1 Corinth-te 2 - Zo Bible

A Kikhailia Khris’ Thu Phuongzahna

¹ Sanggamte aw, na kung vuah Pasien’ thu thuhpi a phuongzah dingin kang haw lai-in kihisahna kam le pilna kamte ka zang sih hi.

² Azieh pen note lahah singlamte tunga a kikhailia Jesu Khris simlo bangma thei ka sawm sih hi.

³ Na kung vuah kang pei lai-in ka tha a nem a, zau-in ka ci nahpi-in a tun hi.

⁴ Ka kamham le ka thu phuongzahte zong pilna kam tawh ahi sih a, Pasien’ Hlagau le a vanglietna tawh ahi zaw hi.

⁵ Tuami in na upna uh mihing pilna tungah kinga loin Pasien’ vanglietna tungah a kingah zawh nading ahi hi.

Pasien’ Pilna Tahtah

⁶ Hinanle kote in a picingsate lahah pilna thu ka gen uhi, tua pilna pen tu khanghun ahi sihle a maimang kuonkuon ta ding ahi tu khanghun gam-uhte’ pilna ahi sih hi.

⁷ Ahi vangin kote in leitung pien masang peha eite minthan nadinga Pasien in a na sekholsa Pasien’ pilna, a thusim le a phuolsel thute ka gen uhi.

⁸ Tam khanghun lai-a gam-uhte khat beh in tami thu a telsiem sih uhi; azieh pen amate in a na telsiem uh hileh minthang Topa a na khailia sih ding uhi.

⁹ Ahi vangin, “Mit in a mu ngai lo, bil in a zah ngai lo, mihing lungsim in a ngaisut ngai lo, Pasien in ama a it mite adingin a bawlpiehsa thu ahi hi,” ci-a a kigiel bang ahi hi.

¹⁰ Pasien in tam thu teng Hlagau tungtawnin ei theisah zo hi; azieh pen Hlagau in na vannuoi sui a, Pasien’ thuthuhte nangawn a kankhie hi.

¹¹ Bangzieh ahei cile a sunga a om mihing’ hlagau simlo koi mihing in tua mihing tahtah pen thei ahei? Tua ma bangin Pasien’ Hlagau simlo Pasien’ ngaisutna tahtahte koima in thei zo lo hi.

¹² Tu-in eite pen leitung hlagau nga i hi sih vua, Pasien in eite tunga ei pieh letsongte i telsiem thei nadingin Pasien tung pana ang pei hlagau nga i hizaw uhi.

¹³ Tuale kote pen mihing pilna tawh a kihil kammalte zanga thu gen ka hi sih vua, Hlagau’ pilna tawh hlagau mite kungah hlagau lam thute letkhie-in a gen ka hizaw uhi.

¹⁴ Hlagau mi ahi lote adingin Pasien’ Hlagau letsongte pen motna hi lel ahi ziehin amate in a sang zo sih uhi, bangzieh ahei cile tuate pen hla lam thu beh tawh kikhentel thei ahi ziehin amate in a telthei sih uhi.

¹⁵ Hlagau mite in na vannuoi a khentel thei vua, amate in koima’ sittelna a thuoh sih uhi.

¹⁶ “Azieh pen Topa a hil thei nadingin koi in ama’ lungsim thei ahei?” kici hi. Ahi vangin eite in Khris’ lungsim i nei uhi.