1 Khangthute 21 - Zo Bible

Misimna le Pulnatna

¹ Israel-te do dingin Satan ding a, tuale Israel mi phaza sim dingin David hantawh hi.

² Tuaci’n David in Joab le galkapmang teng kungah, “Pei un, Beer-sheba pan Dan cieng dong Israel-te va sim ta unlen, bangza pha uh ahei ci ka thei nadingin ka kungah ei zasah un,” a ci hi.

³ Ahi vangin Joab in, “Topa in a mite a za zakhatin khangsah taheh! Ka pu kumpipa aw, amate a unpi-un ka pu’ nasemte hi lo uh amah? Tua ahile bang dinga ka pu in tami kisam na sah ahei? Bang dingin Israel tungah mawna tun ding na hi ahei?” a ci hi.

⁴ Ahi vangin kumpipa thugen in Joab a zothaw zaw hi. Tuaci’n Joab dingin Israel gamsung zosie tuon suohin pei a, Jerusalem ah a kilekia hi.

⁵ Joab in mipi kisimna phaza a unpi-in David kungah a pie hi. Israel buppi sungah namsau tawi mi awn khat le sang khat om a, Judah sungah namsau tawi mi tul zali le tul sawmsagi om hi.

⁶ Ahi vangin Joab in a mi simna ah Levi le Benjamin halkha lo hi. Bangzieh ahei cile ama in kumpipa’ thupieh pen kidahhuoi a sa hi.

⁷ Ahi vangin tami thu-ah Pasien lungkim lo a, ama in Israel a vatgawp hi.

⁸ David in Pasien kungah, “Tami ka bawlna-ah ka khiel seng ta hi. Ahi vangin nangma kungah tu-in kang tau hi, na nasempa’ mawnate lamang ta’n; azieh pen mothuoitahin ka gamta zo ta hi,” a ci hi.

⁹ Topa in David’ thumu pa Gad kungah thu gen a,

¹⁰ “Pei inlen David kungah, ‘Topa in tam bangin a gen hi: Nangma tungah thu thum kang pie hi. Nangma tunga ka bawl ding tuate lahah khat teel in, ci hi,’ va ci tan,” a ci hi.

¹¹ Tuaci’n David kungah Gad haw a, ama kungah, “Topa in tam bangin a gen hi, ‘Na dei pen teel in:

¹² Kum thum sung kielpi ang tun nading; ahi sihle na galte’ namsau in ang nuaphah laitahin na galte in hla thum sung ang suhsiet nading; ahi sihle gam sungah pul natna ang tun nading, Topa’ vantungmi in Israel gam sung teng zosie-ah ni thum sung ang suhsiet nading Topa’ namsau,’ ci hi. Keima ei sawlpa kungah bangci dawnkia ding ka hei, tu-in khensat in,” a ci hi.

¹³ Tua ciengin David in Gad kungah, “Ka lung a nah gim mama hi; a hepina lien mama ahi ziehin Topa’ khut sungah ei puasah in; ahi vangin mihing’ khut sungah ei puasah sin,” a ci hi.

¹⁴ Tuaci’n Topa in Israel tungah pul natna tungsah a, Israel mi tul sawmsagi a si hi.

¹⁵ Jerusalem a susie dingin Pasien in vantungmi khat sawl hi; ahi vangin a suhsiet kuon ciengin Topa in phawhkha a, tua tuosietna tawh kisai-in a lungsim khiem hi; ama in a susie vantungmi kungah, “Pha zo ta! Na khut ladawh ta’n,” a ci hi. Tua laitahin Jebus-te Ornan’ ancilna gei-ah Topa’ vantungmi a ding hi.

¹⁶ David a khuodah leh leitung le vantung kikalah Topa’ vantungmi ding a, ama’ khut sungah namsau khat dawhsa-in Jerusalem tung lamah a khut zam a mu hi.

¹⁷ Tuale David in Pasien kungah, “Mite sim dinga thu a pie pa keima hi lo ka mah? Mawna bawlin a gitlo gamtat mama pa khu keima ka hi hi; ahi vangin tami tuute in bang bawlkhiel nei uh ahei? Topa ka Pasien aw, kang thum hi, keima le ka innkuonte ei gawt zaw inlen, na mite tungah pul natna hing tungsah sin!” a ci hi.

David’ Maitam le Biehpiehna

¹⁸ Tua ciengin Topa’ vantungmi in Gad kungah David va peito hinlen Jebus-te Ornan’ ancilna phuolah Topa ading maitam khat lampieh heh ci-in a gen dingin a sawl hi.

¹⁹ Tuaci’n Topa’ min tawh a gen Gad’ thuhilna bang zui-in David a kuonto hi.

²⁰ Ornan a kinua hei leh tua vantungmi mu hi; tuale ama tawh a omton a tapa lite a kiphuol vua, Ornan in a ancil maban a zom hi.

²¹ Ornan kungah David a tun ciengin Ornan khuodah a, tuale David a mu hi; a ancilna panin ama pusuohin a mai tuolkunin David tungah zatahna a pie hi.

²² David in Ornan kungah, “Mite sung panin pul natna a ven thei nadingin Topa adingin maitam khat ka lam nadingin na ancilna mun ei pie in. A manza a kimtahin la inlen ei pie in,” a ci hi.

²³ Tua ciengin Ornan in David kungah, “Kilah in; ka pu kumpipa in hoi na sah bangin bawl in; en in, keima in meihal biehnate-a zah ding bawngtangte, a sing ding ancilna singte, le an tawh biehna dingin mangbute a unpi-in kang pie hi,” a ci hi.

²⁴ Ahi vangin Kumpi David in Ornan kungah, “Hi lo hi, a manza a kimin pie-in kang lei ding ahi bo hi. Topa adingin nangma-a’ ka la sih ding a, keima sum tawp loin meihal biehnate zong ka pie sih ding hi,” a ci hi.

²⁵ Tuaci’n David in a mun lei nadingin Ornan tungah kham shekel zaguh a gih a pie hi.

²⁶ David in khum munah Topa adingin maitam khat lam a, meihal biehnate le thunuom biehnate a pie hi. Ama in Topa kungah thu ngen a, vantung panin meihal biehna maitam tungah mei tawh ama a dawng hi.

²⁷ Tuaci’n Topa in vantungmi thupie a, a pai sungah a namsau a sietkia hi.

Biehinn Mun Ding Kiteel

²⁸ Tua hunin Jebus-te Ornan’ ancilna phuolah Topa in ama’ thungetna a dawn lam David in a mu ciengin ama in zong tua munah biehpiehna a bawl hi.

²⁹ Bangzieh ahei cile gamlahah Moses in a na bawlsa Topa’ biehbuh le meihal biehna maitam pen khum hunin Gibeon muol vumah a om hi;

³⁰ hizongle Topa’ vantungmi’ namsau giing ahi ziehin Pasien dong dingin tua munah David pei ngam lo hi.