1 Corinth-te 7 - Zo Bible

Kinunna Tawh Kisai Thuhilna

¹ Tu-in note in lai-a nang giel uh thute tawh kisai-in: “Pasal khat in numei a khoi khah lo ding hoizaw hi,” na ci uhi.

² Hizongle numei pasal pahtatna a tam seng ziehin pasal in ama’ zi, numei in ama’ pasal ciet nei uleh hoi hi.

³ Pasal in a zi a luppi ding a kilawm za-in luppi ding a, tua ma bangin a zi in zong a pasal a luppi ding a kilawm za-in a luppi ding hi.

⁴ Azieh pen a zi in ama’ pumpi tungah thu nei loin a pasal in a neizaw a, tua ma bangin a pasal in zong ama’ pumpi tungah thu nei loin a zi in a neizaw hi.

⁵ Thungen dinga na kipumpieh thei nadingun na thukimna utawh kideh hun ding tawmno khat na bawl khah uleh ci simlo, khatlekhat lupton lo ding po na kideh sih un. Na pumpi kidehlana zieh vua Satan in note ang ze-et zo lo nadingin tua zaw ciengin na lumtonkia pai un.

⁶ Tam pen thupieh bang hi loin ahi thei banga kang gen ahi hi.

⁷ Mi zosie kei banga a op zawh uleh hoi ka sa hi. Ahi vangin mikim in Pasien tung panin letsong tuomtuom a nei ciet vua, mi khat in tami letsong nga a, adang khat in a tuom khat nga hi.

⁸ Kinunpi a nei nai lote le meigong numeite tunga ka cina-ah keima bangin kinunpi nei loin a op suoh uleh amate adingin hoi ka sa hi.

⁹ Ahi zongin a kideh zawh ngap sih uleh kinei zaw uheh. Azieh pen hua-in lanin kitulmaw a op sangin nei ding hoizaw hi.

¹⁰ Kinunpi a neisate tungah- kei thupieh hi lo Topa’ thupieh hizaw- zi in a pasal taisan sih heh, ci thu ka pie hi.

¹¹ (ahi vangin a taisan tah leh pasal nei loin mang suoh heh, tua ahi sihle a pasal tawh kilemkia hinlen), a pasal in a zi khul sih taheh.

¹² Adangte tungah tami thu ka gen hi- Topa gen ahi lo keima gen- thu um mi khatpo in thu um lo mi khat zi-in nei a, tua nu in ama tawh opton ding a thukim nah po leh khul sih taheh.

¹³ Numei khat in thu um lo pasal khat nei-in tua pa in tua nu tawh opton ding a thukim nah po leh khul sih taheh.

¹⁴ Bangzieh ahei cile a zi ziehin thu um lo pasal kisiengthosah a, thu um lo a zi zong a pasal ziehin kisiengthosah hi. Tua hi sih mawh leh na tate uh a bua hi ding a, hinanle tu-a ma bangin amate a siengtho uhi.

¹⁵ Ahi vangin thu um lo zaw pen in kikhen ding a nop po leh kikhen uheh; tam bang thu-ah sanggam pa hile, sanggam nu hile a khi a om sih hi. Pasien in eite a kilem dinga ei hlatsa ahi hi.

¹⁶ Zi aw, na pasal na hutdam thei ding le na hutdam thei lo ding bangci thei na hei? Pasal aw, na zi na hutdam thei ding le na hutdam thei lo ding bangci thei na hei?

Pasien’ Sesa Hinkhuo

¹⁷ Bangbang hile mikim in Pasien’ hlatna tawh kituohin Topa’ sena bangin a hinkhuo uh zang ciet uheh. Tam thu pen keima in hlattuom pawlpi zosiete tunga ka pieh zui ding ngaina ahi hi.

¹⁸ Mi khatpo a kihlat hunin teptansa ahi ta amah? Tua pa in a teptanna lim phiet sawm tuon sih heh. Mi khatpo a kihlat hunin teptan lo ahi amah? Tua pa in teptan ding sawm nawn da mai heh.

¹⁹ Teptanna bangma ahi sih a, teptan lona zong bangma ahi tuon sih hi. Ahi vangin Pasien’ thupiehte zui ding a thupi pen ahi hi.

²⁰ No mi zosie in ang kihlat huna na op bangbang vua na op ding uh ahi hi.

