1 Khangthute 18 - Zo Bible

David in A Kumpi Gam Keh

¹ Hun phabep khat zaw ciengin David in Philistia-te simin amate a zo hi; ama in Philistia-te kung panin Gath le a khuoneute a la hi.

² Ama in Moab-te zo a, Moab-te David’ nasem suohin sieh le kaih a pie uhi.

³ Euphrates gunah gamgi phut dingin Hamath lam manaw-in Zobah kumpipa Hadadezer a pei ciengin David in ama na do-in a zo hi.

⁴ David in ama kung panin leeng galkap tulkhat, sakol galkap tulsagi, le lei galkap tul sawmni a la hi. David in leengkai sakolte zosie’ kapzahui a atsanpieh a, hinanle leeng zakhat kai khop ding a hen hi.

⁵ Zobah kumpipa Hadadezer a panpi dingin Damascus-ah Aram-te a pei ciengin David in Aram-te tul sawmni le tulni that hi.

⁶ Tua ciengin David in Aram gam Damascus ah khuocingte koi hi; tuale Aram-te pen David’ nasem suohin sieh le kaih a puoh uhi. Topa in David a peina popo-ah guolzawna a pie hi.

⁷ David in Hadadezer’ nasemte in a puoh kham lumte la-in Jerusalem ah peipi hi.

⁸ Hadadezer’ khuopite ahi Tibhath le Cun panin David in sumngo tampi tah la hi; Solomon in tuate tawh sumngo tuikuongpi, khuompite, le sumngo umlebeelte a bawl hi.

⁹ David in Zobah kumpipa Hadadezer’ galkap buppi a zawna thu Hamath kumpipa Tou in a zah ciengin,

¹⁰ ama in Hadadezer simin a zaw ziehin ama a hopi ding le a kipahpi dingin Kumpi David kungah a tapa Hadoram a sawl hi. Tu-in Hadadezer le Tou gal kido thei zel uhi. Ama in kham, ngun, le sumngo tawh a kibawl na namkim puoh a,

¹¹ kumpi David in Edom, Moab, Ammon-te, Philistia-te, le Amalek, minam zosie kung panin a puoh ngun le khamte tawh Topa kungah tam teng zong a apton hi.

¹² Zeruiah’ tapa Abishai in Ci Kuompi ah Edom-te tul sawm le tulgiet that hi.

¹³ Ama in Edom ah khuocingte koi hi; tuale Edom-te zosie David’ nasem a suoh uhi. Topa in a peina popo-ah David guolzawna a pie hi.

David’ Vaihawmna

¹⁴ Tuaci’n Israel mi zosie tungah David a maang hi; tuale ama in ama’ mi zosie tungah thuman le thutang tawh vai a hawm hi.

¹⁵ Zeruiah’ tapa Joab pen galkap makai ahi hi; Ahilud’ tapa Jehoshaphat pen thuciemte pa ahi hi.

¹⁶ Ahitub’ tapa Zadok le Abiathar’ tapa Ahimelech pen siempute ahi vua, Shavsha pen thuvanpi pa ahi hi.

¹⁷ Jehoiada’ tapa Benaiah pen Chereth-te le Peleth-te tunga a uh ahi uhi; tuale David’ tapate pen kumpipa’ nasepna ah ulien pente ahi uhi.