1 Corinth-te 4 - Zo Bible

Sawltahpite’ Nasepna

¹ Kote pen Khris’ nasemte le Pasien’ thusim kemte bangin ei ngaisun un.

² Tua tham loin thusim kemte pen a muonhuoi ding uh kisam hi.

³ Ahi vangin note na hi vua, leitung thukhen zum ahi zongin kei tunga thu nei khen uleh tua pen kei adingin thuneu khat hi lel hi. Kei le kei nangawn thu ka kikhen sih hi.

⁴ Keima in ei kimawsah nading bangma khat beh ka thei sih hi, ahi vangin tua ka ci ziehin kei maw peng ka hi pai tuon sih hi. Kei tunga thukhenpa pen Topa ahi bo hi.

⁵ Tua ahi ziehin khuomiel sungah tu-a sil kiphuoldapte khuovah sung a tut ding le lungsim sunga gelnate a pholah dingin Topa ang pei ding hun masangin thu na khen sih un. Tua hun ciengin Pasien kung panin mikim in phatna a nga ciet ding hi.

⁶ Sanggamte aw, note phattuom nadingin, “A kigielsa valin gamta sih un,” a ci pen khu ko tungtawnin note in a khietna na sin thei nading ule mi khat kisahtheipi-in adang khat na niel lo nadingun Apollos le kei mama tungah tami thu zosie ka zang zo ta hi. Tuaci’n note in mi khatpo kisahtheipi-in adang khatpo na pum niel sih ding uhi.

⁷ Azieh pen koi in na sung vuah kilamdanna khatpo a mu ahei? Na nga lo uh bang nei na hi uh ahei? A nga na hi ule zong bang dinga a nga lo bang dan a kisathei na hi uh ahei?

⁸ Note in na dei zosie uh na nei zo ta uhi! A hau zo na hi ta uhi! Ko tawh loin kumpi na suoh zo ta uhi! Note tawh kumpi i suoton thei nadingin kumpi suoh tahpi locin ka nuom hi.

⁹ Ko sawltahpite ka hi ule sina thukhenna thuoh dingte bangin Pasien in mi zosie lahah a zaneu penin ei koi zo tawh kibang ka sa hi, bangzieh ahei cile kote pen leitung mite, vantung mite le mihingte adingin guolnopna pawi sunga etnop ka suoh ta uhi.

¹⁰ Khris ziehin mimaw ka hi ta vua, ahi vangin note pen Khris sungah mipil na hi uhi! Ko ka thanem vua, ahi vangin no na thakhau uhi. No ang kipatawi a, ahi vangin ko ei kisimmaw hi.

¹¹ Tuni cieng dong gilkiel dangta-in puonsil ding nei loin ka om vua, satna thuohin inn le lo nei loin ka om uhi.

¹² Koma’ khut ma tawh gim le tawlin na ka sem uhi. Ei kisimmaw ciengin thupha ka pie uhi; ei kibawlsiet ciengin ka thuoh kenkon uhi;

¹³ ei kidaisah ciengin kamhlum tawh ka dawngkia uhi. Kote ka hi ule leitung buathah lom tawh ka kibang vua, tuni dong ciengin sil bangkim’ buathah dopniehte ka bang bep lel uhi.

Pa Hina Tawh Thuhilna

¹⁴ Tam pen na zum nading vua kang giel ahi sih a, ka it ka tate banga kang thuhilna uh hizaw hi.

¹⁵ Note in Khris sungah ang kem mi tul sawm nei phiel nan locin pa tampi na nei sih uhi. A tahtahin lungdamna thu ziehin Khris Jesu sungah na pa uh ka suoh hi.

¹⁶ Tua ahi ciengin note in kei nei ette dingun kang thum hi.

¹⁷ Tam thu ziehin keima in muncin tenga om hlattuom pawlpi zosie thu ka hil bangin Khris Jesu sungah ka gamtat ziete ang phawhsah kia dingin na kung vuah Topa sunga ka it mama le a muonhuoi ka tapa Timothy kang sawl hi.

¹⁸ Mi pawlkhat in na kung vua ang haw lo dinga ei ngaisut ziehun a kiphasah uhi.

¹⁹ Ahi vangin Topa in lem a sah leh na kung vuah a sawt loin kang haw ding a, tua a kiphasah mite’ kamham beh hi loin amau’ vanglietna ka mu ding hi.

²⁰ Bangzieh ahei cile Pasien’ manggam pen kamham tunga kinga hi loin, vanglietna tunga kinga ahi zaw hi.

²¹ Na kung vuah ciengduoi tawh kang pei diei mah? Ahi sihle itna le lungnemna tawh kang pei diei? Koi deizaw na hi uh ahei?