1 Corinth-te 3 - Zo Bible

Corinth Hlattuom Pawlpi Sunga Kikhenna

¹ Tua ahi ciengin sanggamte aw, hlagau mite tunga thugen bangin kang gen thei sih a, tahsa mite tunga thugen bang le Khris upna sungah nausente tunga thugen bangin kang genzaw hi.

² Note in antah ne zo nai lo na hi ziehun antah kang pie sih a, nawizu tawh kang va hi. Note in tu nangawnin zong na ne zo nai sih uhi,

³ bangzieh ahei cile na tahsa tawn lai uhi. Note lahah hazatna le kihauna a op laisie, note pen tahsa tawnin leitung mihing lungsim’ deina banga a gamta na hi sih uh amah?

⁴ Azieh pen mi khat in, “Kei Paul’ pawl ka hi hi,” ci-in, adang khat in, “Kei Apollos’ pawl ka hi hi,” na ci nah valuoi ciengun mihing lel ma hi lo na hi uh amah?

⁵ Tua ahile Apollos bang hi poma ahei? Paul zong bang hi mawh ahei? Amate tungtawnin note in na up thei nadingun amate sep dinga Topa in a guot ciet nasemte ahi lel bo uhi.

⁶ Keima in ka suon a, Apollos in tui a buoh hi, ahi vangin a khangsah pen Pasien ahi bo hi.

⁷ Tuaci’n a suon pa hile, tuibuoh pa hile a thupi sih a, a khangsah Pasien a thupi hi beh hi.

⁸ A suon pa le tuibuoh pa’ lungtup a kibang hi a, a sepna uh tawh kizui-in thaman a nga tuoh ding uhi.

⁹ Bangzieh ahei cile kote pen na a semton Pasien’ nasemte ka hi vua, note na hi ule Pasien’ logam, Pasien’ inn na hi uhi.

¹⁰ Pasien in keima tunga ei pieh hepina dung zui-in innlam siem pa khat bangin khuombul khat ka phut zo a, tuaci’n midang khat in tua tungah a lam hi. Tua tunga inn lam poma in bangci lam ding ci pen pilvangtaha a teel ciet ding uh kul hi.

¹¹ Azieh pen a kiphutsa Jesu Khris longal khuombul dang koima in phut thei lo hi.

¹² Mi khatpo in tua khuombul tungah kham, ngun, suong manpha, sing, lopa gaw le butu tawh inn a lam leh,

¹³ tuami Ni in a nasepna uh pholah ding ahi ziehin, a lamte’ sepna ciet zong mu thei-in ang om ding hi, azieh pen tua sepnate mei tawh kisit ding a, mite’ nasepna ciet mei in a ze-et ding hi.

¹⁴ Khuombul tunga a lamsate bangma a ci sih leh, a lam pa in thaman a nga ding hi.

¹⁵ Tua nasepna a kahtum leh a lam pa a sum hi ding hi; a lampa suohta ding a, ahi vangin ama pen mei sung pana a suohta bang dan lelin suohta ding hi.

¹⁶ Note pen Pasien’ biehinnpi na hi vua, na sung vuah Pasien’ Hlagau a ten lam na thei sih uh amah?

¹⁷ Mi khat in Pasien’ biehinnpi a suhsiet leh Pasien in ama zong susie ding hi. Azieh pen biehinnpi siengtho a, note zong tua biehinnpi na hi uhi.

¹⁸ Noma le noma kisol sih un. Tam khanghun sungah a pila na kingaisut uleh a pil na suo thei nadingun mi maw suoh phot un.

¹⁹ Azieh pen tam leitung pilna pen Pasien adingin motna ahi hi. Azieh pen, “Ama in mipilte amau’ ngian ma-ah a man hi,” ci-in kigiel hi. Tuale khatvei,

²⁰ “Topa in a pilte’ ngaisutna pen a mawhna ahi lam thei hi,” ci-in kigielkia hi.

²¹ Tuaci’n koima in mihing makaite kisielpi da heh. Bangzieh ahei cile na vannuoi noma-a’ ahi a,

²² Paul hile, Apollos hile, Chephas hile, leitung hile, tuhun hile, mailam hun hile, a unpi-in noma-a’ ahi hi,

²³ note zong Khris-a’ na hi vua, Khris zong Pasien-a’ ahi hi.