1 Khangthute 15 - Zo Bible

Jerusalem ah Singkuong Kipuo

¹ David in ama adingin David’ khuopi sungah innte lam a, ama in Pasien’ singkuong adingin mun khat siemin puonbuh khat a lampieh hi.

² Tua ciengin David in amate, “Topa’ singkuong a puo ding le kum tawna ama’ na a sem dingin a teelsa ahi ziehin Levi-te simlo koima in Topa’ singkuong puo thei lo ding hi,” a ci hi.

³ Ama in a bawlsa ama om nading munah Topa’ singkuong a puoto dingin David in Jerusalem-a om Israel mi zosie khawmtuo hi.

⁴ Tua ciengin David in Aaron le Levi suonlehlah a khopte:

⁵ Kohath tapate sung pan uhpi Uriel, a sanggamte mi za le sawmni tawh;

⁶ Merari tapate sung pan uhpi Asaiah, a sanggamte mi zani le sawmni tawh;

⁷ Gershom tapate sung pan uhpi Joel, a sanggamte mi za le sawmthum tawh;

⁸ Elizaphan tapate sung pan uhpi Shemaiah, a sanggamte mi zani tawh;

⁹ Hebron tapate sung pan uhpi Eliel, a sanggamte mi sawmgiet tawh;

¹⁰ Uzziel tapate sung pan uhpi Amminadab, a sanggamte mi za le sawm le ni tawh ahi hi.

¹¹ David in siempute Zadok le Abiathar, le Levi-te ahi Uriel, Asaiah, Joel, Shemaiah, Eliel, le Amminadab hlanin

¹² amate kungah, “No pen Levi-te’ be lutangte na hi uhi; ama adinga ka bawlsa munah Topa’ singkuong na puohto thei nadingun noma le na sanggamte kisiensuo tawm un.

¹³ Note in a masa lai-in na puoh lo ziehun Topa i Pasien uh’ lungthahna i tung vuah a pawhzah hi. Azieh pen eite in hoitahin i don sih uhi,” a ci hi.

¹⁴ Tuaci’n Israel Pasien, Topa’ singkuong a puoto dingin siempute le Levi-te a kisiensuo tawm uhi.

¹⁵ Topa’ kammal tawh kizui-in Moses thupiehsa bangin Levi-te in a liengko vuah a zawlte tawh Topa’ singkuong a puo uhi.

¹⁶ David in kipahna aw a gin thei nadingin lasahna vanzahte, harp lasahna le lyre lasahnate le a daltuote tumin la sa dingin Levi uhpite kungah amau’ sanggamte a se nadingin thu a pie hi.

¹⁷ Tuaci’n Levi-te in Joel’ tapa Heman a se uhi; tuale a sanggamte sung panin Berechiah’ tapa Asaph, Merari minam sung sung panin a sanggamte uh Kushaiah’ tapa Ethan,

¹⁸ tuale amate tawh a pawl nina-in Zechariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, le Mikneiah, le kotcingte Obed-edom le Jeiel-te a se uhi.

¹⁹ Lasate ahi Heman, Asaph, le Ethan-te in sumngo daltuote a tum ding uhi;

²⁰ Zechariah, Aziel, Shemiramoth, Jehiel, Unni, Eliab, Maaseiah, le Benaiah-te in a peisuoh aw-in harp lasahna a tum ding uhi;

²¹ ahi vangin Mattithiah, Eliphelehu, Mikneiah, Obed-edom, Jeil, le Azaziah -te in lyre lasahnate aw-un tawh makai ding uhi.

²² Levi-te sung panin la makaipa Chenaniah pen lasah a siem ziehin la hilin a pang hi.

²³ Berechiah le Elkanah-te pen singkuong adingin kotcingte ahi ding uhi.

²⁴ Shebaniah, Joshaphat, Nethanel, Amasai, Zechariah, Benaiah, le Eliezar-te pen siempute ahi vua, amate in Pasien’ singkuong mai-ah pengkulte a tum ding uhi.

²⁵ Tuaci’n Obed-edom’ inn panin lungdamna tawh Topa’ singkuong a puoto dingin David le Israel upate, le a tul uhte a pei uhi.

²⁶ Topa’ thuciemna singkuong a puo Levi-te pen Pasien in a panpi ziehin amate in bawngtang sagi le tuutang sagi tawh biehpiehna a pie uhi.

²⁷ David in puontuolpi hoi khat sil a , tua ma bangin singkuong a puo Levi-te zosie, lasate, le lasate makai Chenaniah-te in zong a sil uhi; tuale David in siempu puon khat sil hi.

²⁸ Tuaci’n Israel mi zosie in saki, pengkulte, le daltuo gingte tawh kituohin awngin Topa’ Thuciemna Singkuong peipi to-in harp lasahnate le lyre lasahnate tawh nahpitahin la a sa uhi.

²⁹ David khuopi sungah Topa’ Thuciemna Singkuong a tun laitahin, tawlet panin Saul’ tanu Michal a khuodah leh Kumpi David lamin diengin a op lam mu hi; tuale ama in a lungsim sungah ama a nau-et hi.