The Psalms 92 - Zotung Bible 2016

Thehoysahnaw Hlaw

¹ Bawipaw kalan lungtuabya hote, Ahang Huaccepaw Pachia, na min thehoysahnaw hlawsah tuh myarya ahoy;

^2-3 tintang, phyly te roi hoypaw kha khuakute awkhua kya atynpaw na sungsahnaw kha thuasah, khuazi kya na lungzinaw kha thuasah hopaw tuh myarya hoypaw nynh thua.

⁴ Pou Bawipaw , na ryalaw te ka lung nae tuasah vae; na kuih te na cyipaw liate lungtuate hlaw ka sah.

⁵ Pou Bawipaw , na ryalaw hae hynh pawcih baban mou alesae! Na tuanaw tuh myarya akhu!

⁶ Mih lungru hae paw nynh nyh kho khyh hae, mingaee hae nynh a thaethya lei hae paw tuh:

⁷ ccungccaw hoylei hae paw tuh lonua hawte lethung hae zah, hoyleinaw a rae hae paw balyn tuh hoynaw a mue hae zemah, zungzae ro athua cih hae,

⁸ thuasalama, pou Bawipaw , nang tuh ahangnaw kya nynh zungzae na um.

⁹ Pou Bawipaw , na rhaw hae tuh a chih cih hae; hoyleinaw a rae hae paw balyn tuh phiariphiarae a um cih hae.

¹⁰ Thuasalama ka ki kha saccung ccungte ki hawte nae hangthung vae; chitui athawpaw te ka tungvaw nae bu vae.

¹¹ Ka rhaw hae a shung hae paw kha ka mit nynh phe a muih vae; ahoy leipaw ka rhaw hae ronaw kha ka nakaring te phe ka thae vae.

¹² Miding hae tuh ungcci ku hawte hoyte lethung hae zah, Lebanon e sidar ku hawte a lethung hae.

¹³ Minmin tuh Bawipaw inn kya lin thua hae zah, ah Pachia voidu lungkhu a lethung hae.

¹⁴ A taw vae hae zemah palei athae thae ung hae; hinlalyh lan zungzae um hae zah, aphi te phe beih hae,

¹⁵ e hynh nynh Bawipaw tuh ading cipaw a langsah; aning tuh ka lungpi thua zah, amaw kya dingleinaw um khyh.