1 Khangthute 11 - Zo Bible

Israel-te Zosie’ Kumpi-in David Sathau Kinu

¹ Tua ciengin Israel zosie Hebron-a David kungah a kikhawm vua, “En in, kote na gu le na tel ka hi uhi.

² Bangzieh ahei cile masang lai-in, Saul kumpi ahi sung nangawnin Israel galkapte thu a pie nangma na hi hi. Topa na Pasien in nangma kungah tam bangin gen hi: Nang pen ka mi Israel-te a cingpa na hi ding a, ka mi Israel tungah a uhpa na hi ding hi,” a ci uhi.

³ Tuaci’n Israel upa zosie Hebron-a kumpipa kungah pei-in David in Hebron-a Topa mai-ah amate tawh thuciemna khat a bawl hi. Samuel tungtawnin Topa’ thugen bangin amate in Israel kumpi dingin David sathau a nu uhi.

Jerusalem Kila

⁴ Gam sung mi ahi Jebus-te tenna, Jebus a kici Jerusalem ah David le Israel mi zosie a kuon uhi.

⁵ Jebus-a tengte in David kungah, “Tam sungah nang pei sih ding hi,” a ci uhi. Hizongle David in tu-a David’ khuopi Zion mun muonhuoi a la hi.

⁶ David in, “Jebus-te a sim masa popo uhpi le galkapmangpa hi ding hi,” a ci hi. Zeruiah’ tapa Joab kuonto masa a, ama galkapmang a suoh hi.

⁷ Mun muonhuoi sungah David a teng hi; tua ahi ziehin tua khuo pen David’ khuopi kici hi.

⁸ Ama in Milo panin a kimvelah a kuolin khuopi lam hi. Joab in khuopi sunga a omlai mun teng a puokia hi.

⁹ Vanglien Pasien in ama ompi ahi ziehin David thupi semsem hi.

David’ Mi Thahatte le Amau’ Hanciemna

¹⁰ Tu-in tam teng pen Israel tawh kisai-in Topa’ thugen bangin ama kumpi a suo thei nadingin, Israel zosie tawh ama’ kumpi gam sungah ama nahpitaha a panpi David’ galhangte’ uhpite ahi uhi.

¹¹ Tam teng pen David’ mi thahat galhangte kiciemtena ahi hi: Hachmoni’ tapa Jashobeam pen mi thumte lahah a lamkai pa ahi hi; ama in a teipi lehin mi zathum do a, thakhatin a unin that sieng hi.

¹² Tuale mi thahat thumte lahah ama’ zomah Ahoh mi Dodo’ tapa Eleazar ahi hi.

¹³ Philistia-te galbawl dingin tua munah a kikhop ciengun Pasdammim ah David tawh ama omton hi. Tua sungah mangbuham a dima pona leitang khat a om hi. Tu-in Philistia-te kung panin mite a taimang vua,

¹⁴ ahi vangin ama le David in tua leitang laikim tahah panmun la-in hu a, Philistia-te that hi; tuale Topa in guolzawna lienpi tawh amate hunkhie hi.

¹⁵ Rephraim kuomah Philistia-te’ galkapte giephuol satin a op laitahun Adullam leihawm a David kungah uhpi sawmthumte lah panin mihing thum a kumsuh uhi.

¹⁶ Tua laitahin mun muonhuoi sungah David a om hi; tuale Betleham khuo-ah Philistia khuocingte a om uhi.

¹⁷ David in lunggulna tawh, “Aw, Bethlehem tunkot gei-a tuikhuh panin ka dawn ding tui mi khat in ei pie thei leh ci tei ing e!” a ci hi.

