1 Khangthute 10 - Zo Bible

Saul le A Tapate’ Sina

¹ Philistia-te in Israel a sim uhi; tuale Philistia-te mai-ah Israel mite tai-in Gilboa Muol tungah pua-in a si uhi.

² Philistia-te in Saul le a tapate a pha uhi; tuale amate in Saul’ tapate ahi Jonathan, Abinadab le Malchishua te a that uhi.

³ Saul in gal kidona nanha a sa mama hi. Tuale thal kapte in ama mu-in a kapliem uhi.

⁴ Tua ciengin Saul in a galvan puopa kungah, “Tam tep kitan lo mite hing pei-in ei apmaipi lo nadingun na namsau dawh inlen ei dawtlia in,” a ci hi. Hizongle a galvan puopa a zau ziehin a bawl nuom sih hi. Tuaci’n Saul in a namsau la-in tua tungah pua-in a si hi.

⁵ A galvan puopa in Saul si a mu bepin ama zong a namsau tungah pua-in a si hi.

⁶ Tua bangin Saul a si hi; ama le a tapa thumte le a innkuon zosie a siton uhi.

⁷ Kuom sunga om Israel mi zosie in galkapte taimangin Saul le a tapate a sina uh a mu ciengun khuopite nuasie-in a taimang uhi. Philistia-te pei-in tua khuopi teng a luo uhi.

⁸ A zing cieng, a kithat mite’ puon hawhkhie dingin Philistia-te a pei uh ciengin Gilboa Muol tungah Saul le a tapate a sina a mu uhi.

⁹ Amate in ama’ nate hawh dawhin a lutang le a galhiem a la vua, a milimte ule mite kungah tua lungdam thu a tangko dingin Philistia-te’ gam sung zosie-ah kamtaite a sawl uhi.

¹⁰ Amate in a pasiente uh’ biehinn sungah ama’ galhiem koi-in Dagon biehinn sungah a lutang a suong uhi.

¹¹ Ahi vangin Philistia-te in Saul tunga a bawldan uh Jabesh-gilead mi zosie in a zah ciengun,

¹² a thahat galhangte kithawi-in Saul le a tapate’ luonghawm la-in Jabesh ah a puo uhi. Tua ciengin Jabesh-a gangpi sing nei-ah amau’ gute a vui vua, ni sagi sung an a tang uhi.

¹³ Tuaci’n a thuman lona ziehin Saul a si hi. A thupieh a zui lona ziehin Topa tungah ama a thuman lo a hi hi. Tua tham loin ama in dawilawm nei khat thu dong a,

¹⁴ Topa kung panin lamlahna sui lo hi. Tua ahi ziehin Topa! in ama that a, Jessi’ tapa David tungah kumpi gam a pie hi.