1 Khangthute 23 - Zo BibleLevi Innkuonte le Amau’ Nasepte 1 David vuoi-in kum tampi a phah ciengin Israel tungah kumpi dingin a tapa Solomon koi hi. 2 David in Israel makai zosie le siempute le Levi-te a kikhawmsah hi. 3 Levi-te kum sawmthum pan a tungsie teng kisim a, a kigawm mi tul sawmthum le tulgiet pha hi. 4 David in, “Tam teng sung panin tul sawmni le tul li in Topa’ biehinn sung nasep uh ding a, tulguhte pen uliente le thukhente ahi ding vua, 5 tul li pen kotcingte hi-in, tul li in ama phat nadinga ka bawlsa tumtheite tawh Topa tungah phatna pie ding uhi,” a ci hi. 6 David in Levi tapate tawh kituohin amate tam bangin a pawlpawlin khen hi: Tuate pen Gershon pawl, Kohath pawl, le Merari pawl ahi uhi. 7 Gershon’ tapate pen Ladan le Shimei ahi uhi. 8 Ladan’ tapate: A uhpi Jehiel, le Zetham, le Joel, thum pha uhi. 9 Shimei’ tapate: Shelomoth, Haziel, le Haran, thum pha uhi. Tam teng pen Ladan innkuonte’ lutangte ahi uhi. 10 Shimei’ tapate: Jahath, Zina, Jeush, le Beriah. Tam mihing li teng pen Shimei’ tapate ahi uhi. 11 Zahatha pen uhpi ahi a, Zizah a nina ahi hi; ahi vangin Jeush le Beriah in tapa tampi a nei sih vua, tuaci’n amate innkuon khat bangin kisim hi. 12 Kohath’ tapate: Amram, Izhar, Hebron, le Uzziel, li pha uhi. 13 Amram’ tapate: Aaron le Moses ahi uhi. Ama le a tapate in Topa mai-ah khan tawnin biehna pie-in ama’ na semin, ama’ min tawh thupha a pieh zing thei nadingin a siengpen nate a ap dingin Aaron kituomkoi hi; 14 ahi vangin Pasien’ mipa Moses’ tapate, Levi minam lahah kisim ding hi. 15 Moses’ tapate: Gershom le Eliezer ahi uhi. 16 Gershom’ tapate lahah Shebuel a uhpi ahi hi. 17 Eliezer’ tapate: Rehabiah a uhpi ahi hi; Eliezer in tapa dang nei lo a, hinanle Rehabiah’ tapate pen a tam mama uhi. 18 Izhar’ tapate: Shelomith a uhpi ahi hi. 19 Hebron’ tapate: Jeriah a uhpi, Amariah a nina, Jahaziel a thumna, le Jekameam a lina ahi hi. 20 Uzziel’ tapate: Micah a uhpi, le Isshiah a nina ahi hi. 21 Merari’ tapate: Mahli le Mushi ahi hi. Mahli’ tapate: Eleazar le Kish ahi hi. 22 Eleazar tapa nei loin si a, ahi vangin tanu beh a nei hi; amau’ tanau ahi Kish’ tapate in amate a tenpi uhi. 23 Mushi’ tapate: Mahli, Eder, le Jeremoth, thum pha uhi. 24 Tam teng pen Topa’ biehinn lam nasepna-ah a sem ding, kum sawmni pan a tungsie, a mimalin a mina mi phaza tawh kituohin a pupa uh’ innkuon zui-a kiciemte Levi’ suonte ahi hi. 25 Azieh pen David in, “Israel Pasien, Topa in a mite tungah tawlngahna pie zo hi; tuale Jerusalem ah ama a om zing hi. 26 Tuaci’n Levi-te in biehbuh hile biehna nasep nadingin vanzah dingte hile puoh ngai nawn lo hi,” a ci hi. 27 Azieh pen David’ kam nukhia pen dung zui-in tam teng kum sawmni pan a tungsie Levi mi phaza hi a, 28 “Hinanle amau’ nasep ding pen Topa’ biehinn nasepna-ah Aaron’ suon le hlahte a hu ding vua, biehinn tuolte le biehinn khante kemin, a siengtho ahi nate zosie sawp sieng ding, le Pasien’ biehinn nasepna-ah sep ding khat popo a sem ding uh ahi hi; 29 anlum guolte, an tawh biehna ding annel, tol saw lo anpheng, a ki-em silpieh, sathau tawh a kihal silpieh, le a phaza ahi sihle a golna tena nasep zosie hu ding uhi. 30 Amate in zingmawng sielin dingin lungdam ko-in, Topa a phat ding vua, nitah lamin tua bang ma-in bawlin, 31 Topa kungah a kul le a poimaw dung zui-in sabbath nite, hladet nite, le pawi nite-ah meihal biehna a kipieh popo ciengin Topa mai-ah om zing ding uhi. 32 Tua bangin amate in kikhopna puonbuh le mun siengtho kemin, Topa’ biehinn nasepna ah a tanaute uh ahi Aaron’ suonte a hu ding uhi,” a ci hi. |
Zo Bible © Bible Society of Myanmar, 2018.
Bible Society of Myanmar