1 Corinth-te 9 - Zo Bible

Sawltahpi Khat’ Nga Theite

¹ Kei a suohta mi hi lo ka mah? Kei sawltahpi khat hi lo ka mah? I Topa Jesu mu zo hi lo ka mah? Note zong Topa sunga ka nasep hi lo na hi uh amah?

² Adangte tungah sawltahpi ka hi sih lezong note adingin ka hi buong sam hi; azieh pen Topa sungah sawltahpi ka hina ciemtena pen note na hi uhi.

³ Kei ei sittel mite tungah ka kidalna tami ahi hi.

⁴ Ko zong neh le dawn nga thei ding ma hi lo ka hi uh amah?

⁵ Sawltahpi dangte, Topa’ naute le Cephas ma bangin ko zong thu um zite a zawpi thei ding hi lo ka hi uh amah?

⁶ Ahi sihle ka neh suina uh nasepna panin keima le Banabas beh a awngtang thei lo ka hi uh amah?

⁷ Ama’ sum tawh galkap na a sem koi ahei? Lengga kung suon napi a ga khat zong a ne lo koi ahei? Ahi sihle gan khawi napi a nawi a dawn lo koi ahei?

⁸ Tam thu teng mihing thuneina tawh ang gen ka hi amah? Thukham in zong tam bang ma-in gen hi lo amah?

⁹ Azieh pen Moses’ thukham sungah, “Bawngtangin bu a cil laitahin a nephu na hen sih ding uhi,” ci-in kigiel hi. Bawngtang adingin Pasien a lunghimaw amah?

¹⁰ Ahi sihle eite ading ngiet a a gen hi lo amah? Eite ading ma-a a giel ngiet ahi hi. Bangzieh ahei cile lo hlo mi poma in lametna tawh lo kai a, ancil mi poma in zong a nga ding lametna tawh an a cil hi.

¹¹ Note lahah hlagau khaici hing vaw zo ka hi ziehun no tung panin na leitung’ nate ka at ule zong a tam seng ahi ding amah?

¹² Midangte in note tungah thu a nei thei leh kote in a tamzaw ka nei thei lai sam sih ding uh amah? Hizongle kote in tami thuneina zang loin, Khris’ lungdamna thu a kikhahtan lo nadingin na khatpopo ka thuoh kenkon zaw uhi.

¹³ Biehinnpi sunga nasemte in biehinnpi panin neh a nga vua, maitam-a nasemte in zong maitam tunga kiluite a nga lam uh thei lo na hi uh amah?

¹⁴ Tua ma bangin lungdamna thu a tangkote in lungdamna thu panin kivana a nga ding uhi, ci-in Topa in thu a pie hi.

¹⁵ Hizongle tam bang nga thei dingte khat zong ka zang sih a, keima tunga tamte ang kizah nadinga tami lai ang giel zong ka hi sih hi. Koima in keima’ kisahtheina a hang a susie vawt sih ding hi, tua bang sangin ka sizaw bawn ding hi!

¹⁶ Lungdamna thu ka tangko ziehin kisiel nading thu mawngmawng ka nei sih hi, bangzieh ahei cile tua thu a hil ding ma a ka tunga mawpuoh ei kisuon ahi bo hi. Lungdamna thu ka tangko sih leh gimna ka thuoh ding hi!

¹⁷ Azieh pen keima nop thu-a sem hi leng sep thaman ka nei ding hi; ahi vangin keima nop thu-a sem ka hi sihle tua pen sep dinga ei kingansie na a sem ka hi lel bo hi.

¹⁸ Tua ahile ka thaman ding bang ahiei? Ka thugennate-ah lungdamna thu sunga ka nga ding hamphatnate zang sieng loin, a man ngen loin lungdamna thu ka tangkona pen keima’ thaman ahi hi.

¹⁹ Bangzieh ahei cile koima’ sila ka hi sih vangin mi a tam theithei ka nga thei nadingin mi zosie’ sila ka kisuohsah hi.

²⁰ Jew mite ka nga thei nadingin Jew mite kungah Jew mi khat bang ka suoh hi. Thukham khut nei-a om mite ka nga thei nadingin (kei mama thukham nei-ah om lo napi) thukham nei-a omte tungah thukham nei-a om bangin ka om hi.

²¹ Thukham nei lote ka nga zawh nadingin (Pasien’ thukham panin a suohta hi tuon loin Khris’ thukham nei-a a om hizaw nanleng) thukham nei lote lahah thukham nei lote khat bangin ka om hi.

²² A thanem mite ka nga thei nadingin a thanem mite lahah a thanem bangin ka om hi. Lam khatpopo tawh mi pawlkhat ka hutdam thei nadingin mi zosie adingin sil bangkim ka suoh hi.

²³ Lungdamna thuphate-ah tanh ka nga thei nadingin lungdamna thu ziehin tam thu zosie ka bawl hi.

²⁴ Tai kidemna-ah mi zosie a tai vangin khat beh in patawina a nga lam thei lo na hi uh amah? Note in zong patawina na nga nadingun tua bangin tai un.

²⁵ Kidemna-a a kihal dingte in na vannuoi-ah amau le amau a kideh uhi; amate ahi ule a kisie thei paakuol nga nadinga kidem ahi bo vua, ahi vangin eite i hi uleh a kisie thei lo paakuol nga dinga a kidem i hi uhi.

²⁶ Tuaci’n ngimna nei loin ka tai sih a, hui lah a mawh tuptup bang zong ka hi sih hi;

²⁷ ahi vangin keima in midangte tungah thu ka hil zaw ciengin kidemna-ah a kihal zo lo ka suo khah lo nadingin ka pumpi helbawl gawpin ka thuthu ka mangsah hi.