1 Khangthute 22 - Zo Bible

¹ Tua ciengin David in, “Tam munah Topa Pasien’ biehinn om ding a, tam munah Israel mite’ meihal biehna maitam om ding hi,” a ci hi.

Biehinnpi Lam Nading David Kigingkhol

² David in Israel gam sunga om gamdang mite a kikaikhop nadingun thu pie a, Pasien’ biehinn lam nading a kikhengsa suongte bawl dingin suongkhengte a koi hi.

³ David in tunkot kotkhah-a zah dingin siatuhkil le a kil nading sia tampi koi-in, a kite zo lo sumngo tampi zong a pie hi.

⁴ Taamtah singte a phaza simzawh hi lo hi; azieh pen Sidon-te le Tyre-te in David kungah taamtah tampi tah a puoh uhi.

⁵ Bangzieh ahei cile David in, “Ka tapa Solomon pen naupang lai-in bangma a thei nai sih a, Topa adinga kilam ding biehinn pen lah thupi-in gamcin tengah minthangin a vangnei ding ahi hi; tua ahi ziehin tuami adingin keima ka kigingkhol ding hi,” a ci hi. Tuaci’n David a si masangin na tampitah a koikhol hi.

Solomon le Makaite’ Kunga David’ Kam Vaihlah

⁶ Tua ciengin ama in a tapa Solomon hlan a, Israel Pasien, Topa adingin biehinn khat lam nading thu a pie hi.

⁷ David in Solomon kungah, “Ka ta aw, Topa ka Pasien’ min dingin biehinn khat lam ding ka gel zo hi.

⁸ Hinanle keima kungah Topa’ thu ang tung a, ‘Nangma in sisan na tam luonsah zo ta a, gal lienpi na do zo hi; nang in ka min dingin biehinn na lam sih ding hi, azieh pen keima muna leitungah sisan tampi na luongsah zo ta hi.

⁹ En in, nangma sung panin tapa khat ang pieng ding hi; ama pen kilemna mi hi ding hi. Keima in a kimvela a om galte sung panin ama kilemna ka pie ding hi; azieh pen ama’ min Solomon hi ding a, ama’ hun sungin Israel tungah kilemna le daina ka pie ding hi.

¹⁰ Ama in ka min dingin biehinn khat a lam ding hi. Ama ka tapa hi ding a, kei ama’ pa ka hi ding hi; Israel sungah ama’ kumpi topha ka kipsah peisuoh ding hi,’ ei ci hi.

¹¹ Tu-in ka ta aw, ama in nang tawh kisai a gensa bangin Topa na Pasien’ biehinn lamna-ah na lawcin thei nadingin Topa in nangma hing ompi taheh.

¹² Ama in Israel tungah thuneina ang pieh ciengin Topa na Pasien’ thukham na zui thei nadingin Topa in nangma tungah thukhen siemna pilna le thu theitelna hing pie taheh.

¹³ Tua ciengin Israel adinga Topa in Moses kungah a pieh thukhamte le biehna ngaina kipte na zui siem nah leh na maa a vang ding hi. Thakhauh inlen hang in. Zau malmal sinlen lungkie sin.

¹⁴ Topa’ biehinn dinga keima in gim le tawl thuohin kham talent tul zakhat, ngun talent awn khat, le a kite zo lo sumngo le siate ka koi zo hi. Bangzieh ahei cile tuate khu a tam mama a, keima in note single suongte zong kang pie zo hi; nangma in tam teng na belap ding ahi hi.

¹⁵ Nangma in nasem mi tampi na nei hi: Suongkhengte, leilesuong innlam siemte, khutsiemte, le sim zawh lo siemna nam zosie a nei,

¹⁶ kham, ngun, sumngo, le sia nasep siemte na nei ding hi. Tu-in na sep kipan in. Topa in hing ompi taheh,” a ci hi.

¹⁷ David in a tapa Solomon a panpi dingin Israel makai zosie thu pie a,

¹⁸ “Topa na Pasien uh note tawh hing om hi lo amah? Ama in na kimvel zosie vuah kilemna hing pie hi lo amah? Azieh pen keima’ khut sungah gam sunga teng mite ei pie zo hi; tuale Topa le a mite mai-ah tua gam kizo ta hi.

¹⁹ Tu-in Topa na Pasien uh a sui dingin na lungsim ule na lungtang uh kipsah un. Topa’ min dinga kilam biehinn sungah Topa’ thuciemna singkuong le Pasien’ vanzah siengthote a kipeipi thei nadingin pei unlen Topa Pasien’ biehinn lam un,” a ci hi.