The Psalms 80 - Zotung Bible 2016

Israel hanlan Sawsangnaw

Asaf Hlaw

¹ Josef phin kha tuuphu hawte a cciakhaepaw, Pou Israel Tuurintu, beih yn ngaepya tua! Cherubim vawlan bawitungkhung kya a haungpaw,

² Efraim, Benjamin te Manasseh phin hae malang khe na thawzung kha langsakute, kaening khum khylan oun thuatua!

³ Pou Pachia, kaening hynh langmawlya hawte oun thuasah thui tua; khumnaw kae mue nawlan, na mitmae kha awsah tua.

⁴ Pou Bawipaw vaaw Pachia, na ccungccaw hae sawsangnaw kya hohseciamou na thinria ung cih?

⁵ Minmin kha mitphi sanlou na dang hae zah, nia lanpaw mitphi kha mah phe beih lan na pya vae hae.

⁶ Kaening hynh kae innpaw hae nynh saryapaw lang nae rae zah, kae rhaw hae nynh oun nuinse hae.

⁷ Pou vaaw Bawipaw Pachia, kaening hynh langmawlya hawte oun thuasah thui tua, khumnaw kae mue nawlan, na mitmae kha awsah tua.

⁸ Izip ram kyate misu ku kukheit kha na cciakhae zah, ccangpaw minphuin hae kha na dee kou hae te, tuh-e misu ku tuh na lin.

⁹ Tuh-e misu ku hanlan laephi kha na cciccaepya; a tharui saw zah, ram lungkhu phe abeih.

¹⁰ A mynlyh nynh mua hae kha khaw hae zah, a karan hae nynh sidar ku pipi hae kha pong a bong hae;

¹¹ a karan hae tuh rili kyacia lo hae zah, a toihthaw hae paw tuh Vawpi kyacia phe a thua.

¹² Te laanpi po a cceih hae paw nynh a thae kha a loku ccaw hae cite, pawccemou a tureih kha na ropya?

¹³ Nge nynh tuh-e aku tuh roh zah, loramsaw hae nynh a ae hae.

¹⁴ Pou vaaw Pachia, yn maeleihku tua; vaawlang te dobung lah muihtua; e misu ku hynh do-oihtua,

¹⁵ na ranglang kuih te na linpaw misu ku taraw hynh do-oihtua.

¹⁶ Rhaw hae nynh maee te u hae zah, a nge vae hae; thinrianaw maesue te na thuiheinaw hae kyakhe roh hae sah.

¹⁷ Thuasalama na ranglang kuih kya a umpaw ccungccaw, namaw elang a thaw na saesahpaw ccungccaw tungvaw khe na kuih kha khangtua.

¹⁸ Tetuh namaw kyate nulang kharouh kae maeleihkuh vae lan khyh; hiinnaw oun pya lah, na min kae thehoysah cih.

¹⁹ Pou Bawipaw vaaw Pachia, khumnaw kae mue nawlan, na mitmae kha awsah tua.