¹⁸ Tua ciengin Thumte in Philistia-te’ giephuol a phukeh vua, Bethlehem tunkot gei-a tui tawi-in David kungah a peipi uhi. Ahi vangin David in tua tui a dawn sih hi; ama in Topa adingin tua tui sungsuh a,

¹⁹ ama in, “Tami tui ka dawn poma sih ding hi. Tam mite’ sisan ka dawn thei mawh ding amah? Bang ding ahei cile a luong uh khamin tami tui ang tawi uh ahi bo hi,” a ci hi. Tua ziehin ama in tua tui a dawn sih hi. Tua Thumte in tam bang teng a bawl uhi.

²⁰ Tu-in Joab’ sanggampa Abishai pen Sawmthumte lahah a uhpi ahi hi. Ama in a teipi tawh mihing zathum do-in amate that a, tuaci’n mi Thumte banah min khat a ngabe hi.

²¹ Mihing Sawmthumte lahah ama a minthang pen hi a, tuaci’n amau’ lamkaipa a suoh hi. Ahi vangin ama in mi Thumte pha zo lo hi.

²² Jehoiada’ tapa Benaiah pen Kabzeel khuomi galhang, sil thupite a bawlpa ahi hi; ama in Moab mi galhang ni that hi. Ama in vua kieh ni khatin leihawm sunga om humpi khat zong that hi.

²³ Tuale ama in a thagol, tong nga a sang Egypt-te khat that hi. Tua Egypt mipa in a khutah siemgante’ siem lawngpi cie bang a pha teipi khat nei hi; ahi vangin ama do dingin ama kungah ciengkhut khat tawh Benaiah pei a, Egypt mipa’ khut panin a teipi lahpiehin ama’ teipi ma tawh ama that hi.

²⁴ Tam silte Jehoiada’ tapa Benaiah’ bawl ahi a, tua galhang thumte banah min khat ngabe hi.

²⁵ Ama mihing Sawmthumte lahah a min kidawh a, ahih vangin mihing Thumte pha zo lo hi. David in ama cingte’ uhpa-in ama koi hi.

²⁶ Galkapte lah panin mi thahatte pen Joab’ sanggampa Asahel, Bethlehem-te Dodo’ tapa Elhanan,

²⁷ Harod-te Shammoth, Pelon-te Helez,

²⁸ Tekoa-te Ikkesh’ tapa Ira, Anathoth-te Abiezer,

²⁹ Hushah-te Sibbekai, Ahoh-te Ilai,

³⁰ Netophah-te Maharai, Netophah-te Baanah’ tapa Heled,

³¹ Benjamin-te sung panin Gibeah-te Ribai’ tapa Ithai, Pirathon-te Benaiah,

³² Gaash luidung-te Hurai, Arbath-te Abiel,

³³ Bahurim-te Azmaveth,

³⁴ Gizon-te Hashem, Harar-te Shagee’ tapa Jonathan,

³⁵ Harar-te Sachar’ tapa Ahiam, Ur’ tapa Eliphal,

³⁶ Mecherath-te Hepher, Pelon-te Ahijah,

³⁷ Carmel-te Hezro, Ezbai’ tapa Naarai,

³⁸ Nathan’ sanggampa Joel, Hagri’ tapa Mibhar,

³⁹ Ammon-te Zelek, Zeruiah’ tapa Joab’ galhiem puopa Beeroth-te Naharai,

⁴⁰ Ithri-te Ira le Gareb,

⁴¹ Hit-te Uriah, Ahlai’ tapa Zabad,

⁴² Reuben-te’ makai khat ahi, Reuben-te Shiza’ tapa Adina, le ama tawh mihing sawmthum,

⁴³ Maacah’ tapa Hanan, Mithni-te Joshaphat,

⁴⁴ Ashterath-te Uzzia, Aroer-te Hotham’ tapate Shama le Jeiel,

⁴⁵ Tiz-te Shimri’ tapa Jediael le a sanggampa Joha,

⁴⁶ Mahavah-te Eliel, Elnaam’ tapate Jeribai le Joshaviah, Moab-te Ithmah,

⁴⁷ Mezoba-te Eliel, Obed, le Jaasiel ahi uhi.