ZEFANIAH 2 - Zotung Bible 2016

Israel Rhaw hae kha Byapianaw

¹ Pou maethya nyh lei hae paw minphuin hae, sueluakuh oh, pynkheihlan sueluakuh oh,

² nanning kha vaekang hawte ccaring ae mung maw oh, Bawipaw thinrianaw myarya ccihpaw tuh nae tungvaw a thua maw, Bawipaw thin-unaw nin tuh nae tungvaw a thua mawkhe, sueluakuh oh.

³ A kawbya a zui hae paw ram lungkhu e zakawsangsakuh hae paw nanning balyn, Bawipaw kha ccungtua oh; dingnaw te zakawsangsakunaw kha ccungtua oh, Bawipaw thinrianaw nin khe nanning nynh rekunaw kha poh na muihkuh kho oh.

⁴ Pawccecize Gaza tuh poutaw athua cih zah, Ashkelon tuh ccungccaw kharouh adaepaw lang a tang cih; Ashdod khuaccaaw hae tuh ninthu khe dee athua cih hae zah, Ekron khua tuh khaleih ro athua cih.

⁵ Rili kin um hae paw Kereth minphuin hae, nae hanlan ngaethya lan kou um! Pou Filistin hae ram athuapaw Kanaan, Bawipaw bya nynh nang kha ae rawse vae; ccungccaw lu kheit san a um lei lan ciate nang kha kae roh cih.

⁶ Pou rili kin e ram, nang tuh sahiin rampaeekunaw, tuurin hae umnaw te tuukhia lang na tang cih.

⁷ Rili kin e ram tuh a laehy hae paw Judah hae ram lang a tang cih, minmin nynh tuin kya a um cih hae zah, zete khe Ashkelon khua e inn hae kya a rya cih hae. Pawccecize Bawipaw mih Pachia nynh minmin kha a oihsah cih hae zah, mih hiinnaw kha langmaw hawte a hoysah thui cih.

⁸ Moab hae te Ammon hae nynh ka ccungccaw hae kha theihrya hae zah, mih ram luade lan a poonuaku hae paw bya kha ka thae vae.

⁹ Tukeiccuze vaaw Bawipaw , Israel Pachia nynh a hopaw tuh, kae tuh ka hiin thyhte, Moab tuh Sodom hawte athua cih zah, Ammon tuh Gomorrah hawte athua cih, hinpaw aponaw ram, loi khu, te zungzae arohpaw ram lang a tang cih. A laehypaw ka ccungccaw hae nynh minmin kha a thiing cih hae zah, a hiinhypaw ka minphuin hae nynh mih ram kha a ccou cih hae.

¹⁰ Minmin nynh vaaw Bawipaw a ccungccaw hae kha saryate a poonuaku hae keiccuze mih lysakunaw hanlan, e hynh minmin tungvaw liarunaw nynh thua.

¹¹ Bawipaw nynh minmin kha myarya a risah cih hae; laephi vaw e pachia hae balyn kha ccungkia leipaw lang a rae cih hae, minphuin ccangpaw hae kya-e rili kin e ram te tuikoih hae balyn nynh mih umnaw raveih kyakhe amaw kha bakhungnuate a beik cih hae.

¹² Pou Ethiopia ccungccaw hae, nanning mah ka thaloi te chia na thua cih oh.

¹³ Aning nynh thahlang khe a kuih a dyng cih zah, Assiria kha a roh cih; Nineveh kha ramrou hawte ccungkia leipaw aroupaw, ccungccaw adaepaw khua lang a tangsah cih.

¹⁴ Khua lungkhu khe sahiin hae te loramsaw miakaw tuh a rya cih hae; ramrou nawnia te lantaw hae tuh tungpi hae dung khe a um cih hae; nawnia hae tuh thanlan-aw hae kya a sia cih hae, va-aw hae tuh inn atolang pounaw khe a to cih hae; pawccecize inn hae kya-e sidar thing hae tuh khaleih law athua cih hae.

¹⁵ E khuapi tuh amaw te amaw kha, “Kamaw laelan humhung mah um vae khyh,” cite cikuh zah, khyndadyh lan umte a lungtuapaw khua kha athua tou? Atu arohpaw hmin, loramsaw hae nynh a paeenaw hae hmin lang rei phe a tang vae! A pe a cceihpaw miakaw nynh saryanawpaw roisawnua hae zah mih kuihlung kha a lungnua hae.