1 Corinth-te 16 - Zo Bible

Misiengthote ading Sumpi Kaikhopna

¹ Tu-in misiengthote ading sumpi kaikhopna tawh kisai-in: Galati pawlpite in a zui ding uh thu ka piehsa bangin note in zong na bawl un.

² Keima kang haw ciengin sumpi kaikhoptawm a a kisam lo dingin nipi kal khat sungah a ni masa ni-in khat ciet in na sum nga uh a val popo na tuomkoi unlen na khol un.

³ Kang tun ciengin Jerusalem ah na letsongte uh a puoh dingin pha na sah uh mi khatpo sawlin lai tawh kang peisah ding hi.

⁴ Kei zong ka va pei ding hoi i sah leh amate tawh ka va kithuo ta ding hi.

Paul’ Khuolzin Gelna

⁵ Macedonia gam nawhin khuolzin sawm ka hi ziehin Macedonia gam ka zin zaw ciengin na kung vuah kang haw ding a,

⁶ ka khuolzinna ka peina khat popo-ah nei panpi thei nadingun na kung vuah bakhat sung ahi sihle phalbi sung nangawn kang tam thei kha mai ding hi.

⁷ Bangzieh ahei cile tu-in note kungah ang lambang pahin i kimu ding ka nuom sih hi. Topa’ awina a op leh note tawh bakhat sung i opton ding ka lamen hi.

⁸ Ahi vangin Pentecost pawi dong Ephesus khuo ah ka tam ding hi.

⁹ Bangzieh ahei cile ei langpang mi tampi a op tei vangin kei adingin a lawcing nasep theina kot a golpi-in kihong zo hi.

¹⁰ Timothy ang haw khah leh ama zong keima banga Topa’ na sem ahi tah ziehin note lahah bangma pautau loin a op nadingin na vaihawmpi un;

¹¹ tua ahi ziehin koima na simmawsah sih un. Ama kei kunga ang kilekia thei nadingin a lampi-ah nuomtahin na hla un; azieh pen a sanggamte tawh ama ang zawhton dingin ka lamen hi.

¹² Tu-in i sanggam pa uh Apollos tawh kisai-in, keima in sanggam dangte tawh na kung vua ang haw nadingin nahpi-in ka hanthawn hi. Ahi vangin tu tadi-a ang haw pai ding pen a lunglut nai sih hi. Hun lemtang a nga ciengin ama ang haw ding hi.

A Tawpna Thugenna le Hopinate

¹³ Pilvangin upna-ah dingkip unlen hangsanin thahat un.

¹⁴ Na sep na bawlna zosie vuah itna tawh sem un.

¹⁵ Sanggamte aw, tu-in Stephanas’ innkuon pen Achaia gama thu um masa pente ahi vua, amate mama zong misiengthote’ nasepna-ah kipumpieh uhi, ci na thei uhi.

¹⁶ Note in tua bang mite le amate tawh a semton mi zosie’ thu na man dingun kang hanthawn hi.

¹⁷ Na op lo sung uh awng hu pah dingin Stephanas, Fortunatus le Achaicus-te ang haw thei ziehun ka kipah mama hi.

¹⁸ Azieh pen amate in keima’ lungsim le nomau-a’ zong ei thakhausah hi. Tuaci’n tua bang mite na theisiem un.

¹⁹ Asia gama hlattuom pawlpite in ang noset uhi. Aquila le Prisca-te in zong ama’ inn sunga a kikhawm hlattuom pawlpi mite tawh Topa sungah lungsim tah tawh ang noset uhi.

²⁰ Sanggamte zosie in zong ang noset uhi. A siengtho kinapna tawh khatlekhat na kinoset un.

²¹ Keima Paul in ka khut mama tawh tami kihopina lai kang giel ahi hi.

²² Topa a it lo a koima po in samsiet thuoh taheh. I Topa ang pei hi!

²³ Note tawh Topa Jesu’ ei hepina hing om taheh.

²⁴ Jesu Khris sungah note kang itna in note zosie tawh ang om den taheh.