lamet ding a om sih hi.

¹⁶ Topa kohaw’ Pasien aw, na min siengtho adingin biehinn khat lam nadinga ka kholsa uh tami sil tampi zosie a unpi-in nangma khut sung pana ang pei ahi a, a unpi-in nangma-a’ ma ahi bo hi.

¹⁷ Ka Pasien aw, lungtang na sui a, thutangah na lungkim lam ka thei hi; ka lungsim dihna tawh tam sil zosie kang pie zo hi. Tu-in keima in nangma tungah suohta tah le kipahtaha ang pie, tam sunga om na mite ka mu zo hi.

¹⁸ Ka pu ka pate uh Abraham, Isaac, le Israel Pasien, Topa aw, na mite’ lungsim sungah tua bang ngimnate le ngaisutnate omsah zing inlen, nangma lamah amau’ lungsim kai in.

¹⁹ Ama in na thupiehnate, na thu khensatte, le na thukhamte zosie zui-in tuate zosie a sem a, keima in ama ka piehsa biehinn a lam thei nadingin ka tapa Solomon tungah lawpna lungsim guon in,” a ci hi.

²⁰ Tua ciengin David in a kikhawm mipi zosie kungah, “Topa na Pasien uh thupha pie un,” a ci hi. A kikhawm mipi zosie in a pu a pate uh’ Pasien Topa thupha pie-in a lukun vua, Topa le kumpipa mai-ah a khupbawh uhi.

²¹ A zing ni ciengin amate in Topa tungah biehpiehnate a pie vua, Topa tungah meihal biehna dingin bawngtang tulkhat, tuutang tulkhat, le tuuno tulkhat, dawnthei a biehna utawh, le Israel mi zosie adingin biehpiehna tampi a pie uhi;

²² tuale Topa mai-ah tua ni-in kipahna lienpi tawh an ne tui dawnin a om uhi. Amate in David’ tapa Solomon a niveina kumpi-in a bawl uhi; amate in Topa mai-ah ulien dingin ama sathau nu-in siempu dingin Zadok sathau a nu uhi.

Solomon Kumpi-in Sathau Kinu

²³ Tua ciengin Solomon in a pa David’ kumpi za luo-in Topa’ kumpi topha tungah a to hi. Ama a dau pei a, Israel mi zosie in a thu a mang uhi.

²⁴ Makai zosie le mihat galhangte, le Kumpi David’ tapa zosie in zong Kumpi Solomon’ thu a mang dingin a kiciem uhi.

²⁵ Israel mi zosie muna-ah Topa in nahpi tahin Solomon domsang a, Israel sungah ama masangin kumpi khat popo tungah a kipie ngai nai lo kumpi thupina ama tungah a pie hi.

David’ Uhna Tomkim

²⁶ Tua ahi ciengin Jessi’ tapa David in Israel zosie tungah a uh hi.

²⁷ Ama Israel tunga a maan hun pen kum sawmli sung ahi hi; tuale ama Hebron ah kum sagi sung, Jerusalem ah kum sawmthum le thum sung a maang hi.

²⁸ Ama vuoi-in a ni a hun cingin hauna le minthanna tawh a si hi; tuale a tapa Solomon in ama’ za luo hi.

²⁹ Tu-in Kumpi David’ nasep teng a bul panin a tawp tanin thumu pa Samuel Khang Sutna sung, kamsang Nathan’ Khang Sutna sung, le thumu pa Gad’ Khang Sutna sungah,

³⁰ ama uhna le a thahatna zosie le ama tung, Israel tung, le leitung kumpi gam zosie tunga a tung thute ciemtenate tawh kigiel ton hi.