The Psalms 94 - Zotung Bible 2016

Miding hanlan Liarutu Pachia

¹ Pou Bawipaw , nang tuh liarutu Pachia nynh na thua, liarutu Pachia, na awnaw kha awsah tua!

² Pou laephi byapiatu, thoku tua; a lyasakuh hae paw kha accan thyhte detahtua hae!

³ Pou Bawipaw , ccungccaw hoylei hae paw tuh hohseciamou mih lungtua cih?

⁴ Minmin nynh lysakunaw bya kha a ho hae; hoyleinaw a raepaw balyn tuh a pookuh hae.

⁵ Pou Bawipaw , minmin nynh na ccungccaw hae kha roh hae zah, na rho athuapaw na ccungccaw hae kha a tuaa a sah hae.

⁶ Minmin nynh nomae te mikhia hae kha thuasah, ngawraw hae kha thuasah theih hae zah,

⁷ “Bawipaw nynh muih lan khyh; Jakob Pachia nynh nyh lan khyh,” a ci hae.

⁸ Pou tuanaw hoi leipaw ccungccaw hae, thaethyatua oh; mingaee hae, hohtuhmou na haw ung cih oh?

⁹ Nakaring a raetupaw Pachia nynh thae lan khyh tou? Mit a raetupaw Pachia nynh muih lan khyh tou?

¹⁰ Minphuin hae a thuiheitupaw nynh detah leite a um cih tou? ccungccaw kha nynaw a ccangpatupaw nynh nyh lan khyh tou?

¹¹ Ccungccaw tuanaw tuh alakawpaw nynh thua cipaw Bawipaw nynh phe a ny.

¹² Pou Bawipaw , na thuihei hae paw te na phunglang na ccangpya hae paw tuh lungtua hae paw nynh thua.

¹³ Ccungccaw hoylei hae paw hanlan hunghua thae athua makhia, minmin kha vawsawnaw kyate haeungnaw na pya hae.

¹⁴ Bawipaw nynh a ccungccaw hae kha vua lan khyh hae; a rho athuapaw a ccungccaw hae kha vua lan khyh hae;

¹⁵ pawccecize byading tuh miding hae kalan a kithui cih zah, mih thinlung adingpaw balyn nynh tuh-e byading kha a zui cih hae.

¹⁶ Ccungccaw hoylei hae paw kha rawsete hummou ka kalan te a thokuh bua cih? Hoyleinaw a rae hae paw kha rawsete hummou yn thadynkhae cih?

¹⁷ Bawipaw tuh yn bawmtu a la thua khyh lanze, ka muisaw tuh adaenaw ram kya aro maw a um vae cih.

¹⁸ “Ka ccu a thei,” he ka ci tuh, Pou Bawipaw , atynpaw na sungsahnaw nynh phang yn kyng.

¹⁹ Ka tuakunaw he aru vae ze, na kya-e ngaengansahnaw nynh ka lung yn pawsah.

²⁰ Uktu hoylei hae paw tuh nang te na ccawkuh kho oh zawtou? Minmin tuh upadi rawsete thyaruhnaw a paccynkuh hae paw nynh thua.

²¹ Minmin nynh miding hae hiinnaw kha rawsete pynkheihlan mungkuh hae zah, seinaw a hoi lei hae paw kha chia lan bya a pia hae.

²² Thuasalama Bawipaw tuh yn thungkhawtu thua vae zah, ka khynnaw lungpi, ka Pachia nynh thua.

²³ Pachia nynh mih hoyleinaw hanlan a liaru cih hae zah, mih hoyleinaw hanlan minmin kha a maemih cih hae; Bawipaw ah Pachia nynh minmin kha a maemih cih hae.