The Psalms 84 - Zotung Bible 2016

Beikinnpi kya Beikte Lungtuanaw

¹ Pou vaaw Bawipaw , na umnaw hmin tuh pawcih baban mou ry lan a um!

² Bawipaw beikinnpi kha ka muisaw nynh myaryamaw ngae zah a thawthang; ka thinlung te ka pyn nynh ahiinpaw Pachia kalan lungtuate hlaw a sah hae.

³ Pou vaaw Bawipaw , ka Siapharan te ka Pachia, rihthya nynh heize umnaw kha muihkuh zah, za-yeh pavaw nynh mah amaw hanlan bu a luaku, na silawhang pe khe mih taw hae kha a nung hae.

⁴ Na inn kya um hae paw tuh lungtua hae paw nynh thua hae, namaw kalan hlaw palei a sah hae.

⁵ Namaw kyate thawzung a mue hae paw, Zion Mua lang ccia lan a ry hae paw tuh lungtua hae paw nynh thua.

⁶ Minmin nynh Baka accya kya a ccia lya hae khe, tuh-e accya tuh tuidy a pounaw hmin lang a tangsah hae; masaty rahpaw khuaatui nynh tuisung hae kha phe a biasah hae.

⁷ A ccia lya hae khe mih thaw houhouh asae; pachia hae Pachia tuh Zion kya muih athua cih.

⁸ Pou vaaw Bawipaw , ka sawsangnaw hynh yn thaepya tua; Pou Jakob Pachia, yn ngaepya tua!

⁹ Pou oun thungkhawtu Pachia, chitui na thuhpaw mitmae kha dotua.

¹⁰ Na beikinnpi lungkhu nin kheit um tuh ccangpaw hmin kya nin thong kheit um laeze ahoyhua. Pachia thuakaw ngawtu lang tang tuh ccungccaw hoyleipaw inn lungkhu um laeze ahoyhua.

¹¹ Pawccecize Bawipaw Pachia tuh khuanin thua zah thungkhawtu mah athua; aning nynh maehoynaw te sawtuanaw kha yn pya. Hmerarih lante ryalah hae paw kha Bawipaw nynh ahoypaw uccaw pya leite um khyh hae.

¹² Pou vaaw Bawipaw , nang ae doliakuhpaw miakaw tuh lungtuapaw nynh thua.