The Psalms 97 - Zotung Bible 2016

Pachia Uknaw Phu-enaw

¹ Bawipaw tuh siapharan nynh thua! Laephi tuh a lungtua sah; tuikoih patae mah mih lungtua sah!

² Maeking te marae zipingpaw mohnaw hae tuh amaw pe khe po voilu lan a um hae; dingnaw te byading tuh a bawitungkhung atynnaw nynh thua hae.

³ Maee tuh amaw malang khe cceih zah, po voilu lan a umpaw a rhaw hae kha a u hae.

⁴ A khozaw nynh laephipi kha a ak; laephi nynh muih zah a thyngkuh.

⁵ Bawipaw malang khe, laephi pynpi a ukpaw Bawipaw malang khe mua hae tuh khoilung hawte atui hae.

⁶ Vaawlui nynh a dingnaw kong kha ho zah, ccungccaw hae balyn nynh a phu-enaw kha a muih hae.

⁷ Raepaw zohtuh a beikpaw balyn kha maethya a law hae, ccungkia leipaw zohtuh liate a pookuh hae paw pachia hae balyn tuh amaw malang khe a bakhung hae.

⁸ Pou Pachia, na byapianaw liate Zion khuaccaaw hae nynh thae hae zah mih lungtua, Judah ram e khua hae mah mih lungtua.

⁹ Pou Bawipaw , nang tuh laephi pynpi kya ahang huaccepaw nynh na thua; ccangpaw pachia hae balyn laeze myarya hangthung na thua.

¹⁰ Bawipaw nynh hoyleipaw a hua hae paw kha a sungsah hae; alungzipaw a ccungccaw hae hiinnaw kha a rin hae; minmin kha ccungccaw hoylei hae paw kuih kyate a luesah hae.

¹¹ Awnaw tuh miding hae hanlan aw zah, lungtuanaw tuh thinlung ading hae paw hanlan a aw.

¹² Pou miding hae nanning, Bawipaw kya nae lungtua sah lah, a min thyaapaw kha thehoysah oh!