1 Khangthute 26 - Zo Bible

Kotcingte

¹ Kotcingte kisekhenna ahile: Korah-te, Asaph’ tapate lah panin Kore’ tapa Meshelemiah.

² Meshelemiah in tapate nei hi: A tacil Zechariah, a nina Jediael, a thumna Zebadiah, a lina Jathniel,

³ a ngana Elam, a guhna Jehohanan, a sagina Eliehoenai.

⁴ Obed-edom in tapate nei hi: A tacil Shemaiah, a nina Jehozabad, a thumna Joah, a lina Sachar, a ngana Nethanel,

⁵ a guhna Ammiel, a sagina Issachar, a gietna Peullethai ahi hi; azieh pen Pasien in ama thupha a pie hi.

⁶ A tapa Shemaiah sung panin zong a pupate’ innkuon sungah thunei vaihawm tapate a pieng hi, azieh pen amate siemna lien nei mite ahi uhi.

⁷ Shemaiah’ tapate: Othni, Rephael, Obed, le Elzabad-te ahi vua, siemna nei a sanggamte uh Elihu le Semachiah ahi hi.

⁸ Tam teng zosie a unpi-in Obed-edom’ tapate le a sanggamte utawh, nasep nadinga siemna a nei mi picingte ahi uhi; Obed-edom sung panin mi sawmguh le ni pha uhi.

⁹ Meshelemaiah in siemna a nei tapate le sanggamte, sawm le giet nei hi.

¹⁰ Merari’ tapate sung panin Hosah in tapate nei hi; Shimri a uhpi ahi a, (ama tacil ahi sih vangin a pa in a uhpi-in ama a bawl hi)

¹¹ Hilkiah a nina, Tebaliah a thumna, Zechariah a lina ahi hi. Hosah’ tapate le a sanggamte zosie sawm le thum pha uhi.

¹² Tam kotcing kihawmkhente in amau’ makaite tawh kituohin a sanggamte uh’ sep bang lienin Topa’ biehinn sungah nasep ding tavuon nei uhi;

¹³ tuale amate in a neu a lien a kibangin a pupa innkuon zui-in kotpi cin ding ai a san uhi.

¹⁴ Nisuona lam ading ai, Shelemaiah tungah tu hi. A tapa, a pilvang thu kikuppipa Zechariah adingin zong ai a san vua, leilu adingin ai pha hi.

¹⁵ Obed-edom adingin leilu lamah suoh a, a tapate tungah vankoina innkhan kipie hi.

¹⁶ Shuppim le Hosah dingin nitumna lam, katona lamlien Shallecheth tunkotah kie hi. Galvilte a kimaituo uhi.

¹⁷ Nisielin nisuona lamah Levi-te guh, nisielin leilu lamah li, nisielin leitaw lamah li, le vankholna inn ah ni ni-in a om uhi;

¹⁸ tuale nitumna lama lampi inn adingin a lampi-ah li omin a lampi inn ah ni a om hi.

¹⁹ Tam teng Korah-te le Merari’ tapate lahah kotcing sekhennate ahi hi.

Vankemte, Uliente, le Thukhente

²⁰ Levi-te lahah Ahijah in Pasien’ biehinn goukholnate le a ki-ap letsong koinate uh hi.

²¹ Ladan, Geshon’ tapate lahah khat, innkuon tampi pienna mi khat hi a, Jehiel innkuonte pen ama sung pana pieng ahi hi.

²² Jehiel’ tapa Zetham le a sanggampa Joel in Topa’ biehinn vanmanpha koinate a uh uhi.

²³ Amram-te, Izhar-te, Hebron-te, le Uzziel-te sung panin:

²⁴ Moses’ tapa Gershom, a tapa Shebuel pen vanmanpha koina-ah a uhpipa ahi hi.

²⁵ A sanggamte, Eliezer sung panin a tapa Rehabiah, a tapa Jeshaiah, a tapa Joram, a tapa Zichri, le a tapa Shelemoth ahi hi.

²⁶ Tam Shelamoth le a sanggamte in Kumpi David le innkuon lutangte, le a tul a za uh uliente, le galkapmangte in a apsa uh a ki-ap letsong kikoina mun zosie a uh uhi.

²⁷ Gal sunga a lah uh vante panin Topa’ biehinn puo nadinga a ki-ap letsongte amate a pie uhi.

²⁸ Shelomoth le a sanggamte in thumu pa Samuel, Kish’ tapa Saul, Ner’ tapa Abner, le Zeruiah’ tapa Joab in a apsa zosie le a ki-ap letsong zosie a kem uhi.

²⁹ Izhar-te sung panin Chenaniah le a tapate pen Israel adingin uliente le thukhen-te ahi vua, a pulam nasepnate-ah vaihawmin kise hi.

³⁰ Hebron-te sung panin Hashabiah le a sanggamte, siemna a nei mi tulkhat le za sagi in Jordan nitumna lam Israel tungah Topa’ nasepna vannuoi le kumpipa’ nasepna-te a van uhi.

³¹ Hebron-te sung panin Jerijah pen Hebron-te’ uhpipa ahi hi. (David’ uh a kum sawm lina kumin khangthu ahi sihle innkuon thu kantelna kibawl a, Gilead gam sung Jazer ah amate sung panin siemna lien a nei mite kimukhie hi.)

³² Kumpi David in ama le a sanggamte, siemna nei mi tulni le zasagi, innkuon lutangte ahite pen Pasien tawh kisai na zosie le kumpipa vaite-ah Reuben-te, Gad-te, le Manasseh minam alangte tungah a vil dingin kise hi.