The Psalms 88 - Zotung Bible 2016

Bawmnaw Mue khylan Sawsangnaw

¹ Pou Bawipaw , yn khumtu Pachia, khuazi khuadae na malang ka sia,

² ka sawsangnaw tuh na kya thua vae sah; na nakaring kha ka siaruanaw kalan yn tuaku tua.

³ Pawccecize ka muisaw tuh vawsawnaw te phe beih zah, ka hiinnaw tuh Michi khua lang anaekuh vae.

⁴ Kae tuh Hunghua lungkhu lang a ccah hae paw kya riabia ka thua vae; kae tuh bawmnaw a hoi leipaw hawte thuasah,

⁵ michi rhua hae laku kya a vua hae paw hawte thuasah, theih hae zah shawku kya ahuekuhpaw hawte thuasah ka thua zah, na liathui vae lei hae paw hawte nynh ka thua vae, pawccecize minmin tuh na kuih kyate vua athua hae.

⁶ Kae kha Hunghua akhunaw, amohpaw te akhupaw hmin kya nae nung vae.

⁷ Na thin-unaw nynh ka tungvaw rikalae lan yn ne zah, na tuileih balyn te nae vusah vae.

⁸ Kae ccawkuh hae paw kha nae sibiasah vae hae; minmin nynh a ri hae paw lang nae rae vae. Ka pou kho lei lan nae khawsung vae;

⁹ ngaethyanaw keiccuze ka mit houhouh amoh vae. Pou Bawipaw , nang kha nin takyh kae ko; ka kuih kha namaw kalan ka dyng.

¹⁰ Michi hae elang ngaeangthua lan umpaw rya kha na lah tou? Michi hae nynh nang kha thehoysah khylan a thokuh hae tou?

¹¹ Atynpaw na sungsahnaw tuh shawku kya ho athua tou? Na lungzinaw kong kha ronaw hmin kya ho athua tou?

¹² Na kya-e ngaeangnaw hae kha mohnaw kya ny athua tou? Na kya-e khumnawpaw bawmnaw tuh ningnaw ram kya ny athua tou?

¹³ Thuasalama, pou Bawipaw , kae tuh na kalan ka sia; awkhua ccyh kya ka sawsangnaw tuh na malang phe athua.

¹⁴ Pou Bawipaw , pawccemou nae vua? Pawccemou na mae nae retawku?

¹⁵ Ka di lya mawte vawsaw ka tung zah vyavya leih ka chih, detahnaw nae ingsah keiccuze myarya ka bang vae.

¹⁶ Na thin-unaw nynh phang yn bong; ri lan umpaw na syronaw nynh kae kha yn ro.

¹⁷ Tui alepaw hawte anin ninlang yn koihlu hae; voilang ranglang te yn naenuaku hae.

¹⁸ Ka ruiban hae te ka innpaw hae nynh kae kha nae sibiasah hae; kae ccawkuh hae paw tuh mohnaw kya a um hae.