ZEKHARIAH 13 - Zotung Bible 2016

¹ Tuin nin khe David ciihan te Jerusalem khuaccaaw hae mih seinaw te mih nungsikunaw kha ccikan nawlan tuidy ccangkheit aphyh cih.

Zohtuh Beiknaw Vuanaw

² Vaaw Bawipaw nynh a hopaw tuh, tuin nin khe zohtuh hae min kha liathui athua vae khyh nawlan ram kyate ka vua cih; profeh hae te athyaa leipaw muisaw hae kha mah ram kyate ka vua cih hae.

³ Profeh lukhakheit tuh bua yn langku lanze, amaw a saahkuhtu hae a nung te a paaw nynh, “Nang tuh Bawipaw min te hynbya na ho keiccuze na hiin vae lan khyh,” cite a hopah cih hae zah, profehbya a ho lyakhe a saahkuhtu hae a nung te a paaw nynh amaw kha po zua lan a thuing cih hae.

⁴ Tuin nin vae tuh profeh hae tuh profehbya a ho vae hae ze, minmin lu kheit cci nynh a muih hae paw mih vizin keiccu mih maethah cih; milae kha ling khylan saming angkiccua kha kikuh vae lan khyh hae,

⁵ minmin lu kheit cci nynh, “Kae tuh profeh ka thua khyh, loophopaw nynh ka thua; ka di lya mawte laephi te a vuekuakuhpaw nynh ka thua,” cite a ho cih hae.

⁶ Te lukhakheit nynh, “Na by kya-e vaemaw hynh paw keiccu mou athua?” cite a khia hae ze, “Ka ban hae inn kya ka muepaw vaemaw nynh thua,” cite a khung cih hae.

Tuurin Detahnaw, Tuu hae Phiakunaw

⁷ Pou thaloi, kae te ryalahkheihpaw, ka tuurinpaw kha rawsete thonuaku tua, cite Vaaw Bawipaw nynh a ci. Tuu hae tuh phiariphiarae a um ccaw hae, tuurinpaw kha ziatua; tuu taraw hae kha rawsete ka kuih ka maeleihnua cih hae.

⁸ Bawipaw nynh a hopaw tuh, ram pynpi kya ccungccaw pum thum pum ning kha vuate ro athua cih hae zah, pum thum pum kheit tuh a laehy cih hae.

⁹ Te pum thum pum kheit tuh maee lungkhu ka nung cih hae zah, ngun kha thyaasah hawte ka thyaasah cih hae, sui kha syntawtua hawte ka syntawtua cih hae. Minmin nynh ka min kha yn ko cih hae zah ka oi cih hae. Kae nynh, “Minmin tuh ka ccungccaw hae nynh thua hae,” cite ka ho cih zah, minmin nynh, “Bawipaw tuh kae Pachia nynh thua,” cite a ho cih hae.