1 John 4 - Zo Bible

Hlagaute Sittel Un

¹ Ka itte aw, hlagau popo um pai sih unlen, Pasien tung pana ang pei amah ci-in sittel bo un. Bangzieh ahei cile leitungah kamsang zuou tampi tah pei zo ta hi.

² Tam thu tawh Pasien’ Hlagau na thei ding uhi: Jesu Khris tahsa sungah ang pei zo hi, ci-a a sang poma Pasien tung pan hi a,

³ Jesu a sang lo hlagau poma Pasien tung pan ahi sih hi. Tam pen ang pei ding hi ci-a na zahsa uh antikhris’ hlagau hi a, tu-in leitungah a om zo hi.

⁴ Tanote aw, note pen Pasien pan na hi vua, amate na zozo uhi. Azieh pen leitunga a om pa sangin note sunga a om pa lienzaw hi.

⁵ Amate pen leitung pan ahi uhi; tua ahi ziehin amate in leitung thu genin leitung in a thugen uh a ngai hi.

⁶ Eite i hi leh Pasien pan i hi uhi. Pasien a thei poma in i thu gen a ngai vua, Pasien pan ahi lo poma in i thu gen a ngai sih uhi. Tam panin eite in hlagau man le hlagau zuou i theithei hi.

Pasien Itna Ahi hi.

⁷ Ka itte aw, khatlekhat na ki-it un; bangzieh ahei cile itna pen Pasien pana ang pei ahi hi; mi a it thei zosie Pasien’ piensah hi a, tuaci’n Pasien a thei hi.

⁸ Itna a nei lo poma in Pasien a thei sih hi, bangzieh ahei cile Pasien pen itna ahi hi.

⁹ Eite lahah Pasien’ itna tam bangin ang kilang hi: Ama tungtawnin eite i hin thei nadingin Pasien in leitungah a Tapa neisun ang sawl hi.

¹⁰ Itna i ci tami ahi hi. Eite pen Pasien it i hi sih vua, ama in eite ei itin i mawnate zieha thoidam biehpiehna dingin a tapa ang sawl hizaw hi.

¹¹ Ka itte aw, Pasien in taza tahin eite ei it ahile eite zong khatlekhat i ki-it ding uh a kilawm ahi hi.

¹² Koima in Pasien mu ngai lo hi; eite khatlekhat i ki-it leh eite sungah Pasien teng a, tuaci’n ama’ itna in eite sungah a bukim hi.

¹³ Ama in ama’ Hlagau ei pie zo ahi ziehin ama sungah eite i om a, eite sungah zong ama a op lam tami thu tawh i thei hi.

¹⁴ Pa in leitung’ Hunpa dingin a Tapa ang sawlna thu eite in mu-in teci i pang zo ta uhi.

¹⁵ Jesu pen Pasien’ Tapa ahi hi, ci-a a sang mite sungah Pasien teng a, amate zong Pasien sungah a teng uhi.

¹⁶ Tuaci’n Pasien in eite ei itna thu, eite in thei-in i um zo ta uhi. Pasien pen itna ahi hi, itna sunga a tengte pen Pasien sunga teng ahi a, Pasien zong amate sungah a teng hi.

¹⁷ Thukhen ni ciengin eite in hansanna i nei thei nadingin eite lahah tam bangin itna ang kicingsah hi, azieh pen ama bangin eite zong leitunga pieng i hi hi.

¹⁸ Itna sungah zauna om lo a, ahi vangin itna bukim in zauna a paimang hi; bangzieh ahei cile zauna pen dan thuoh ding ginna ahi a, tuaci’n a zau poma itna sungah a cingtah nai lo ahi hi.

¹⁹ Ama in eite ei it masah ziehin eite in ama i it uhi.

²⁰ “Pasien ka it hi,” ci napi a sanggamte a mudate pen zuou gente ahi uhi; azieh pen a mu thei a sanggam pa a it lote in a mu thei lo Pasien a it thei sih ding hi.

²¹ Eite in ama tung panin tami thupieh i nei uhi: Pasien a itte in a sanggamte zong a it uh kul hi.