1 Corinth-te 1 - Zo Bible

Hopina

¹ Pasien’ deina tawh Khris’ sawltahpi dinga kihlan Paul le i sanggam pa Sosthenes in,

² Corinth khuo Khris Jesu sungah a kisiensuosa mite a kipan misiengtho dinga kihlante le Topa Jesu Khris’ min a lo muncin tenga om mi zosiete tungah,

³ i Pa Pasien le Topa Jesu Khris tung pan hepina le lungmuonna na tung vuah om taheh.

Lungdamkona

⁴ Khris Jesu sungah note adinga ang kipiesa Pasien’ hepina ziehin Pasien tungah nuom thu ka tut ngitnget hi.

⁵ Bangzieh ahei cile note pen ama sungah thugenna le theina namcin tawh na bukim zo ta uhi.

⁶ Note lahah Khris’ thu teci panna a kikipsah zo ma bangin,

⁷ i Topa Jesu Khris ang kilah ding ngahin na om sungun zong Hlagau letsong tasap na nei sih uhi.

⁸ I Topa Jesu Khris’ ni ciengin kaw baang lo-a na op thei nadingun ama in a tawp tanpha-in ang thakhausah ding hi.

⁹ A Tapa i Topa Jesu Khris tawh kipawlna sungah note ang hlan pa Pasien muonhuoi hi.

Hlattuom Pawlpi Sung Kikhenna

¹⁰ Sanggamte aw, na unpi-un kithutuoh-in note lahah pawlkhenna a op lo nading le, lungsim le tupna kibang khat sungah na kigawm thei nadingun Topa Jesu Khris’ min tawh kang thum hi.

¹¹ Bangzieh ahei cile ka sanggamte aw, note lahah kihauna om hi, ci thu Chloe’ mite pawlkhat in ei zasah zo hi.

¹² Ka ci nopna-ah note khat ciet in, ‘Kei Paul’ pawl, kei Apollos’ pawl, kei Chephas’ pawl, kei Khris’ pawl ka hi hi,” na ci deidoi uhi.

¹³ Khris a kikhen amah? Note adingin singlamte tungah Paul a kikhailia amah? Ahi sihle Paul’ min suongin na ki-baptize uh amah?

¹⁴ Crispus le Gaius simlo koima khat beh kang bapitize khah lo ziehin Pasien kungah nuom thu ka tut hi.

¹⁵ Tuaci’n koima in keima’ min suongin ka ki-baptize hi, ei ci thei sih hi.

¹⁶ (Stephanas-te innkuon zong ka baptize hi; tua lo adang ka baptize lam ka thei kha sih hi.)

¹⁷ Azieh pen Khris in mi baptize dinga ei sawl hi loin lungdamna thu hil dinga ei sawl ahi zaw a, ka thugen siem man zong ahi sih hi. Hi mawh leh Khris’ singlamte vanglietna a hawmsuohsah kha ding hi.

Khris, Pasien’ Pilna le Vanglietna

¹⁸ Bangzieh ahei cile a mangthai mite adingin singlamte’ thu pen motna ahi a, ahi vangin hutdamsa eite adingin Pasien’ vanglietna ahi hi.

¹⁹ Azieh pen, “A pilte’ pilna ka susie ding a, miteite’ teina ka sumai ding hi,” ci-in kigiel hi.

²⁰ Mipil hei-ah om ahei? Laisiem pa hei-ah om ahei? Tuhun mi thu nielsiem pa hei-ah om ahei? Pasien in leitung pilna pen motna suohsah zo hi lo amah?

²¹ Bang ding ahei cile Pasien’ pilna sungah leitung mite in a pilna uh tungtawnin Pasien a thei lo tah ziehun, a mothuoi kote’ thuhilna tungtawnin Pasien in a um mite hutdam dingin a khensat hi.

²² Azieh pen Jew mite in lim ngenin Greek-te in pilna a deigaw uhi.

²³ Hizongle kote in Jew mite adingin kisui khahna suong le Greek-te adingin motna ahi a kikhailia Khris’ thu ka hil uhi.

²⁴ Hizongle a hlatsa Jew mite le Greek-te adingin Khris pen Pasien’ vanglietna le Pasien’ pilna ahi hi.

²⁵ Azieh pen mihing’ pilna sangin Pasien’ motna pilzaw a, mihing’ hatna sangin Pasien’ thanemna hatzaw hi.

²⁶ Sanggamte aw, ang kihlat lai-a na dinmun uh ngaisun un; mihing muna panin note a tamzaw mipil hi loin, mi vanglien zong na tam sih vua, pienpi nampi zong tampi na om sih uhi.

²⁷ Ahi vangin mipilte a maizumsah dingin leitungah Pasien in mimawte teel a, a kihatsahte muolpho nadingin Pasien in a thanem mite a teel hi.

²⁸ A omsa nate bangma loin a kiemsuh nadingin Pasien in leitungah a gina lo nate le a kisimmawte a teel hi.

²⁹ Tua khu Pasien mai-ah koima a kisiel thei lo nading ahi hi.

³⁰ Ama pen Khris Jesu sungah na hinna zungpi uh ahi a, Pasien in Khris pen i pilna, i dihna, i sienthona le i kitatkhietna a suohsah hi.

³¹ Tua ziehin, “A kisiel poma, Topa sungah kisiel taheh,” ci-in kigiel hi.