1 Khangthute 12 - Zo Bible

Gamlahah David’ Nuazuite

¹ Kish’ tapa Saul ziehin David a nop bangin a tat thei lo laitahin Ziklah ah ama kunga a hawte tam teng ahi uhi; tam teng pen gal sungah ama a panpi mihat galhangte lahah mite ahi uhi.

² Amate pen thalkap siem, le a khut zietlam le veilamah thaltang kap thei le suong sep theite ahi uhi; amate pen Saul’ sanggam Benjamin-te ahi uhi.

³ Ahiezer pen a uhpi ahi a, tua ciengin Joash ahi hi; a ni gelin Gibeah-te Shemaah’ tapate ahi uhi. Azmaveth’ tapate Jeiel le Pelet zong; Anathoth-te Berakah le Jehu,

⁴ Gibeon-te Ishmaiah, mihing sawmthumte lahah galhangpa le mihing sawmthumte makaipa; Gederah-te Jeremiah, Jahaziel, Johanan, le Jozabad;

⁵ Haruph-te Eluzai, Jerimoth, Bealiah, Shemariah, le Shephataiah;

⁶ Korah-te Elkanah, Isshiah, Azarel, Joezer, le Jashobeam;

⁷ le Gedor-te Jeroham’ tapate Joelah le Zebadiah-te ahi uhi.

⁸ Gad-te lah panin gamlah mun muonhuoi sunga David kungah a thahat a siem galhangte, lum le teikhaw a siem, a maitang uh humpi maitang tawh a kibang, le muoltung sakhi bangin a mallanga a peite:

⁹ A uhpi Ezer, a nina Obadiah, a thumna Eliab,

¹⁰ a lina Mishmannah, a ngana Jeremiah,

¹¹ a guhna Attai, a sagina Eliel,

¹² a gietna Johanan, a kuona Elzabad,

¹³ a sawmna Jeremiah, a sawm le khatna Macbannai-te ahi uhi.

¹⁴ Tam Gad-te pen galkap uliente ahi vua, a neupen in galkap zakhat, a lienpen in galkap tulkhat uh hi.

¹⁵ Tam teng pen a hla masa sungin Jordan gunpieu zosie tui a let laitahin Jordan galkai-in kuom sunga om mite nisuona lam le nitumna lama a taisah mite ahi uhi.

¹⁶ Mun muonhuoi sunga David kung ah Benjamin-te le Judah-te pawlkhat a pei uhi.

¹⁷ Amate tawh a kimu dingin David kuonin amate kungah, “Lawmta hina tawh kei ei panpi dinga ang pei na hi uleh note tawh ka lungsim a kihuolton ding hi. Ahi vangin keima in bangma a sie bawl lo napi ka galte tungah kei ei leheh dinga ang pei na hi uleh, i pu i pate’ Pasien in hing mu hinlen, note thu hing khen taheh,” a ci hi.

¹⁸ Tua ciengin mi sawmthumte a uhpipa Amasai tungah hlagau tung a, ama in, David aw, ko nangma-’a ka hi uhi. Jessi’ tapa aw, nangma’ pawl hi ung! Nang tungah nopna om hinlen, nang ang panpite tungah zong nopna om taheh! Bang zieh ahei cile na Pasien in nang ang panpi hi,” a ci hi. Tua ciengin David in amate a sang a, ama’ galkap uliente a suohsah hi.

¹⁹ Philistia-te tawh Saul sim dinga David a kuon laitahin Manasseh-te pawlkhat tai-in David a zop uhi. (Ahi vangin David in Philistia-te panpi lo hi; azieh pen Philistia a uhte kikumin, “A pupa Saul kungah ei taisan ding a, eima’ lu tungah ang tu ding hi,” a ci ziehun ama a sawldoh uhi.

²⁰ Ziklak ah a pei laitahin tam Manasseh sung panin tai-in ama a belte: Adnah, Jozabad, Jediael, Michael, Jozabad, Elihu, le Zillethai hi a, Manasseh sungah mi a tulin a uhte ahi uhi.

²¹ Amate in misuomte a do David a panpi uhi. Azieh pen amate galhang mite ahi vua, galkap sungah galkap bute ahi uhi.

²² Pasien’ galkap bangin galkap hon tampi a phah dongin a panpi dingin David kungah a ni ni-in mite a lut bebe uhi.

Hebron-a David’ Galkapte

²³ Tam teng pen Topa’ thugen tawh kizui-in Saul kumpipa’ gam David tungah a ap dingin Hebron-a ama kunga a pei galkap a khente’ phaza ahi uhi:

²⁴ Judah mite sung panin lum le tei tawi galkap tulguh le zagiet ahi uhi.

²⁵ Simeon-te sung panin a thahat galhang mihing tulsagi le zakhat ahi uhi.

²⁶ Levi-te sung panin mi tul li le zaguh ahi uhi.

²⁷ Aaron’ innkuon sung panin makai Jehoiada, le ama tawh mi tulthum le zasagi ahi uhi.

²⁸ Galhang tangval Zadok, le ama’ pupa innkuon sung panin galkapmang sawmni le nite ahi uhi.

²⁹ Saul’ sanggamte ahi Benjamin-te tulthum ahi a, tuate lahah a tamzaw Saul’ innkuon lamah a pang na lai uhi.

³⁰ Ephraim-te sung panin a thahat galhang, a pupa uh’ innkuon sungah mi minthang, a madawh mi tul sawmni le zagiet ahi hi.

³¹ Manasseh minam alangte sung panin David kumpi a suohsah dinga a pei a min kilo mihing tul sawm le tulgiet ahi hi.

³² Issachar-te sung panin hun pei zie a theitel, Israel in bang sem leh kilawm ding ahei ci-a a thei uhpi zani le amau’ uhna nei-a om a sanggam zosie ahi uhi.

³³ Zebulun-te sung panin David panpi dinga lungkhat a khai galsim siemsa galkapte, galsim nading galvan zosie tawh a kivon galsim thei mi tul sawmnga ahi hi.

³⁴ Naphtali-te sung panin galkapmang tulkhat le amate tawh a om lum le tei a tawi mi tul sawmthum le tulsagi ahi hi.

³⁵ Dan-te sung panin gal sim dinga kiguong mi tul sawmni le tulgiet le zaguh ahi hi.

³⁶ Asher-te sung panin gal sim dinga a baisa-a om galsim a siemsa galkap tul sawmli ahi hi.

³⁷ Jordan galkhat a om Reuben-te, Gad-te, le Manasseh minam alang panin galhiem namkim tawh a kivon mi tul zakhat le tul sawmni ahi hi.

³⁸ Tam teng zosie gal sim dinga kithawi galhangte ahi vua, Israel zosie tungah David kumpi-a a koi ding ngaisutna tahpi tawh Hebron ah a pei uhi; tua ma bangin a omlai Israel zosie zong David kumpi hisah ding a ngaisutna uh kikhat hi.

³⁹ A sanggamte in amau adingin a na vaihawm ziehun amate tua munah David tawh ni thum sung anne tui dawnin a om uhi.

⁴⁰ Israel gam sungah kipahna thu a op ziehin a kim a pamte ahi Issachar, Zebulun le Naphtali dong panin zong pei-in laate, kalaohte, le laa-sakolte le bawngtangte, an tampitah, thei mohte, lengga kiphogaw bawhte, le lenggazu le sathau, bawngtangte le tuute a puoh uhi.