²¹ Ang kihlat laitahin nang sila na hi amah? Tua thu tawh kilunghimawsah sin. Suotahna nga phiel nan lacin nidang lai-a sangin tu laitah na dinmun pen hamphatna-in zangzaw in.

²² Azieh pen sila ahi lai-in Topa sunga kihlan poma Topa-a’ hi a, tua bang ma-in a kihlat laitahin a suohta poma zong Khris’ sila ahi hi.

²³ Note na hi uleh man tawh ang kileisa na hi uhi; mihing pute’ sila suoh sih un.

²⁴ Sanggamte aw, ang kihlat lai-a na op dan bangun Pasien tawh na om suoh un.

Kinunpi a Nei Lote le Meigongte

²⁵ Tu-in Topa kung panin ngahnu siengthote tawh kisai thupieh ka nei sih hi, ahi vangin Topa’ hepina tawh a muontah keima’ ngaisutna kang pie uhi.

²⁶ Ang tung bai ding hahsatna thute ngaisun lei na op ngai bang vua na op suoh ding uh hoi va ci-in ka ngaisun hi.

²⁷ Zi tawh na kipaikan amah? Na kipaikan tah leh kikhen ding sawm sin. Zi nei nai lo na hiei mah? Na hi leh zi sui da in.

²⁸ Zi na nei tah leh a khiel na hi sih hi, ngahnu khat in pasal a nei leh zong a khiel ahi tuon sih hi. Ahi vangin kinunpi a neite in tami hinkhuo-ah hamsatna a thuoh ding vua, tua tawh note kang kipelsah nuom hi.

²⁹ Sanggamte aw, tua bang ka ci ciengin a kise hun ang nai mama ta hi, a ci nuom ka hi hi; tu-a kipanin zi neite pen zi nei lo bang danin om uh hinlen,

³⁰ a da mite a da lo bang danin, a lungdam mite zong a lungdam lo bang danin kingaisun a, van leite zong bangma nei lo bang danin om uheh.

³¹ Leitunga a kivaite zong a kivai lo bang danin om uheh. Azieh pen tam leitung dante a mangthai ding ahi hi.

³² Lunghimawna na nei lo ding uh kang deisah hi. Zi nei lopa in Topa a lungkimsah thei nadingin Topa’ vai teng a buoipi hi.

³³ Hizongle zi nei pa in a zi a lungkimsah thei nadingin leitung vai teng a buoipi hi;

³⁴ tuaci’n a lunglutna khen ni a kisuo hi. Tuale pasal nei lo numei le ngahnu siengtho in a pumpi ule a lungsim uh a sientho thei nadingin Topa’ thute a buoipi vua, hinanle pasal nei numei in a pasal a lungkimsah thei nadingin leitung nate a buoipi hi.

³⁵ Note’ phattuom nadinga tam thute kang gen ahi a, kang uhcip nop zieh uh hi loin, a kilawm op dan tawh gamta-in Topa tunga na ki-apna uh a khahtan lo nading ka deina ahi zaw hi.

³⁶ Mi khatpo in ama tawh a kikhamsa ahi numei tungah a kilawm loin gamta-in a kingaisut a, a lunggulna a khau seng ziehin a kinunpi sawm leh a lunggul bangin kinunpi taheh; tua pen mawna ahi sih hi. Ama gel kinung uheh.

³⁷ Ahi vangin ama’ lungsim sungah a kikhampi nu tenpi lo dingin khautahin khensatin koima’ pau bawl hi lo ama’ lunggulna kideh zo-in a khentatna tunga a dingkip mi khat ahile a kinunpi lo vangin phamaw lo hi.

³⁸ Tua bang ahile a kikhampi nu a kinunpi pa pen na hoi sem ahi hi; tua nu kinunpi loin a kideh zote hoizaw lai hi.

³⁹ Zi pen a pasal a hin laisie a kikhaukhi ahi hi. A pasal a si leh a dei khatpopo kinunpi thei a, hizongle Topa sung behah hi ding hi.

⁴⁰ Hinanle keima ngaisutna-ah pasal nei loin tua bangin om suoh leh a lung nuomzaw ding hi. Tua hi a, kei zong Pasien’ Hlagau nei-in ka kingaisun hi.