The Psalms 91 - Zotung Bible 2016

Thungkhawtu Pachia

¹ Ahang Huaccepaw kya-e khynnaw kya na umpaw, Athunghuapaw kya-e mynlyh kaw na umpaw nang nynh

² Bawipaw kyakhe, “Ka khynnaw te ka rhawlungrua athuapaw ka Pachia kha ka doliaku,” cite na hopah cih.

³ Aning nynh nang kha kaangsyatupaw kaang kyate thuasah, chi khopaw ccinaw kyate thuasah ae luesah cih;

⁴ a sake ming nynh nang kha ae bong cih zah, a sake kaw khe khynnaw na mue cih; a lungzinaw tuh khawriaphua te rhawtuk-zunghe athua cih.

⁵ Khuazi kya ri lan umpaw thuasah, ninthu kya athuipaw the thuasah,

⁶ mohnaw kya umpaw vawsawnaw thuasah, ninthuccynglyn kya chia a mangpaw ronaw thuasah na rih lan khyh.

⁷ Na pe khe ccungccaw thong kheit, na ranglang khe thong haw a chih cih hae, thuasalama tuh-e chinawpaw nynh nang kha ae thuanua lan khyh.

⁸ Na mit te do kyalya na do cih zah, ccungccaw hoylei hae paw nynh a teing hae paw detahnaw kha muih te kyalya na muih cih.

⁹ Bawipaw kha na khynnaw lang na nungkuh zah, Ahang Huaccepaw kha na umnaw hmin lang na nungku vae keiccuze,

¹⁰ hoyleinaw tuh na tungvaw ccah lan khyh zah, ccinaw alepaw tuh na inn pe lang naekuh lan khyh.

¹¹ Na ccianaw takyh kya nang kha rin khylan Pachia nynh a vaawccungccaw hae kha kaw a pya cih hae.

¹² Na ccu kha lung kya na thuhku khyh nawlan, mih kuih te nang kha ae dua cih hae.

¹³ Chindeih te hupaw kha na syde cih hae, chindeih nopaw te huparepaw kha na ccu te na syde cih hae.

¹⁴ Kae yn sungsah hae paw kha ka luesah cih hae; ka min yn nyh hae paw kha ka thungkhaw cih hae.

¹⁵ Minmin nynh yn ko hae ze, ka oi cih hae; vawsaw a tung hae ze, ka umkhae cih hae, minmin kha ka luesah cih hae zah, sawtuanaw ka pya cih hae.

¹⁶ She saenaw te minmin kha mih lungry ka ccingsah cih hae zah, ka khumnaw kha ka muihsah cih hae.